THE BIBLE SAYS SO!

Hun hnuhnunga thil lo thleng tur fiah taka kan hriatthiam theihna tura thil pawimawh tak chu Mi Thianghlim Lâwr dik taka hriatthiam hi a ni. Rapture hriat dan dik lo hian Second Coming hriatthiam a tiharsa ṭhin.

Kan Bible min chhutsaktu BSI hian I-Thessalonika 4:13-18 hi a thu tlangpui atana Lalpa Lo Kal Lehna a ti a. Mi tam takin he khawvel hlui titawpa misualte rorelsak tur leh, A lalram thar (Math 19:28, Thup 20:4) din tura A lo kal (second coming) hun turah an ngaih phah ta a ni. Thupuan 19:11-16 a Lal Isua lo kal lehna nen a inmil ta hauh lo mai si. I Thess 4:13-17 leh Thup 19:11-16 te hi thu thuhmun an ni hauh si lo. Bible thupui an pek hi Paula te Johana dah a ni hauh lo va. AD 1228 khan bungin an ṭhen a. AD 1551 khan châng hi an dah leh a (Hardy Dictionary of the Bible). Bible ziaktu Paula-teho dah a nih loh chu! Pulpitah chuan chhiar tel loh a chi zawk e.

Chutiang deuh tho chuan Bible chhutute hian thupui inhmeh an tih apiang an dah chawp leh ta a. English Bible version hrang hrangte i neih chuan han thlir kual la, a inang lo nuai ang. Chuvangin thusawitu tan "A thupui chu chutiang khatiang" tia pulpit aṭanga sawi mai chi pawh a ni vak lo! Bible chhutute dah chawp mai a ni.

BSI hian NRSV, TEV et cetera iangin "Lalpa lo kal lehna" tiin a dah a. A dangte chuan "Kristaa thi tawhte" tih te, "Thawhlehna beiseina" tih te, "Ringtu thi tawhte tan" tih ngawt te, Bible (paraphrased) lehlin thar deuh mai The Message The Bible in Contemporary Language phei chuan "The Master's Coming" (Hotupa Lo kalna) a ti mai! Thu tlangpui an pek zinga Bible thu pawm tlat pawl evangelical mite chuan NIV Study Bible-In thupui a dah–The Revelation of the Translation of the Church (piangthar) Kohhrante thi lova vana lâk chhoh thu puanchhuahna tih hi a thu (contract, passage) nen a inhmeh bera ringtu vantlang zingah an tam ber ang.

Lal Isua chu van aṭangin A lo kal a (I Thess 4:16). Van boruak aṭangin Amah ringtute chu A la chho tih thu kan hmu. Lei A thlen thlak thu reng rêng a awm lo. Kan Lal Isua ngei khan "In tan hmun siamin ka kal dawn hi... ka lo kir leh ang a, ka hnênah ka la ang che u, ka awmnaah nangni pawh in awm theih nan" (Johana 14:3) A tih nen khan a inzawm thlap a ni.

Tichuan I Thess 4:13-18 thupui hi khawvela A lalram dina misualte hrem tura A rawn kal lehna (Second Coming) ni lovin Amah ringtute, Paula'n Pasal pakhat min lo hualsak (II Cor 11:2) Lal Isua Krista nena innei tura min rawn hruaina hun, A mo hruaina hun a ni zawk e. Johana leh Paula hi an thu a va han inhmu ṭha teh lul em!

Ṭhenkhat hian Second Coming nihtir tumin, Bible-a inziak hauh lo kha hman lai thawnthu chaw lutin Lal Isua khan ringtute kha leiah A chhuk thlakpui leh alâwm, tiin hman lai lalte indo hlawhtling; lo hawngte hmuaka an khawpui lama an hâwng mup mup ṭhin tia an sawi kha an changchawi ṭhin. Bible erawh chuan Lal Isua chu van aṭangin A lo chhuk a, Amah ringtute chu vânah A awmnaa awm turin A hruai chho tih fiah takin a ziak si! I Thess 4:17 leh Johana 14:3 te kha han en teh! Leia chhuk ni lovin vana chhoh a nih kha. Thessalonika ami hi A mo tur, piangtharte, A rawn lamna a ni a, Thup 19:11-16 hi Second Coming chu a ni zawk e.

- F. Lal Thanzuala

9436141242