EFCI pawisa chawi

Sakawrdaia EFCI Kohhran chu Krismas ni taka sorkar dan pawisa zo lova an inkhawm avang leh hla te an sak avangin sorkarin dan angin Rs 5000 an chawi tir tih kan lo hmu hlawm a. Mizoram mipuiin social media lama an sawi zui dan pawh ka lo hmuh ve danah chuan a inṭhen phawk a ni. 

Hlawm khat lian tak chuan EFCI Kohhran hi dan pal zuta an inkhawm luih avangin an dem a, hlawm khat lian tak dang chuan Covid-19 hri vei pawh awm lohna hmuna Pathian biak chak em avanga inkhawm pawh lo veh duk duka pawisa lo chawi tirtu sorkar hi an dem ve leh thung a, thlirna hi a inpersan khawp mai. 

Social media lama chai hlawh tak pakhat chu Chief Minister leh Sports Minister te Mamit District lama an chet dan ve thung kha a ni. December 10, 2020 khan Chief Minister Pu Zoramthanga chuan Kawrthah, Tuidam leh Mamit khawpuiah infiamna leh ṭhalaite hmasawnna ruhrel hrang hrang siamna atan lungphum a phum a, Sports Minister Pu Robert Romawia Royte a awm ve bawk. 

He tah hian sor­karin Covid-19 in kaihhruaina a siam mi 35 aia tam punkhawm phal loh chu nasa taka bawh chhiat a ni a, mi ṭhahnem tak an in ko khawm a ni. Hetianga CM ho meuha sorkar dan siam sa bawhchhiatna awm nia lang ta chu Pu Hriata Chhangte pawhin Mamit DC hnenah lehkha thawnin he thilah hian action la turin a ngen a ni. 

Biakin chhunga Pathian be tura inkhawm, Krismas a nih avanga inkhawm chu loh theih loha ngaia midang pawh tibuai lova biakina kal khawm a, biak in compound chhunga Pathian biak duh avanga kal khawm pawisa an chawi tir laia sorkar programme avanga koh khawm mipui pungkhawm zawk pawia chawi tir an nih si loh chuan Serchhip Biala MLA hektu lam MLA te kha an rawn chet chhuah leh vat a ngai a ni. 

Sorkarin dan a siam a, mahni eizawnna pawh thawk thei lovin mi tam tak an awm laiin thil lian tham hawng tur chuan an inko khawm hum hum a, mahse chu sorkar tho chuan Krismas tuk Pathian thuin a koh khawm zawk chu pawisa an chawi tir leh lawi si a nih chuan hriatthiam harsa thil tam tak a awm a ni. 

- V Lalrinmawia, Ramhlun North