MIN HRETHIAMTU

Mal ngawih ngawiha inhriatna ka neih avangin mi zinga awm pawh nuam ka ti lo va, Keimah chauhin hmun fianrialah kalin chutah chuan ka ṭhu ngawi reng ringawt a, ka chunga thil theng chu ka ngaihtuah neuh neuh a, Eng vanga heti ang buaina leh harsatna namen lo tak hi, ka chunga lo thleng ta mai nge a nih le?, tiin, ka ngaihtuah a, Ka rilru chu sawrbingin hriat thiam hram hram ka'n tum ṭhin a, Nimahsela, ka hrethiam thei ngang lo a ni. Tunah chuan ka tan nun hian awmzia nei pawhin ka hre tawh lo va, ka thil tawn avang hian min hrethiamtu pawh an awmin ka hre hek lo, Chuvangin, thih hrehna reng reng pawh ka nei tawh lo a ni, Ka rilru ngaihtuahna leh ka khawhmuhte pawh a tawi tuk tawh mai a, ṭap turin ka lung pawh a chhe tawh hek lo, Khawvela nun thlakhlelhna reng reng ka nei tawh lo a ni. Tuma hriat loha ral riai riai hi ka chak em em a, Nimahsela, chuti ngawtin ka ral riai riai thei si lo va, Mahni intihhlum mai pawh ka pawiti tawh lo hial a ni, Khawvel eng hi hmu ngam tur pawh ni hian ka inhre tawh lo a, Men pawh meng ngam loin ka ṭhu kun reng ringawt tawh mai a. Khawvelah hian ka tan beisei a bo chiang nge mai. Tunah chuan ka kawng zawh tur chu a chiang tawh niin ka hria a ni.

Chutih lai tak chuan tu emaw rawn kal thawm ka hria a, a hmuh hmaa in saseng tumin ka tho uai a, kal mai ka tum lai chuan, ka tlai ta tlat mai, Ka banah min rawn vuanin, " I va khawhar awm ve," min rawn ti a, Khawhar lo ve, tih tumin khaw... ka ti hman chiah a, "Min chhang duh suh, ka hria che alawm, i thil tawn zawng zawng leh i phur ritzia hi ka hria a sin, I hrehawm tawrh hi a rapthlakin a namen lo em a ni, Engtin nge i phurh zawh le? I tuar chhel hle mai," tiin lainat hmel takin ka mita min en chungin a ti mial mial a, "Ka va lainat tak che em", a tithawp sat a. Kei chuan en pawh ka en ve ngam lo va, Nimahsela, min hriatthiam thu a sawi chuan min hneh hle ni tur a ni. Eng tik laiin nge ka kuah hman tih pawh ka hre lo, ka kuah chawt a, ka ṭap ta hlawp hlawp mai a.

A ni chuan, "Insum reng reng suh, ṭap bawrh bawrh rawh, ka hmusit miah lo che a nia", tiin min kuah let ve a. Hmusit miah lova min hrethiamtu bulah chuan lungchhe vankaiin ka ṭap ta hlawp hlawp mai a. A hma lawkin, ṭap tur pawhin ka lung pawh a che hek lo, ka lo tih kha, Tunah chuan, min hrethiamtu ka tawn meuh chuan lungchhe em emin ka ṭap ta hlawp hlawp mai a nih hi, a va mak em!. Zahthlak tihna pawh ka nei hek lo, mualpho hlauhna reng reng ka nei lo a, naupangin an nute kianga lungchhe taka an ṭap ang mai hian insumkarna nei miah loin amah kuah reng chuang chuan ka ṭap ta mai a nih chu. Eng rauin nge min man ta ni ang le?.

Ka awm dan mak tak mai hi ka hre thiam lo hle mai, Chutia ka ṭah hlawp hlawp hnu chuan, Thawk leh khatah ka phurrit zawng zawng a kiang ta duak mai a, Thih daih mai ka duh rum rumna rilrute kha, eng thliin nge rawn chhem kiang ta le?. Ka phur rit zawng zawng a tla nghal vek mai a ni. Lawm tak leh thlamuang takin min hrethiamtu chu kuahin ka thaw hle hle ta mai a, Rei lote chhungin ka thawveng ta vek mai a ni. Khawvelah hian min hrethiamtu tumah an awm lo va, keimah chauhin hrehawm takin ka awm emaw ka lo inti kha, Nimahsela, min hrethiamtu, ka phurrit min hriatpuitu an awm tih ka hriatna chuan, Ka thinlung thim tak chu lawmnain a rawn chhun eng ta vek mai a ni. A va mak tak em.

Tunah chuan ka tan dam man a awm leh ta, He ka phurrit tak hi phur chhuak turin chakna ka nei leh ta e. Ka tan tumruhna leh huaisennate chu an rawn kir leh ta a. Huaisen takin he dam chhung nunah hian ka kal zel tur a ni, ka ti rilru a, Keimah chauh inngaihtuah loin mi dangte pawh ngaihtuhin an hrehawmna leh an phurritte hrethiamtu nih chu ka tih tur a ni, ka theih ang angin mite tan malsawnna nih ka tum ve tawh ang, ti rilru chungin ka nui ta var var a.

- Hausanga Hauzel