Hringnun khua a har leh ngei dawn

Hmanah chuan lenrual duhte nen,

Fak hla saa tlaikhua varin

Hlimni ral tur ui em em in,

Lal lopiang hlim ten kan lawm. 

tiin, tlang hrang hranga Kristiante hunpui Krismas lo thleng leh mai tur chu ur lawkin zan rei, Van boruak thiang kuk hnuaiah chuan khawi-maw lai laia am tak maia rawn zai vawn vawn leh turte chuan eng chen tak min menpui leh ang maw, mutsan a va har leh dawn em. 

Zan khawvawt hnuaia zai ri lunglen-thlak tak hriat tuma pawn lera han din lahin zanpar rim a lo nam chum chum 

ṭhin bawk nen. 

Krismas hun lo her chhuak tur boruak Chames eng emaw tak rawn keng tel 

ṭhin leh zanpar rim baka thlifim lo tleh heuh heuh ṭhinte chuan hringnunah hian suangtuahna, lunglen-thlak leh lungchhiat-thlak tak tak, chhung kim dar ang len lai nite min ngaih zualtir ṭhin. 

Hetih hun lai hi chuan mite leh mahni chhungkua a mite ngei pawhin min hmuh hlauva a ruka bianga mittui luang hruk chang pawh a rawn thlen fo ṭhin reng a ni. 

Mahse, Reilotea'n a ral leh dawn,

Hringnun khua a har leh ngei dawn, 

Nunhlui, kumhlui chang leh mai tur,

Entikah tawng leh ang i maw, 

Kan la ti leh dawn, Ni e, he hun lo thleng tur meuh hi chuan kum laihawla ṭhiante zinga hlim ve em em ṭhin te, chhungkaw hlim tak ni ṭhinte pawh hi kan hlim a rual tak tak thei tawh ṭhin lo. Lusunna avang leh khawtlang lunglen piah lamah pawh eizawnna avanga chhungkaw kima mas hmang thei lote bakah, nun khawlohna avanga sual bawiha tang mek kan chhungkaw zinga kan lo awm phei chuan chung thilte chuan  ngaihtuahna an va luah thuk ṭhin tehlul em... 

Kan pi leh puten an lo ti mathlawn lovin, thlasik ni chu a sa em a, a emna lam apiang a sa vin tuk ṭhin. Awmhmunah kan inher kan inher ṭhin ang hian, nun khawloh avanga sualbawiha tang mek, chhanchhuaktu nei lo, nun ning si, awmna apiang ning tawhte pawh hian nunthar neia Kohhranho leh YMA zinga rawn chen luh ve te hi an chak hun lai ber chu tun ang hun chho hi a ni si a. 

An tan hian nun hlimna tak tak hi a vang ṭhin... engtin heng hla te hi ngai ang maw? 

Lal chungnung, hmun chungnung 

bera cheng hnu Lal Isua,

Lei lalten amah do mah sela;

Kei ka tan erawh Lal duhawm ber

a ni si, 

Riangvai kan lawmna tur renga 

Lal lopiang hi. 

Kum tam tak chhung Krismas hun lo thlen dawn apianga chhung kim lai hun ngaia van ruai ruai ṭhinte hla sak nin theih loh, an thinlung zawng zawng luah ṭhintu : 

Leng zawng thinlai dam ten lawm 

kim tak ang maw, 

Rualduh kalta suihlung rualpuite 

zawng kha, 

Ngai mah ila, kohkir leh theih awm si lo, 

Rem Lal piang chuan thinlai hnem rawh. 

ti-a Pu C.Lalkhawliana'n a lo phuah hmang hian he kum 2019 Krismas lo thleng tur pual hian hlim taka mahni hmun ṭheuhva hmang turin duhsakna ka hlan vek a che u. 

- Lawta Khiangte