Lehkhabu thlirna: 2026 Nilai leh Beihrual Thupui 'Mizo Kristian hlâte leh a phuahtute'

Kum 2026 chhunga Mizoram Presbyterian Kohhran Nilai leh Beihrual Thupui, 'Mizo Kristian hlâte leh a phuahtute', Rev. Lalfakzuala ziah hi tun ṭumah hian kan bêl chiang dawn a ni. Hetiang lam hawi hi Nilai leh Beihrual Thupuia kan la zir tam loh lam a ni a, a phûrawmin a hlu dawn hle a, zir a chakawm tawh hle.

A ziaktu chanchin tawi

Rev. Lalfakzuala hi Mzoram Synod pastor tawnhriat ngah tawh tak a ni a, tunah hian Vaivakawn Pastor Bial a vawng mek. Aizawl Theological College-ah hun rei tak zirtirtu hna a thawk tawh a, Thuthlung Hlui lama mithiam niin, kum 2016–2020 chhung khan keini pawh min zirtir ve hman a ni. United Theological College-ah pawh resgistrar a ni tawh a, North East India Christian Council/NEICC vice president, Presbyterian Church of India/PCI General Assembly Executive Committe member, Council of Churches in Mizoram (CCM) Executive Committee member leh Synod Mission Executive Member te a ni mek bawk. Thuthlung Hlui lam hawi lehkhabu pawh Mizo ṭawngin a tichhuak nual tawh a, chungte pawh chu a hluin a ṭangkai hle.

Lehkhabu pianhmang leh a chhung thu

Kum danga Nilai leh Beihrual Thupui bu ang bawkin he lehkhabu pawh hi pianhmang fel tak nei, a kâwm sen uk lam niin, phek 297-a chhah, Rs 120 man a ni a. January ni 7, 2026 aṭanga December ni 30, 2026 thlenga zir tur awmin, zirlai thupui 47 a awm. Beihrual Thupui zirlai 30 a awm bawk a, a vaiin zirlai 77 a awm a ni.

Zirlai 1-na aṭanga 4-na inkarah hian Pathian mite nuna hla pawimawhna leh Thuthlung Hlui lama Pathian fakna atana rimawi an hman ṭhin te, Thuthlung Thar lama hla an sak ṭhinte kan hmu a. Hla leh rimawi thiltihtheihnate pawh kan hmu bawk a. A ziaktu hi Bible zirmi a nihna hetah hian kan hmu chiang hle.

Zirlai 5-na aṭanga zirlai 8-na inkarah hian Mizo Kristian hla lo pian chhuah dan leh a ṭhan zel dan te, Mizo hla ziarâng leh Kristian Hla Bu kan neih ṭan dan te kan hmu a. Hei hi nakin zelah pawh kan la zir nawn fo tur leh Mizo Kristian hla chanchin/history atan pawha ro tling la ni tur khawp hlu a ni.

Zirlai 9-na aṭanga 15-na inkarah hian Zosapte hnen aṭanga Pathian fakna hla kan neih ṭan dan leh Rev. Chhuahkhama, Rev. Saiaithanga, Rev. Liangkhaia leh Upa Thanga te hnen aṭanga Pathian fakna hla kan neih ṭan dan ngaihnawm tak, tawi fel tak siin kan hmu leh a. Hei pawh hi keini ṭhangtharte tana zir tlak leh ngaihnawm tak a ni.

Zirlai 16-na aṭanga 18-na inkarah hian kan ṭawnga hla min lehlinsaktute chanchin kan zir leh dawn a. Rev. Taisêna, Rev. Bankuaia leh Rev. R. Dala ten Pathian hla kan sak tur min lehlinsak dante kan zir dawn a ni. Tin, pastor ni lo zinga kan mithiam hmasa Hrawva te, Zakûnga te, Laibâta leh Suakropuia te sûlhnu ropui tak tak kan hmu bawk a. Heng kan mi hmasate kuthnu kan hre chiang thei te hi a lawmawm hle.

Khasi lama kan unaute–Sahon Roy, Awmia (Omia) Nu, Rai Bhajur, Siniboni, Raja Singh Cornlay, Mohan Sigh, Simeon Ryanjah, Philip Roy leh Gilbert-a sûlhnu leh chanchin kan han hmu te hi he lehkhabu hlutna belhchhahtu a ni a. Hetianga an chanchin chiang taka kan hriat hnuah hi chuan an hla an sakte pawh a nuam zual sawtin a rinawm.

Zirlai 19-na aṭanga 35-na inkarah hian Mizo Kristian hmasate iráwm chhuak ngei hla leh a phuatute chanchin kan zir chho leh dawn a. Mizo Kristian hla thar lo pian chhuah dan te, Mizo Kristian hla phuah thiam hmasa Patea te rawn lang ṭanin, C.Z. Huala, R.L. Kâmlala, Saihnûna, Suakliana, Zasiama, L. Kâmlova, Siamliana, Râlngama, Laithangpuia te kan hmu a. Hmeichhe lamah Zumi, Thangvungi leh Lalruali te pawh kan hmu. Pastor Chhawna, Hleia leh Taivela te, Rev. Thangngura leh hlapui phuahtu Vanmawia chanchinte kan hmu bawk. Hengte hi a hluin kan hla phuah thiam hmasate chanchin awlsam taka kan hriat belh theihna tur lehkhabu hlu tak a ni.

Hlapui phuahtu dangte leh Rokunga hlate

He lehkhabuah hian Rokunga hlate leh hlapui phuahtu dangte chanchin kan zir dawn bawk a. H. Lâma, K. Papuia leh mi dang dangte chanchin kan hmu. Rokunga chanchin leh a hla thlirna te hi zir a chakawm tawh hle. Keini ṭhangthar zawkin kan hla phuahtu ropui chanchin kan han zir nawn leh turte hi kan vannei hle. Lalmâma, Liandâla, Thandanga leh Lalliansawma te chanchin leh an hla phuahte kan han zir thar leh turte hi a hlu tak zet a ni.

A tawp lamah hian Mizo Kristiante hlain kawvel a thlir dan te, vanram ngaih hla te, chhandamna leh Lal Isua Krista tuarna hla te, hun hnuhnung (eschatology) kan thlir dan leh kan suangtuah dan leh hla hmanga kan puan chhuah dan te kan zir dawn bawk a. A tawp lam zirlai pali-ah hian Mizo Kristian rimawi hmanrua leh kan hnam nun te, Krismas hla leh Mizo Kristian hla hma lam thlirna te kan zir dawn bawk.

Mizote hi zai ngaina tak hnam, kan awm khawm hlek tawh chuan zai zel ṭhin hnam kan ni a. Kum 2026 chhunga Pathian kan fakna hla chi hrang hrang leh a phuahtute chanchin kan han zir tur hi a lawmawm a; tui tak leh hlim takin Pathian kan fak leh zual thei ngei ang tih a rinawm. A ziaktu Rev. Lalfakzuala leh he zirlaibu zirtu zawng zawngte Pathianin malsawm rawh se.

- Rinfela Zadeng