TUIKUAL MUP-TE THENZAWLAH
Tuikual South Branch MUP member-te hian Aizawl tlâk lama hun hman kumtluan rik ngawt zel duh lovin, intihhlim nan hmun danga chhuahvah kan châk ve ṭhin a. Tichuan, Thenzawl hmun nuam tak, nakin lawka Peace City ni mai tur fan chu kan hotuen an rawt ta a. Kan bialtu MLA Pu Lalnghinglova Hmar (Pu Tetea), Tourism Minister ni bawk, zei leh rilru zau tak chu kan hotute’n an han bia a; rilru inhawng takin a lo dawngsawng a. Tuikual North MUP-te nen a huhova kal turin rem min lo ruatpui a, kan va lawm em!
Kal hun atan 20/11/2025 (Ningani) ruat a ni a. Member-te zingah kal duh in-report turin an ti a. A tirah chuan Tuikual South lamah mi 80 dâwn an in-report a, North lamah 60 dâwn an ni bawk. Kan Minister zahawm tak chuan kalna tur bus 5 min ruahmansak a, mahse, a hun takah chuan pha kan awm leh ta nual a; North lamah mi 34, South lamah mi 38 chu kan kal ta a ni. Sialsuka RK Hotel-ah a man pek ngai lovin puar takin kan han ei a. Kal zinga tam zawk hi minister zar la zo ngai lo, an thingpui no khat pawh la in ngai lo kan ni ang a, minister chaw leh thingpui khilai kan han kîl ve mai chu kan va han lawm em! A hmunah thingpui leh a hmeh tuihnai tak min lo hlui lehnghal a. Malsawmna hi kan kut a awm ni lo mah se, keini chuan mal kan van sawm nasa em!
Thenzawlah Golf Course kan fang a, Aizawl tlâk lama nilên ngawt ai chuan a ziazâng hle. Kan kum zat leh tu mawng bêng tawh kan nih theihnghilh ṭhakin kan zuang-lâm a. Thlalak pawh kan la dawh peih tlang hle. Thlalak dawn pawhin kan kut kan kâkin kan la awm eu peih hle mai. A hmun mawlh hi, a nuamin a thengthaw a, châm hlen hlauhawm tak a ni. Chumi hnuah Vety Dilpui kan en leh a, dîl chunga an lei dawh te chu a chim dawn lo tih hre mah ila, kan dîm hle hlawm. Chawlhbûk nuam tak takah kan châwl kual zel a. Mahni kum zat theihnghilh a, cowboy lukhum nen sakawr chunga chuang tâwk kan awm bawk. Vatâwk lawngah te kan chuang a, kham lo takin dar 2.30-ah kan hawsan ta a.
Kalkawng mawlh hi a ni hlimawm ni! Ṭhenkhatin kan bag ken lai bus aṭangin kan titla a, kan va chhar leh a. Ṭhenkhatin kan thingpui in lai kan dap baw bawk. Zun chhuak zing bik te, mahni bus chuanna ni lova lût tlat tâwk lah bo lo. Kan hotute’n, “MUP kan nih hi, inthlahrung reng reng suh u,” an ti thei zel a; a thlamuanthlak hle.
Kan bus khalhtute an thiam a, an hawihhâwm em em bawk. Khua vawt deuh vur nen, Krismas rim a lo nam tawh bawk nen, bus-ah kawng tluanin Mas hla kan play a. Bus bang bênga kan han zai vel chu kan minister hian kan hlim hmel hi min hmu ve se kan ti hle mai. Eden par mawi chul hnu tivul leh turin, tih kan han sa te chu, tlangsam a lo kuhmûm ṭan tawh nen, Japan-hlo parte pawh kan Tlangsam par hmuh zo vek tawh mai a, kan naupang ṭha leh a ni ber e.
Kawng lakah kan hotute’n bazar-na hun an han siam a, ṭhenkhatin chakai thau an zawng a, anhnah, kurtai, thei, fu tui leh thil dang dang, tu leh fate tana kum 60 leh kum 80 chung lamte kan han bazar chu nuam kan tiin kan va hmuhnawm bawk em! Pui tak kan ni. Hetianga kan pawisa neih chhun te te kan han hmang chhuak hi kawng sira dawr neitute tan pawh malsawmna a ni a. MUP member-te’n kan pawisa paipâwn mai mai tur hetianga kan han hmang chhuak pawh hi tourism-in a tum tak pawh a ni bawk. MUP vul zel rawh se!
- VL Hruaia, Tuikual S' Branch MUP. Ph–9436150028