No Tolerance drive/checking hi a ṭha em?

Kum 2025 Krismas leh kumthar 2026 mi tinin dam leh him tlang taka kan hman theih nan Aizawl khawpui hmun hrang hrangah 1.12.2025 aṭangin Aizawl Traffic Police chuan lirthei kaihhnawih dan bawhchhiatna leh danin a phut lirthei document-te endikin 'No Tolerance Drive/Checking' a kalpui dawn a. Lirthei khalhtu/neitu zawng zawngte ṭha taka dan zâwm a, lo inhmakhua turin kan inngen e.

Exhaust (silencer) ri ring leh company-in a vuah sa ni lo, mi dang tana harsata siam khawpa êng headlight leh light dang hmangte endik a ni bawk ang,” tiin Nov. 18, 2025 khan Aizawl SP chuan a chhuah a. Hetianga uluk taka lirthei endik a ni ṭhin hi a ṭhain, lirthei neitu leh khalhtute leh mipui tan a him bik a, kan zavaia hlawk tlanna a ni.

Hetih lai hian zawhna pawimawh awm ve thei a awm. “Engvangin nge kum tin Krismas hun pui hlimawm tak leh January 1, kumthar hunpui hlimawm kan thlen dawn veleha inhriatthiamna tel lova lirthei leh a khalhtute fir taka endikna hi kalpui a nih ṭhin le?” Heng hunpuite hi hlim taka chhungkaw kim, ṭhianzaho, chhungkhat laina leh laichinte nena hun kan hman ṭhin leh nghakhlel taka kumpui lingleta kan nghah leh thlir ṭhin a ni a. Hetih lai kara inrîkrâpna leh râlṭi reng renga insiamna ni thei, inhriatthiamna/ngaihhnathiamna tel hauh lova inrîkrâpna lo kalpui ve ṭhin hi kan khawsakhona atan a fuh ber em?

Endikna nunrâwng kalpui ṭhin hi lirthei neitu/khalhtu dan zâwmtu leh fihlim tan chuan a hlauhawm loh va, dan zâwm lotu leh bawhchhia apiang tan phurrit tak a nih avangin, dan anga finfiah tlak lohte chu lirthei endik hun chhung zawng hian inkhalh chhuak lovin an tawmim deuh vek ṭhin niin a lang. Hei vang hian lirthei tam tawh dan ngaihtuahin lirthei mana pawisa chawitir an tlem thei hle a, lirthei chhuakvak a tlem duak a, traffic jam pawh a kiang duak ṭhin. Hei vang hian mi tam takin Krismas leh kumthar hunpui hlim taka an hman hleih theih loh phah thei tih sawrkar hian a ngaihtuahpui a ngai ta hle mai.

Sawrkar thuneitute hian ngaihhnathiamna tel lova lirthei leh lirthei khalhtute endikna hi kum tawp Krismas hunpui leh kumthar hunpui thlen dawnah chauh kalpui ṭhin lo hian, kum tir aṭanga kumtluanin endik ṭhin se. Lirthei leh lirthei khalhtute'n ngaiah an neih chuan kum tin hunpui pawimawh dawn apianga ngaihhnathiamna tel lova endik chiam a ngai tawh lo vang. Kum tir aṭanga uluk taka endik lova an khêk khawl avangin kum khat a vei meuh chuan lirthei neitute leh khalhtute an inthlahdah a, man tur an tam phah mai ṭhin niin a lang. Khek khawl awm hman miah lo turin kum tir aṭangin a bul ṭan ṭha se, a chanve zo tluk an ni mai dawn a ni.

Kumtluana tih a nih chuan chhiah pumpelh tum leh phakar chhuah tum tan pawh risk lak ngam a har ang a, sawrkar pawhin chhiah tam tham zawk a dawng kum tin thei zawk dawn. Lirthei neitute leh khalhtute tan pawh kum bul aṭanga dan an zawm thlap chuan document up to date chawp chûk chûk a ngai tawh lo vang a, kan zavai atan a hahdamthlak zawk dawn a ni.

Lirthei kaihhnawih sawi takah chuan kum khat danah late fee chawi ngai loa document leh a kaihhnawih tihfelna hun sorkar hmasain December thlaa a kalpui ṭhin angte khan tun kan sorkar hian a ti ve dawn lo nge, thingtlang lam tan chuan hetiang hun hi a nghahhlelhawm ve viau thei tlat. No Tolerance Drive/Checking hi neih ṭhin ngei chu a ṭha a, mahse, neih hun dika neih dan tur erawh sawrkar hian uluk taka ngaihtuahin ruahmanna siam tawh se a lawmawm ngawt ang.

- Dr. C. Lalrampana