In kaphlum (palh) tih lo awm Ṭhin hi

Hei le, a pawi ṭhin hle mai. A rang lama sawi a, au chhuah a ngai ta. Keimah ni lo, rual u zawkte kamkeuna ka lo ngaichang reng a, mahse the hmeh ang mai an ni. Kan pi leh pute hunlai khan ramvachal, pasalṭha tak tak sawi tur an tam mai awm asin.

Mihring nunna hi a uiawmin a hlu a, mahse e... mi leh sa thliar hrang chiang hmasa ngam ta ṭhin lova, thal thlah ta mai chingte avangin kan thi ta fo mai. Silai hi a puak thei a, sa pawh a kah theih, mah se sa kap ta lova mahni ṭhiante, ram vahpui, mi rawtuai/ mautuai kheh lai kap hlum dur mai hriat tur a awm ta fo mai. He thil ṭha lo tak hi a veiawm ngawt mai. Tunlaiah miin sawrkarah silai an tung tawh a, hah u sa pek leh inkah dur dur hi i bansan tawh teh ang u.

Tunah pawh ber thla, awl len hun kan thleng leh ta reng mai a, he hun hi a ni, fimkhur zual a ṭul hun chu. I ram vak lo thei lo a, i chhuak dawn rau rau a nih chuan vanduaina leh tihpalh pumpelh turin fimkhur takin thurawn hi zawm ang che.

In khuaah ram vak ṭhin an awm leh tawh em? Khawi ramah nge an riah dawn, an kal dawn tih lo hre ta la. I va fin (pawh) dawn a, tlai lam a nih tawh phei chuan kawng ni loah kal lo ang che.

Nang pawh i kal laiin ding deuh det ṭhin la, thawm i lo hre ta a, i pan hnai zel a, kal bawrh bawrh loin mihring an awm ve thei a ni tih hriain fimkhur rawh. Chawhmeh zawng, mautuai, hruizik kheh, chakai khawrh, tumbu vai etc pawh an awm ve ṭhin a, i thin a phu rang ang a, sa emaw i ti pawh a ni thei. Mahse, sa a ni ngei em? a ke, a ki, a mawng, a lu, a mei, a vun rawng a lang thei em tih i finfiah hmasa vek a nih loh chuan i silai i hmet puak ngawt tur a ni lo. Kumkhuaa inchhiarna tham vanduaina i thlen tir palh thei.

Chawhmeh zawng te, feh te tan pawh i thil tihna lam ringawtah i rilru zawng zawng dah bik suh. A khat tawkin thawm nei ṭhin la, e hem a nih loh pawhin zai/ faifuk a, mau emaw lung chang emaw i chem phek zawng khan vua (hem) rawh; chem ri chu dang tak a ni. Chu i chem ri emaw chu a ri a ring duh a, ramvak dangten an lo hria ang a, an fimkhur phah thei ang; a vanduai hi a na zawk kan ni ziah si a. Thawm i neih deuh zeuh zeuh reng khan sa hlauhawm, sakei, savawm, sanghal etc an lo in thiar fihlim ve mai thei bawk.

Tin, mahnia i kalin ram hla lutukah kal suh. A chhan chu savawm seh ho te hi mi 4/5 emaw kal khawmho a seh khat khawp.

- F. Lalthangmawia, Kulikawn, Dam Veng