Aizawla addict ho huangtau lutuk hi engtin nge kan tih ang?

Bazar ka kal apianga ka chawlhna ṭhin, Aizawl khawlai lûn leh langsar lai taka Vai restaurant hi addict ho hian an palzut ṭhin hle a. Tûk khat erawh kawngkaa ka chhuak tur chiah hi kan veng mi damdawi ti ve ṭhin tho hian, " Pa Kai, thingpui in man tur mi lo pe teh," a ti a. Kei chuan vîn takin, "Pawisa nawi ka nei lo," ka lo ti deuh ṭhak a. Ani chu zah hmel deuha a kal ta vang vang chu ka inthiamlo leh ta si a, hla deuh tak, Minister Pu F. Rodinglianate in a thleng ṭep tawh chu ring takin ka ko let a. "Nang chu i polite-in i fai thei bawk a, ka pe ang che. Mi dang hi chu ka haw teh a nia," tih pahin cheng 50 chu ka pe ta a.

Aizawl khawlai dunga addict bàl ṭawp lutuk ho zak miah lova an khawsa leh an ṭhu mu phengphung ṭhin te, an inchiu mawlh mawlh ṭhinte hi chu kan sawi hnem ta a, sawi nawn ngai tawh lovin kan hriat tlan vek a nih hi. Sawrkar leh mipui lam pawh hian hma lak dan tur ber hi kan la hre lo a nih hmel si a. Khung khawm bo mai hi a ṭha ber kei chuan ka la ti reng.

Khawlaia addict hoin pawisa mi dil chawt leh, dàwt nalh tak tak leh nál taka rang tak taka an sawi zar zar ṭhin hi hneawm ka ti a. Pek duh lohvin a thinrim zawkahte an la ṭang zui a. "Min pe lo tawp rawh," te hi an han titau vin ta ṭhin a. Cheng 10 pek phei chuan an thinrim zawk ṭhin nia maw le.

Ka sawi duh tak zawk chu, Inrinnia Aizawl bazar lun deuh deuh hoa addict ho lo inrawlh ve tam lutuk hi an ninawmin, vèn an ngai nasa a ni tih hi a ni. Bazar tawt luih luih karah hian an lo inzep ve zel a, thil kan lei laite hian kan bulah kan pawisa phawrh vel dan hi an lo thlir ru reng ṭhin a, pawisa min lo dil leh chawt ṭhin a ni. Rík luih luih kara fimkhur vak lova kan lo awm ṭhin chu hlauhthawn a na leh duh hnuhnawh ṭhin. A chang leh thil eng eng emaw min lo zawrh sek bawk thul. Ninawm leh venthawn reng ngai an ni. Bazar kal nu tam tak nen an inhau bawrh bawrh lai hi ka hmu fo mai.

Bawngkawna motor inpelh chungchanga silaia an inkah tuk chiah khan ka bazar a. Bazar pui lam aṭanga ka hawlam chu, ka tih ṭhin dan anga Tennis court lam, Horticulture office phei vela ka bazar final phei zel chuan mi pakhat ka hmu a. A awmdan vel ringhlel deuh chunga thui deuh hlek ka kal pelh hnu chuan, nu pakhat hian, "Kha pa khan ka mai a la ringawt a nia, lo man r'u," a rawn ti lauh lauh a. Kei ka inak bawr tawh si. Ka hnunglamah rawksai rit tak bakah, bazar bag dang ka la khai bawk si chuan, mi dangin an umpui em tiin ka hawi kual a, tu mah chu che chhuak duh an awm si lo va, ka theih tawk chuan ka umpui ta a. Rukru pa lah chuan chak deuha kal chungin, "Ka lei a nih hi," a ti phei vak vak a. Keiin, "I leina sawi rawh," tiin ka um phei zel a, a neitunuin a rawn um thlen ve chuan, ka lei a nih hi ti chung zel chuan a lo pe leh ta tho si a.

Ka letsan pah chuan ka rilruin, "Aw, kan ram hi chu sualna té deuh aṭanga lian tak thleng hian a va chiah hneh tawh tak em. A té deuhin an tisual té a, lian deuhin an tisual lian a, mi dik lo leh mi awm ṭha duh lote lah hian zah ahnekin mi pangngai leh khua leh tui ṭhate hi an nekchep zawk ta mah si a. Khua leh tui ṭhate hian kan hlau zawk ta a nih ber hi. Hei, tunah pawh a thil ruksak nu chuan mangang leh au chungin amah chauhin a um a, mi heti zozai zingah ṭanpui tura che chhuak duh awm miah lovin an en ṭhup ringawt a nih hi. Vairam kan va ang ta ve le. Kan inpawlhsawp ta lutuk hi a pawi a ni. Nizana Bawngkawna mi kaptu chanchin kan hriat belh lah chu, chuti bawk chu a lo ni leh si. Hmana Mizo nun leh hmana Mizoram kha a va ngaihawm ta em," ka ti rilru a. "Rit lutuk lo ila chuan a rukin lo zui phei zel ila, mi dang, thingtlang nu ho thil zawrh a ru lai thla lo la ila, police koh mai tur a nia. Vairam ang maiin mahni hlawkna tur ni lovah hi chuan mi manganna leh eng thilah mah inrawlh hi kan tum ta mang si lo va," ka ti rilru a. Mahse, ka rih em avang leh ka pelh thui deuh tawh avangin ka kir peih ta lo a ni. Chutiang chu Aizawl khawpui leh bazar hrang hranga thil awmdan chu a lo ni ta a nih hi.

Chuvangin, Aizawl khawpuia addict hnawksak lutuk ho veng tur leh vai tur bik police te hi awm thei se la. Chutiang chu kan tlin ngang lo a nih pawhin, Inrinni bazar ni chauh tal hi chuan, bazar lun deuh deuh hoah tal hi chuan mipuite hi sawrkar police-te hian min thlamuanin min venghim ve teh se.

- K. Hmingthankaia