THE BIBLE SAYS SO!

Hun hnuhnung hriat chianna step chu Rapture hriat fiah a ni kan ti ta a. Rapture hi Lal Isuan A zirtirte thlamuan nan fiah takin A sawi a (Johana 14:3). Paulan Lal Isua awka Johana 14:3 tlawhchhanin (I Thess 4:15) Rapture thu hi a sawi ve leh a (I Thess 4:16,17). Kan Lalpa leh vân chhawng thumnaa A lak chhohva hriatna namen lo A hriattir tawh Paulaten chiang taka an sawi hi tunge awih lo awm ang!?

Rapture a ni ta! Piangtharte vanah lâk chhoh an ni ta! Krista Nî-in a zui ang. Leiah Lalpa Nî a lo thleng thung ang, Sakawlh hun a inhawng ta! (II Thess 2:7,8). Tun ṭum hi chuan vanah Krista Nî chungchang kan rian rih ang. Hei hi ringtute lawmman dawng tlak leh tlak lo (cf.1Kor 3:13-15; 9:24-27) fiahna leh chatuana hlu leh lawmawm tur, an hman lai ṭawnga ‘crown’, (lallukhum) pekna leh chawimawina hun a ni ang (II Kor 5:10; Thup 22:12; Math 5:12). He hun hi Zoram ringtu tam berte hian kan hmuh hmaih tlat zu nia! Lal Isua leh Paula hian lawmman sem a nih hun tur hi an tuipuiin an sawi zing hle si! Van kan thleng anga hlim takin Lal Isua kan chawimawi hem hem mai ang kan ti mai hian a lang. Mahse a ni ringawt lo! Khawvela i awm laia Lal Isua rawng i bâwlna kha pho lana enfiah a ni dawn. I rawngbawlna rilru a dik loh chuan lawmman i dawng lovang a (I Kir 3:13-15) i tan hun zahthlak tak a ni ang Apostol Johanan a ti (cf.1 John 2:28; I Kor 9:24-27). Chuvangin kan rawngbawl dan ṭheuh hi i bih ngun ang u.

Krista Nî hi mi thenkhat hian an palzût deuh mai mai a. Lal Isua lo kal lehna nena thu inang niin an sawi leh mai thin. Second Coming-a bet ve ringawt a ni lo, a hrang a ni.Ni hrang hlak leh awmze hrang hlak nei a nia sin. Heng Bible changte hi han zir zau deuh la, lawmman pekna nî a ni tih pawh i hmu fiah mai ang."....kan Lalpa Isua Krista inlarna nghakin....ani chuan kan Lalpa Isua Krista "nî" ah chuan sawisêl bova in awm nan, a tawp thlengin a tinghet bawk ang che u" (I Kor 1:7,8) tih hian lawmman dawng tlaka hnathawh ṭhat a kawk nghal a nih hi. Chang dang la leh ila "mitin hnathawh chu a lang tawh ang.Nî chuan a tilang dawn si a, meia a inlâr dawn avangin,mei ngei chuan mitin hnathawh chu eng ang nge a nih a (ti)fiah tawh ang" (I Kor 3:13). Heta "Nî' tih hi saptawng Baibul-ah chuan “The Day of Christ" tih a ni (Today's English Version). Chumi awmzia chu, saptawng Grammar dan chuan,I Kor 1:8-a Paulan "nî" a sawi bawk kha a ni tihna a ni. Tihian a inziak "And the quality of each person's work will be seen when The Day of Christ exposes it. For on that Day fire will reveal its real quality" (TEV). Saptawng thiam tan chuan Krista Nî chu lawmman semna nî a ni dawn tih chu chiang hlein a lang.

"Nangmahnia thil ṭha ti ṭantu khan Isua Krista nî thlengin a tifamkim zel dawn"(Phil 1:6)."Isua Krista zara felna rah awm chuan lo khatin Krista nî atân chuan...". "... a thlawna thawkrim ka nih hek loh avangin Krista nî-ah chuan chhuan tur ka nei thei ang" (Phil 2:16).

Heng Baibul chang kan lak chhuah atangte hian Krista Nî hi ni hrang, thil tum hrang leh hun hranga lo thleng tur a ni tih a chiang a ni.I Kor 1:7,8; 3:10-15; II Kor 5:10 te hi vawng ang che.

- F Lal Thanzuala, 9436141242