AW KRISMAS!

Kum tina kan nghahhlelh ṭhin Kristian te’na kan ni hlimawm leh hun ropui Krismas chu kan hma lawkah a lo thleng leh mai dawn ta a. Mi tinte he hun atan hian kan inbuatsaih a, kawr thar leh thil thar neih tumin kan theih ang tawkin kan intuak a; mi tin mai hian hlimawm taka hman kan tum ṭheuh niin a lang. Mi tin mai hi mahni tawkah kan buai ṭheuh a, dawrkai, sumdawng, mimal, chhungkua leh khawtlang leh ram thlengin he hunpui lo thleng tur nghakhlel hian kan phi buai sup sup a ni ber.

Kum khata kan hunpui neih pawimawh leh hlu ber a ni a, ropui thei ang ber lawm hi a phu hrim hrim a ni. Chutih laiin nula tlangvalte'n hmanpui tur zawngin ṭan an lo la bawk a, nalh lo hlau reng rengin an intuaithar a; a khawvel thil taka lo inbuatsaih leh lo lawm tum hi a tam zawk chu kan nei ngei ang. A ṭhenin ruih chhum hmawk tumin an loin buatsaih bawk a, kohran, khawtlang thlengin kawn chei leh biak in hmunhma chei mawite nen. Chhung tinte lah hman nawm loh hlauvin an tu leh fate an lo inchahkhawm a, haw runpui a lo thleng leh dawn a ni. In leh a vel cheimawite nen, a van nuam ṭhin tak em! Ram ropui zawkahte phei hi chuan October thla aṭang hian masi hla nen an ri chuah chuah tawh a, keini pawh a ni ve ṭan a, November-ah phei chuan dawr hrang hrang leh veng hrangah masi hla play a ri chuah chuah ṭhin a nih hi.

Krismas ṭobul tlemin bengvar nan tarlang ang aw. Krismas tih chu Sap ṭawng chuan, 'Mass of Christ' tih a ni a, chumi awmzia chu 'Krista vanga puipun ni' tih a ni awm e. The Oxford Dictionary of Current English-in a tarlan dan chuan 'Krismas' tih chu 'Annual Festival of Christ’s birth, Celebrated on 25 December' tiin. Kum zabi 3-na vel khan Rome khua chuan December ni 25 hi Krismas ni atan an lo hmang ṭan a ni. AD 375 vel khan kohhran ho chuan December 25 ni hi Krismas holiday atan a puang. United States lam pawhin 1870 kum khan holiday atan an puang ve bawk a ni.

Krismas hi hman hun a inang lo va, pawm dan pawh a inang hek lo; sawi tur tam tak a awm rualin a pawimawh ber chu eng ni pawh ni se, kan Lal Isua'n min tlan tura he khawvela mihringa a lo pianna hun a nih avangin ringtute tan chuan a hlu em em a ni tih riat hi a pawimawh. Sawiselna, dodalna, ngaihdan inang lo tam tak karah leh Krismas avanga buainate chhuak a, inhnialna tam tak karah siamṭhatnate lo thleng chho zel a.

William Winstanly te, Charles Dicken te, Washington Irving te leh Clement Clearke Moore te hmangin Krismas chanchin rilru khawih tak tak ziah chhuah a rawn ni ta a. Ziaktu tam zawkten Krismas hman hi chhungkaw intawhkhawmna leh hlim tlanna ni pawimawh a nihna te, carol hlimawmzia leh Krismas thawnthu bul inṭan dan lamte an thlur bing laiin, Harriet Beecher chuan a lehkhabu, ‘The First Krismas in New England’ tih thupui hmanga a ziahah chuan, “Krismas awmzia tak tak hi shopping-naah kan theihnghilh zo tawh,” tihte a ziak tel a. Chutianga Krismas lam hawi lehkhabu ṭha tak tak aṭangte chuan America mipuite chuan Krismas hi an rawn hlut chho leh ta a. Kum 1870 khan President Ulyses-a chuan Krismas chu United States Federal holiday atan a puang ta nghe nghe a ni. Tunah phei chuan American 96% chuan zalen tak leh hlim takin Krismas hi an hmang a ni. Australia-ah phei chuan kum 2008 khan Guinness World Record break turin Krismas parade an buatsaih a, mipui nuai 3 chuang lai an tlingkhawm hmur mai a. Chu lo pawh, kum tin vawi khat an buatsaih ṭhin, 'Candle Light Night' tia an koh chu mass hmuah nan buatsaih a ni bawk a. Chhungkaw tinte'n bati keng/chhi eng fur chungin mualzawl pakhatah an chhuakkhawm a, Krismas hlate a huhova sain ram pum huapa zaithiamte'n Krismas hla mawi tak tak hmangin an awi a ni.

Tunlai khawvelah naupang pawhin, “Khi, khi, khi, Krismas putar!” tia an koh theih khawpa mi tinten kan hmelhriat Santa Claus hi German-American Cartoonist Thomas Nast-a chuan 1863 khan a lo siam chhuak a. A siam ṭan tirh aṭangin kum tin design a thlak ṭhin a, kum 1880 aṭangin tuna mi tinten kan hmelhriat masi putar design hi a lo siam chhuak ta a. Kum 1920 bawr chho aṭang khan khawvel hriatin a rawn lar chho a ni. Latin America leh khawvel ram tam takah chuan Santa hian thilpek a phurkhawm a, naupang ho a pe ṭhin a, chu chuan nausen Isua hnena thilpek hlanna a entir a ni. Krismas card hmasa ber chu kum 1844 ah DCT Dobson-an a thawn chhuak a. Kum 1853 khan sumdawn nan Sir Henry Cole-a leh JC Horsley-a ten mas card an siam hmasak ber chu USA ah zawrh chhuah ṭan a ni. Tunah chuan kan ramah chuan Krismas card hi kan uar ta lo hle a, mobile phone te a lo awm aṭang hian kan thlah ta deuh niin a lang. Card uar laia ṭhiante card thawn tur buaipui reng renga han khawsakte kha a nuam danglam ve hrim hrim a ni.

Mizote hian Krismas hi kum 1900 hnu lam aṭang khan kan hmang ṭan ve chauh a. Carol phei hi chu kum 1933 Krismas khan Rev. PD Sena huaihawtnain thalai rualin, “Chanchin lawmawm angel ho thu ngai r'u,” tih hla leh hla dangte sap hlain an sa a, Aizawl khawpui an fang a ni. Hei hi Mizo zinga carol hmasa ber a ni. Tunah chuan kan Krismas hman dan hi a danglam chak ta hle mai a, keini naupan ve lai nen pawh a inthlau ta hle.

A hman dan lam leh a neuh neuh chu kan sawi seng lo vang, nimahsela, a pawimawh ka tih deuh te hmangin a hnu han khar teh ang.

A pakhatnaah chuan

Vantirhkohten, “Chungnung berah Pathian ropui takin awm rawh se, lei chunga a lawm êm êm mihringte hnênah rem thu lêng rawh se,” an ti a. (Luka 2:14) an tih ang khan he hunpui hi kan rem theih tawh lohte nena inremna, chhungkaw inrem thei tawh lote inrem nan, nupa kara inrem lohna awmte inrem nan hmang thei ila a va hlawk dawn em! Miin min rem thei lo a lo nih pawhin keimahni lam tal hian ngaihdamna leh remna hi kan thinlungah pai ila, chhungkua inpumkhat lehna te, nupa inpumkhat lehna te lo thleng sup sup mai se la va nuam dawn ve le! He remna thu hi van miten min duhsak ber a ni si a.

A pahnihnaah chuan

Mi dangte tana malsawmna kan nih hun lo ni se la. Krismas hun hlimawm hmang ve thei lo khawpa nun beidawng leh chaute tana malsawmna thlentu ni thei ila. Krismas hmang ve thei lo khawpa chhiatna leh retheihnain a tuam mekte tana malsawmna ni thei ila. Mi dangte tana thilpek pek leh thil ṭha tih hian hlimna min pe ṭhin. Thufing pakhat chuan, “Mi chunga ngilneihna lantir hi kan pek chhuah theih zinga bo thei miah lo a ni a, a lo kir leh zel ṭhin,” a lo ti.

A pathumna leh a tlangkawm nan

Lal Isua kan tana a lo pianna hunpui kan hmanah hian kan thinlung a lamah i hawn ang u. Krismas tuk khat chu New York khawpui kawtthlera naupang khuang vawtu ṭawp ve tak hian, miin nau piang chibai an buk sup sup karah hian ran in lem leh Isua piang lem bulah mittui tla zawih zawih chungin, "Isu, thilpek hlu pek tur che ka nei ve lo, ka neih chhun hei hi ka hlan a che," tiin a khuang chu a vua a. A hmutu leh ngaithlatu mittui tla lo an awm lo an ti. He Krismas hunah hian thinlung hawn ila, ro thil dang a ngai tawh lo. Kan thinlung kan hawn a, ama lam kan hawi hi Lal Isua'n a duh ber a, chu chu he a lo pianna pawh hian a entir a ni.

He hunpui lo thleng turah hian i thinlung a lamah hawnin amah i hnaih ve dawn em le?

- Reuben Lalnunthara Hnamte