Gas Home Delivery

Mizoram sorkar chuan district khawpui tina LPG distributor/agent-te chu a theih chin chinah gas home delivery kalpui turin a ti a, mipui tan chuan gas la tura intlar buai ngai lo a nihna hi a lawmawm takzet.

Gas la tura intlar ngai hi chhung rual tan chuan harsatna a awm lo a, chhung tlem tan chuan buaithlak tak a ni. Sorkarin AMC huam chhung leh disrtict khawpui tina gas home delivery kalpui tura LPG distributor-te a hriattir angin a theih ang angin distributor-te chuan home delivery an kalpui ṭan mek ta.

Hetihrual hian hmasawnna tur ala tam khawp mai. Gas home delivery hi mipui tan zangkhaina leh awlsamna nimah se, mipuiin gas an mamawh huna an deliver theih loh thin avang leh agent-a lâk phal a nih tawh loh avangin home delivery hi a châng chuan buaina thlentu a ni zawk fo mai.

LPG home delivery tihdan chungchang sorkarin video tawi a tihchhuahah chuan gas home delivery tura book a nih aṭanga ni 4 chhunga distributor-ten an deliver hman loh chuan complaint thehluh theih a ni. Aizawl khawpuia veng ṭhenkhatah chuan kar 2/3 hnuah te an deliver a, thla 1 dawn ngah ngaite a awm.

Mizote hian complaint hi kan uar lem loa, mahse, gas neih loh chu chhungkaw buaina thlen thei thil a nih avangin uar hun a la awm thuai ang. Distributor-te hian complaint an dawn loh nan ṭan la se, a thlawna home delivery kalpui an nih loh avangin thawktu an indaih lo a nih pawhin lak belh mai se a ṭha hle ang.

- HriatHriati Pa, Aizawl