Lem chan bansan ang u

Mi tinte kan nih phung leh khawsak phung, kan dinhmunte a inang vek lo. Hetih laiin nihnaa lungawi hi a lo har aniang, mahni nihna ang loa lang a, a lema nun kan ching fo mai.

A bikin ṭhalaite zingah mahni nihnaa lungawi lo, nihna aia lan mawi leh nalh te, chhungkaw dinhmun dik tak aia sanga lang a, mi hriat nih chakna a tam viau. Thil hre ber nihte kan chak riau ṭhin. Nihna loa lan kan tum miau chuan dawt sawi a ngai a, keimahni kan inbum reng mai a lo ni.

Thudik tak sawi chuan vawi khat sawi a tawk mai a, dawt sawi erawh chuan a hnu leh zelah pawh sawifiah chhoh reng a ngai an ti ṭhin. Chutiang bawkin, dik taka kan nun a, kan nih dan anga kan lan chhuah mai chuan ngaihtuah zui a ngai lo a, lem kan chan erawh chuan a hnu zelah lemchan kha chhunzawm zel a ngai a, rilru a hahdam dawn lo.

Kan nih danah lungawi ila, kan dinhmun dik tak anga kan lan ngam chuan mi dang rin hlawh pawh a awl zawk. Kan bum emaw kan tihte hian kan nihna hi an lo hre khiau zel tho a nia. Nihna anga lan mai khan mahni inrintawkna kan nei thei zawk a, hmasawnna tura min nawrtu pawh a ni thei zawk a ni.

Kan hausa vek lo a, kan nalh vek lo a, thil engkim kan hre vek hek lo. Rethei nih te, nalh vak lo nih te, hriat loh neih nihte hi zahah la loin, kan nihna leh dinhmun dik tak kha pawm mai ila. Hemi rual hian nihnaa lungawi tih vanga hma sawn tumna nei lo a, ṭhut thluan reng tur erawh a ni chuang lo. Kan nihna dik tak pawm chunga kan pen chhuah erawh a ngai. Mi dinhmuna nena inteh loin, mahni dinhmun aṭanga nitin hmasawn tum kha a pawimawh.

Kan rethei a nih pawhin kan retheihna zahpui loin, kan dinhmun chawikang tura kan beih a ngai tih hria ila. Engkim kan hre vek lo tih pawh pawmin, hriat belh leh hriatna zau zawk nei turin bei ila. Kan nihna leh dinhmunah kan chian a, kan zahpui loh chuan hma sawn kan tum ngei dawn. Chutiang ni lo a, kan nihna lo pui anga kan lan chuan lem kan chan reng a ngai dawn a,mahni kan inbum kumkhua mai dawn a ni.

- Lungen Mami