THE BIBLE SAYS SO!
Hman ni khan "hun hnuhnung" thu kha kan han ṭan vuai a. Kan han khaihlak leh ta lawk kha a ni a. Vawiin aṭang erawh chuan kal zar zar kan tum tawh e.
Kan lo sawi nual tawh kha han thual leh lawk ila. Hun hnuhnung thua kan hriat lar ber pakhat chu mi thianghlim lâwr (Rapture) an tih hi a ni a. He rapture thu hi Lal Isuan A sawi hmasa ber e kan ti a nih kha. Chanchin Ṭha Johana ziakah khan "...in tan hmun siamin ka kal dawn hi...ka lo kir leh ang a, ka hnênah ka la ang che u, ka awmnaah nangni pawh in awm theih nan," A ti a nih kha (Johana 14:3). Lal Isuan A zirtirte kha A Pa Pathian hnênah A kalsan rih dâwn a, mahse A lo kir leh ang a, A hnênah A hruai hlawm dawn a ni tih fiah takin A sawi a. Lal Isua chu vânah A chho va, A lo chhuk leh ang a, A awmna vanah ringtute chu A hruai chho leh dawn a ni. Hei hi mi thianghlim lâwr sawi lanna Lal Isua kâ ngei aṭanga kan hriat a ni.
Tirhkoh Paula chuan van aṭanga vântirhkoh lalte nen thâwm ring tak nen A lo chhuk thlak dawn thu leh, piangthar thi tawhte kaithovin, lo la damte taksa thara kaithovin (cf.1Kor 15:51,52) vanah chu'ng piangtharte zawng zawng chu thawk leh khatah, A la chho duak dawn a ni tih a sawi chiang leh hle a (1 Thess 4:16,17). Paula awka takah phei chuan "Hei hi Lalpa thuin in hnenah kan sawi a ni," a ti hial nghe nghe a ni (v.15).
A awmzia chu Johana 14:3-a Lal Isua sawi kha a rawn ripît (repeat) leh a nih hi.
Hetia sawi a ngaihna chhan hi thil pawimawh tak a awm a, chu chu, he laia Rapture thu hi Lal Isua Second Coming nia sawi kan awm tlat a. Ṭhenkhatten Lal Isuan A thiha A Thawhleh huna zirtirte A tlawh lehna tur thua puh tlat an lo awm ve nen. Uluk deuhva hrilhfiah kan tum dawn a ni.
Tichuan kan zaa kan chian hmasakna tur chu Rapture (mi thianghlim lâwr) hi Lal Isua leh Paula te hian min zirtir chiang em em a ni tih hi a ni. Thessalonika 4:13-18 thu tlangpui atana Lalpa lo kal lehna tihte hi Bible Society of India-in a tih dan a ni a, a dik theih dan emaw dik theih loh dan emaw lo chhut teh ang che aw!
- F. Lal Thanzuala, 9436141242