Federation Enclave hi chhawr ṭanglai ila

Mizoram sawrkar hna-thawk inzawmkhawm pawl, Federation of Mizoram Govern-ment Employees & Workers (FMGE&W) leh Blue Mountain Construction Engineering & Services Pvt. Ltd. ṭang kawpin Luangmual veng chhunga sawrkar hnathawk, in leh lo nei lote chenna tura an ruahman Federation Enclave, Mizoram sawrkarin special project tia a puan bawk hi Chief Minister Pu Lalduhoma chuan February 19, 2025 khan a hawng a. Mizoram Government Employee Housing Society (MGEHS)/ Federation Enclave tih ni bawk hi CM-in a hawn aṭang hian hauh (book) tawh mi eng emaw zat awm tawh mah se, sawrkar hnathawkte hian an la hre tawk lo deuh niin a lang. Vantlang tana an zawrh chhuah hma hian sawrkar hnathawkte hian chhawr ṭangkai zel se a duhawm hle mai.

February 2026 aṭangin vantlang lei phalsak dawn

Federation Enclave hi Mizorama sawrkar hnathawk inzawmkhawm FMGE&W nawrna avanga sak a ni a, in leh lo nei lote tan in neihna kawng ṭha leh awlsam zawk niin a lang. Chenna 'flat' 300 tur sak mek niin, sawrkar hnathawkte tana ruahman deuh bik ni mah se, kum thar February 2026 aṭang chuan privatise a nih tawh dawn avangin vantlangah zawrh chhuah a ni tawh dawn. Special scheme a awm tawh dawn lo a, a man pawh a pung tawh dawn a, sawrkar hnathawk kher lo pawhin an hauh ve theih dawn avangin sawrkar hnathawk tan tun hi an tan hun ṭha a ni.

Mahni rama mahni in sak kher tumna phurrit siamtu

Mizopa rilruah chuan mahni inhmun ngeia mahni in sak a, chhungkuaa chen a lian hle. He ngaihdan hi ṭul tlata hriatna (emotional attachment) mai nia pawm an tam viau tawh. Mizoramah hian sawrkar hnathawk mi 50,000 vel an awm nia hriat a ni a, heng zinga 30,000 vel hi Aizawla cheng an ni a, an zinga 10,000 vel chauh mahni in leh loa khawsa an ni a, a bak chu mi in luah an ni.

Aizawl khawpui a tâwt zel a, Mizopain mahni ram ngeia mahni kutkawiha in sak rilrua a duhthusam hi pawm dan hautak leh phurrit tling a ni tawh tlat mai a. Ram man nasa takin a pung a, pawisa hlutna tlakhniam (inflation 5% yearly) vangin a sakna hmanrua lah a man a pung ve zel bawk. In pangngai leng tur ram chu Rs Nuai 50 te a ni tawh a, a sak manah Rs 150/200 hial sen a ngai tawh a, loan lak phei chuan dam chhunga leiba insiamna chi khat a nihna chen a awm tawh awm e. A chhawnga saka mi luahtir kan duh deuh kher a, mi luahtir man aṭanga senso hmuh let tum chhung (return on investment) hi chhût chian chuan rei tak a ni a, loan lak tam phei chuan a rulh hun chhung chu hnathawh theih chhung daih a ni thei a, a hlawk hlawl lo a ni.

Heng ngaihtuah hi chuan mi sak sa 'flat' (3BHK & 4 BHK) Rs nuai 60-72 vel senga lei mai a fuh tawh zawkin a lang a, EMI-in a buaipuitute hian an tihsak thei leh zel bawk. Apartment Act-ah hian hetiang real estate developer ten 'flat' an zawrh hi a awmna hmun ram chu 'flat' leituin a lei tel tawh a, LSC nena tihfel thlap tur a ni tawh zawk a. A ram kha a 'flat' leitu ta a ni hlen tawh zawk tiin a leitute a humhalh tlat a, Mizoramah pawh hman mek a ni. Fate tan pawh rochun chhawn theih zel a ni bawk a, a leituin a lei tawh chuan a duh angin a ti tawh mai dawn a, tam tak mamawh chhanna a ni thei mai em?

Chenna flat chauh lei a ni lo

Chhungkaw 300 awm theihna Federation Enclave-ah hian chenna 'flat' lei tawp a ni dawn lo a, ni tin khawsakhona atana thil pawimawh hrang hrang–car parking, darkar 24 chhung power supply pek, high speed lift, tui supply buaipui ngai lo, tuichhe sawngbawlna, naupang leh kum upa park hran ve ve, splash pool, restaurant, open gym, sumdawnna hmun, super market, community hall, ATM leh thil pawimawh dangte a keng tel dawn a. Electric, plumbing leh repair ngai enkawl zuitu tur an awm nghal bawk ang. Hetiang awm kim vekna hi Aizawl veng khatah hian a awm a rinawm loh. Federation Enclave hi peih a nih hunah chuan a chhehvel ṭhang zel mah se, hmun thengthaw nuam, mi chîm luih luih loh, hmun bik changkang tak a la ni ngei dawnin a lang.

A hmun a him em?

A hmun Luangmual leh a chhehvel hi geologist-te pawhin min hlauhawm loh, Aizawlah chuan hmun him pawla an ngaih a ni a. Kan ram han thlir ila, tlang ram leh hmun chhengchhe tak tak a tam hle mai a, hmun ṭhenkhatah chuan khâm pangahte kan bei vel mai mai a ni.

He project ṭhatna em em nia lang chu, in sak hna hi America rama architect ṭha hriat hlawh Prof. Christopher Benninger duan a ni. Structural consultancy hi National Institute of Technology (NIT) Mizoram ruahmannaa siam niin, a hmunhma a rem a, leilung che tur leh leimin lak aṭanga him tura hmun him a ni. Hei bakah hian mithiamteṭn a leilung an zir chianna aṭangin lirnghing leh khuarel chhiatna laka hmun him nia hriat a ni a, heng laka him thei ang ber tura sak a ni bawk. Mizoram sawrkar, General Administration Department pawhin May 29, 2025 khan hriattirna (circular) chhuahin, sawrkar hnathawkte chu a rang lama ngaihven/bengvar turin a ti a; February 2026 thla laihawl aṭangin public-ah zawrh chhuah a ni tawh dawn a ni.

Tlipna

Hetianga sawrkar hnathawk inzawmkhawm pawlte’n company rintlak tak hmanga in an din hi hman ṭangkai theih ni se a duhawm hle a, sawrkar hian a duhsak hle tih a lang. Federation Enclave hi sawrkar hnathawkte hian an lei/luah duh lo a nih chuan sawrkar hnathawk lo luah duh mi tam tak an awm ngeiin a rinawm a, chuvangin, sawrkar pawh hian mipui tan remchang siamsak rang thei se a duhawm hle.

- C. Lalhmachhuana