Zing thawh hma hi
Zing takah tho la, ni chhuah hmain emaw, khawvar tirhin emaw tho la, tui vawtin sahbawn nen i hmai fai takin phih la, i tukverh hawng la, bathlarah chhuak la, han hawi vel teh. I hmai leh i bul vel te chu boruak nuam lutukin a rawn hmet ang a, chhuna kan tawn phak miah loh, chhun thlifim aia fim zawkin a rawn tuam ang che.
Thlasik lai a nih phei chuan chunglam en la, van borouak dumpawl ruih i hmu ang. Chhuah lam han thlir la, ni chhuak turin kawlkilah boruak a chhun sen phut ang. Ṭhla ral lam hun a nih phei chuan artui heng kehthem ang tak vanah a, var va va i hmu thei ang. Chutih hunah chuan pawnah chhuak vat la, i taksa sawizawi ṭan rawh le. Thawk han la la, i ke pen ṭan rawh. I thlen chin apiangah zing
varṭian thlifim, zing daifim kar aṭanga lo chhuak khan i taksa chu duat takin a lo tuam zel ang. Hei ngei hi doctor te damdawi chawh aia hlu zawk leh ṭha zawk, kan taksain a damchhuahpui tur chu a ni. I hriselna bul inṭanna tur pawh a ni.
I insawizawina chuan i taksa a la tiharh zo lo a, a tiharh tur che in thlifimin a rawn chhem heuh heuh ta che a, i hriat loh karah i nun a lo harh ta ṭhin a ni. Zing ni chhuak lum chuan zing boruak dai a rawn em bo a. Mahse, zing boruak i lo hip tawh khan chu mi ni chuan nilengin i hun nuam ti takin a hman tir thei ang che. Thil mak deuh chu thinghnahte chuan chhunah oxygen an pe chhuak a, chu chu mihringte leh nungchate hip tur a ni a, zanah erawh chuan thinghnate chuan carbon dioxide an pe chhuak thung. Mahse, khawvar tirhah engkim ruahmantu chuan mitkhap kar lovah boruak thianghlimah rawn chantirin a rawn tidanglam ta vek a ni. Hei hi khawvel scientist ropuite pawhin an chhut phak loh chu a ni.
Zan khawthim chhah takin a tuam lei chung boruak rit tak chu khawfing a chah zawhah reilote khua a thim laiin tihdanglam vekin a lo awm a. Engkim Siamtu chuan boruak thianghlim, zang leh dai nuam takah a chantir leh ta a ni. Tihdanglama a awmdan hi lei mihringte hriat phak rual a ni lo. Hetiang boruak hip thei turin zing takah ka tho ṭhin hi ka ngaihtuahin mi vannei ber ka lo ni. Ka nunna atan a va'n hlu em!
Tunlai khawvel tlai tawhah hian mihringte chuan chhunah leh zanah boruak ṭha oxygen kan taksain a mamawh khawp hip tur a hmu zo tawh lo a, he mi avang hian mihring nun a nguai a, a harhvang thei lo a, natna chi hrang hrang kan lo neih phah ta a ni. He mi laka kan inchhanchhuah theihna awmchhun chu zing takah tho i la, boruak ṭha hip i la, insawi-zawi i la a va ṭha dawn em!
Pathianin a hmangaihte tana a buatsaih he hun hlim-awm tak mai hmu pha ve turin tuna ṭang khan rilru lo siam la, bul lo ṭan ve rawh le.
- H. Neihchungnunga, Durtlang North