Mizoram sawrkar leh kuhva tawlhruk
Chanchin thar leh social media hrang hrangah Mamit District chhunga Hachhek bial huam chhungah kuhva chîngtute'n tun kumah kuhva rah an tharte cheng nuai 5,000 chuan man an hralh tawh thu ka lo hmu ve a, ka va lawmpui teh lul em.
Hun rei tawh tak aṭangin Myanmar ram aṭangin dan lovin kuhva an rawn tawlh a, chu chuan Mizoram chhunga kuhva chingtute dinhmun a phet chiang hle. Myanmar lam kuhva hi a tlawm miau avangin Mizorama kuhva chingtute'n an kuhva tharte an hralh thei lo va; a bik takin kuhva thar tam Hachhek bial leh Bilkhawthlir lamah chuan kuhva chingtute'n an tuar hle a ni.
Kut hnathawktu dangte ang bawkin kuhva chingtute hian rim takin hna an thawk a, kum 2/1 leka a rah seng nghal theih a nih loh avangin a hlâwkna têl turin kum eng emaw zat an nghah a ngai a. Chutah, an han thar a, an thawhrim rah aṭangin hlâwkna an hmu dawn chauh a, dan lova Myanmar aṭanga kuhva tawlhin an hlâwkna tur a tichhe leh ta si.
Mizorama kuhva rah chingtute an an khawngaihthlak tak zet a, an mangang a ni. An manganzia a lanna chu - Myanmar lam kuhva rah tawlhruk titawp tura hma an lak dan hi a ni. Kuhva rah tawlhruk tihtawp an duh tak zet avangin theihtawp an chhuah a, zan tam an tlaivar phah a. Mawi leh mawi lo pawh sawi thei lovin an che a, Zo nun mawi an ngaihtuah thei tawh lo. Kuhva rah tawlhruk an hmuhte chu an lo man a, a hnu lawkah a kâng zui a, kuhva chauh ni lovin, a phurhna motor nen lam a kâng ta mai ṭhin a nih kha.
Kuhva rah tawlhruk bakah, a phurhna motor nen lam a kâng ṭhin kha chu, a boruak a rit a, tharum thawhna lian zawk, kut inthlakna rapthlak, thihna hial a thleng chho mai ang tih ngaihtuah rum rum theih a ni a. Khatiang boruakah kha chuan Mizoram hi ram ralmuangah chhâl a har a ni. Khang zawng zawng kha kuhva rah tawlhruk mit siai-santu, hmu lo dertu, hre lo dertu MNF sawrkar laia thil thleng a ni.
Mahse, tunah erawh chuan thimnate'n zamual an liam zo ta! ZPM kaihhruai sawrkarin kuhva rah tawlhruk tihtawp tumin ṭan an han la tak tak a. Tunah hian la reh vek lo mah se, a thawm hriat tur a awm tawh meuh lo. A lawmawm tak zet a ni. Sawrkar hian ṭan a lak chhunzawm zel chuan a la tawp em em ang tih hi ka rin dan nghet tak a ni.
Chutih laiin, MNF ho kha la sawrkar zel ta se, eng ang taka nasain kuhva tawlhruk a hluar chhoh zel ang? Eng ang takin nge ram leh mipuiin kan tawrh ang? Kan ram hi 'smuggling' titute vanram a ni tak tak hial tawh ang em? Hengte hi ka inzâwt ve rauh rauh ṭhin.
Sawrkar hmalaknain rah ṭha a chhuah a, kuhva rah tawlhruk a rêm titih ta a. Chu chu Mizoramin a hlâwkpuina kan hmu nghal pang mai a, Mizorama kuhva chingtute'n man man takin an kuhva rah tharte an hralh leh thei ta. A va lawmawm teh lul em. Kuhva rah tawlhruk tihtawp tuma hma latu, theihtawp chhuahtute fakin awm rawh se!
- Lalduhmawia