ZNP-in an chhep sual leh dawn em?
Tunlaia kan Party hruaitute zingah Pu Zorama a CM tawh a, Pu Lalhmangaiha chu a pa a CM tawh a, thusawi thiam leh lehlam han dah hniam thiam tak Pu Lalduhawma, ZNP President hi mi tam takin han enchhin ve hrim hrim an pawi ti lem lova, Policy nei ṭha bera insawi si hi engatinge an chheh fuh theih loh tih hi zawhna awm ve reng a ni.
Kum 2013 MLA thlan khan an vote belhkhawm chu vote singkua chuang a ni. Kum 2018 inthlanah chuan sorkar siamtu lama tel hrim hrim an tum ta a, an thiamawm hle. Tun hnaiah phei chuan Pu Duhawma hian ZNP tel lovin sorkar apiang dawn lo tiin ZNP mite chu an thlamuan a, thu dikah chang se anni te pawh an duh sakpui awm hle.
Tualṭo Party ni na na nain Congress bei loin Tualṭo Party ve tho, Opposition Party ni ve tho MNF deuh hlir an bei a. Congress thawhpui an rilruk avanga MNF hi beiah mi thil chik miten an ngai a. Thawk hoin sorkar siam dawn mah se tuman an dem lo ang.
Vawiina Politics boruak erawh chu a dang ta daih mai. Prime Minister Naren-dra Modi-an Rs. 500 leh 1000 note a han tihthih takah leh Swiss Bank-a tangka chheprelh ṭeuh anga lo tlang thang leh ta si hian Central lam leh State Politics-ah nasa takin Congress a vaw hniam ta tlat mai a. Tunlaia ni 7 vel chhung boruak dai ta dukah hian Central leh State-ah a ngui ber chu Congress an ni ta tlat mai.
Congress hian theihtawp chhuahin sorkar sum hmangin an thawh ṭhat puang zar chamchi mahse an hem a khawk ṭan ta tlat mai. ZNP member tam zawkte hian thawhho tur a nih rau rau chuan Tualṭo Party rilru an pu zawk ṭhin a. A hotupa ber a lo indai ping leh hman tawh si a, neutral-in Congress an ṭin san duak chuan Pu Duhawma hian thawhpui teh mah se a awi nung zovin a rinawm ta lo.
June ni 27 aṭang tawh khan Pu Duh-awma hian MNF a bei chho deuh ṭalh ṭalh a, MNF-in kum 5 chauh independent an sual, a ti thul. Pu Zorama palai hnathawk leh zel pawh insawi fiah rawh se an ti a, NEDA an zawm te pawh beih nan ZNP hian an hmang chho zel kha a ni a. Congress-in seat 10 vel hleh thei dawna inhriain sorkara tel ngei ngei inringin Congress thlak theitu tur MNF beng hniam kha an tum a ni a.
Kan rama party workers te hian ram leh kohhran awm dan turte hi ngun takin ngaihtuah a ṭha hle. Chung lamin ram a pek tlaka nun tum hlawm teh se.
- J. Lalchhuanliana (Vala)