TEMAMI PA THUKHAWCHANG: Small Hydel Project oursourcing chungchang

He chanchinbuah hian MPCC Political Affairs Committee Chairman Pu TT Zothansanga’n hydel project tenau outsource tum a nih dana sawrkar rinhlelh an kai thu a rawn ziak a, ka han tuihnih ve lawk teh ang.

Department lama ka thawh hun hnuhnung lamah khan Kundan Green Energy Pvt Ltd te nen online meeting Dt 5th September 2024, 1:00 PM, Engineer-in-Chief Conference Hall-a neih turin Superintending Engineer (Civil), Office of the Engineer-in-Chief, P&E chuan meeting a ko a, tel ve tura tih ka nih angin ka tel ve a. Kundan Green Energy Pvt Ltd hian Dt 27th January 2024 khan kan small hydel project (below 24MW, SHP kan ti zel tawh ang)-te chu an power generate theih chin tihsan dan ruahmanna an neih thu P&E Department (P&ED ti tawh mai ang)-ah an thlen rualin, Serlui-A SHP (hei hi SHP kan neih hmasak ber niin kum tam tak operate tawh loh a ni), Tuipang Lui SHP (sum tam tak senga Renovation & Modernization tih zawh hlim, la operate leh rih loh), Kau-Tlabung SHP (private hnena operation pek lai mek), Department kuta awm mek Serlui-B SHP, Maicham Phase-I SHP, Maicham Phase-II SHP, Tlawva SHP (August 2022-a hawn) leh Kawlbem SHP (December 2022-a hawn) leh private-in operation an tih lai mek Khawiva SHP te chu a hmunah tlawh phaksak dilna an siam a. P&ED lam pawhin lo remtihsakin 23rd February–7th March 2024 chhungin a hmunah an tlawh vek a ni.

Heng an tlawh zawh vek hnu hian 12th April 2024-ah heng SHP-Serlui-B (12 MW), Serlui-A (1 MW), Tuipanglui (1 MW tia an ziah,3 MW tur zawk), Kau-Tlabung (3 MW), Maicham Phase-I (2 MW) leh Maicham Phase-II (3 MW) te chu kum 40 chhung enkawl an duh thu P&ED hnenah an thlen a. Chumi hnu 13th May 2024-ah Khawiva SHP (1.05 MW) pawh tihchangtlun belha enkawl an duh thu an thlen leh a ni.

Dt 26th June 2024-ah thu dang nei lehin, hetiang hian SHP ṭhenkhat tihchangtlun tur leh state-a free power an pek tur zat an sawi leh a:

Hengte hi tuna an capacity/power an pek chhuah theih zat aia liana siamṭhat an tum a, hemi chungchang hi online meeting-ah chuan kan sawiho ta a. Heng power station-te hi uluk taka tui awm dan azir leh lui nihphung (river course) azira power an pek chhuah tam theih dan ber tura siam an ni a. Tui hi tihtam belh theih an ni lo a (ruah an sur tamtir dawn tihna a ni mahna?), lui luan dan pawh lo tidanglam mah se, tui an tihpun loh chuan power an pek chhuah zat hi tihpun theih loh a ni a. Engtiangin nge hmalak in tum tiin P&ED engineer-te chuan kan zawt a, chhanna mumal engmah an nei thei lo.

Serlui-B bik kan han khalh fâl a. Tuikuah hi sangha dil khuah anga earthen dam/lei chhûn muk hmanga siam a ni a, tihsan theih a ni tawh lo. Chu bakah, leiverh chhung aṭanga power pe chhuak tur khawl (turbine) tuikhuah aṭanga luang chuan khawh vir tura siam a ni a, leiverha tui luang chu power pek chhuah tihsan dawn chuan tuna luang ai hian a tam a ngaih bakah a luan chak a ngai a. Heti a nih chuan leiverh hi verh zauh belh a ngai a, tui luang tichak tur chuan tihâwih belh a ngai bawk a. Hetiang ti tur hian a theih loh bur chu ka ti ngam lo ang a, a hautak hle ang a, hun pawh a duh rei khawp ang.

Hetianga ruahmanna an neih dan min hrilh turin kan ngen a, sawi ngaihna an hre lo. Tin, a power pek chhuah hi titam thei ta pawh ni se, transformer thar leh lian zawk leh sub-station changkang zawk, power pek chhuahna tur pawh hrui ṭha leh lian zawk a ngai dawn a, heng hi engtianga tih nge an tum tih zawhna pawh chu an chhang thei lo bawk. Han zawh zau zel kan tum lai chuan, ‘Chhun chawlh a hun tawh a, kan ril te a ṭâm tawh, chhun chawlh hun kan lo hai tlat mai. Aizawl lamah kan lokal ang a, hmaichhanah kan sawiho dawn nia,’ an tih chu April 2025, ka service hun tawp thleng khan an lokal ka hre ve tawh lo.

Tin, heng a hnuaia project-te aṭanga free power min pek tum dan chu hetiang hi a ni:

Tichuan, meeting chu tihtawp niin, online meeting aṭanga department lam engineer-te’n kan thuthlukna chu:

1. Kundan te hian ground reality, kan lui dung leh ram hmelhmang dik tak, fûr leh ṭhála tui awm dan hi an hre fiah thiam lo si a, hmaichhana an technical expert-te nena sawiho leh a nih hma chuan engmah thuthlukna siampui theih an ni lo, a rang lama meeting neihpui leh vat ni se.

2. Kum 40 chhung hi a rei kan ti a, an hmalak chhoh dante thlir pah zelin a tam berah kum 5 chhung enthla ila, an chet ṭhat dan azirin extend leh zel ni se.

3. A tirah chuan an rawn sawi ang ang project-te hi pe vek loin, pahnih khat chauh enkawl se, pilot project atan pe ila, an performance azirin pek belh leh zawk ni se.

4. Kundan te hi Central Public Sector Undertaking an nih loh avangin anmahni hetia project pek ngawt hi dan kalh a nih avangin competitive bidding-a tih ni se.

Khing project enkawl an tum zinga pathumte kum tin senso leh hlawkna P&ED-in a têlte ti hian tarlang ila:

Serlui-B: Kum 2010-ah operate ṭan niin, cheng vbc 191.13 senga siam a ni. Kum 2014-2024 chhunga operation & maintenance (O&M) atana senso zat chu Rs 51,39,97,407 niin, a thawh chhuah zat chu Rs 1,29,53,98,000 a ni a, Rs 78,14,00,593 hlep neih a ni a, kum tin Rs 7,81,40,059 nei ang a ni a, a hlawk viau. Hei pawh hi khawl pathum tlan loin khawl pakhat chauh tlan chhung a tam zawk lehnghal a, khawl pahnih tlan zauh zauh chang a awm thung.

Maicham Phase-I: He project hi kum 1996-ah hawn niin, cheng vbc 13.41 senga siam a ni. A siamna man a thawh chhuahna a rei tawh, tun hnaiah Rs 4,08,00,000 vel senga cheiṭhat niin, generation ṭha tak a nei leh tawh. Kum 2014-2020 chhunga O&M atan senso chu Rs 3,52,17,787 niin, a thar chhuah man chu Rs 6,43,03,200 a ni a, Rs 2,90,85,413 hlêp chhuah a ni a, kum tin Rs 48,47,569 vel hlep ang a ni.

Maicham Phase-II: Hei hi kum 2009-a hawn niin, cheng vbc 27.31 senga siam a ni. Khawl pakhat hi 2008 khan a bearing a kan chhiat avangin, a siamna pawisa a awm thei mai si lo a, khawl pakhat chauh a tlan tlangpui. Hawn a nih leh kum 2018 chhunga a hlêp chhuah tur hi a hnuaia kum tin hlêp a neih aṭang hian kan chhut thiam awm e. Kum 2018-2024 chhunga O&M atana hman zat chu Rs 2,90,99,487 niin, a thar chhuah man chu Rs 6,31,71,900 a ni. Kum 6 chhunga a hlep neih zat chu Rs 3,40,72,413 a ni a, kum tin Rs 56,78,735 hlep ang a ni.

Mizoramin power leina atana pawisa tam tak kan sen tihniam theitu te, kum khata an hlep chhenfakawm takte engahmah ngai loa hetianga thehthang tum hi a mak viau mai! Thlipui leh ruahsur, vangvat leh those, vaihmite kara hah taka lo thawk ve tawhtu nih vena laiah phei chuan ngaihtuahna a vâk thui khawp mai.

A nihna takah chuan, heng project-te Kundan Green Energy Pvt Ltd hnena pek tumna hi a kal chak em em a, ka hnathawh laia ka project enkawlte an tel ve avangin works review meeting Power Minister hoa neih ṭum pawhin hetianga project thehthang mai loin, thuam ṭhatna tur pawisa ngaihtuaha hmalak ṭha ka tih thu ka sawi chiam nâin, ‘Kela, bê bê mah la, ka talh dawn tho che’ tih ang a ni a, tun hun hi a thleng ta a ni.

Han sawi belh zauh teh ang. Ministry hmasa lama Laipuitlang vai nupa pakhat, bungraw supply ṭhin, Ministry lama tlatlum tak, department engineer-te’n an bungraw supply kim loh chin vanga kan huat em em pawh tun Ministry-ah hian thlauhthlak kha a han ni zet nâ a, hun a han liam deuh a, tunah chuan an tlangnêl leh em em tawh mai a. Chhan leh vâng ṭha tak a awm a ni chêk ang tih hi rinzawn ve theih tak a ni.

Political party tin mai hian an membership fee aṭangin an intungnung thei lo a, eng emaw therhlo pe thei mai lakah hian an tláwm zel chu a nih hi. Inthlan dawnah supplier lian tak tak ho hian party hrang hrang uluk taka an thlithlai hnua sawrkar mai thei lakah thang an kam a, a per fuh chiah chuan ruling party pawh chuan lawmthu sawi nan an tih tur an ti leh chat zel mai zawng a nih hi.

Kan Kristianna dazât tak hre chiangtu ringlo mite lakah hian sum therhlo vangin kan ram hruaitute hi an tlawm zel dawn a nih chuan, Zoram hian engtik khawtikah mah khawvar hun hi a hmu dawn lo. Kohhrana rawngbawltu nih leh ram rorel hi a inhmeh viaua kan hriat lai hian, ‘sum’ hi chuan kan Pathian rawngbawlna hi chu a paihthla hneh zat zat zel chu a nih hi! A beidawnthlak khawp mai. 

- R.Lalrinkima, Hidden Lodge, Chanmari