PAULA KAWNG

Mihring hi kan lo piang chhuak a, tuma la zawh ngai loh kawng zawh turin mi nung kan lo ni ṭhin. Pathian hian hun inzat min pe vek a, chu hun hmang chuan kan zawh ngai loh kawng chu kan zawh ta ṭhin a ni a, tu nge zawh fuh ang le?

Philippi khaw mite hnena Paula’n, “Hnung lama thil awmte chu theihnghilh a, hma lama thil awmte chu banin…,” a tih hi a awmzia i han chhui chiang dawn teh ang.

Philippi 3:12 chho hi Paula’n ringtute min fuihna ropui tak a ni a, amah ngei entawn turin a rawn inchhawp chhuak a ni. Chang 12-naah hian hmu tawh reng inti a nih loh thu te, famkim a intih loh thu te, Kristain a man chhan chu man tuma a um thu min hrilh. Paula, Juda sakhaw hruaitu, Rom mi nihna neiin hetiang thu a sawi hi mak tih tham a tling a ni. A hun lai khan Rom mi nih kha chawimawina sang tak a ni a, a ni thei kha chu mi chungnung tak an ni ṭhin. Tin, a pianthar dan lah a chiang bik em em a; Pathian êngin a chhun avanga piangthar a nih kha.

Mahse, Paula hian hmu tawh a inti lo va, famkim tawh pawh a inti lo. Kristain a man chhan (Kristain ti tura a tih ang) chu tihlawhtling turin ni tin hun a hmang ṭhin a ni. Tunlaiah ringtu zingah inla hmu chiang fâl kan tam a, inla famkim pawh kan tam ta. Tlira pawl, Khuangtuaha pawl, Biakmawia pawl, Rorelliana pawl, adt. te hian dik famkim leh hmu famkim an inti vek, mahse, an kal sualzia chu sawi loha lum a ni. Kan rin danah hian eng nge kan ngaihdan ni a, eng hi nge kan sûkthlêk tih hi chîk a ngai khawp mai.

Chang 13-naah chuan, chu Krista man chhan chu mana a inngaih loh thu a rawn sawi a. Tin, a thil tih ṭhin pakhat a sawi bawk, chu chu ‘hnung lama thil awmte chu theihnghilh a, hma lama thil awmte chu ban’ a ni. He thu hi ringtu nun dan tur pawimawh berte zinga mi a ni. He chânga kan hmuh theih chu Paula chapo lohzia a ni; duh se la chuan hre ber leh hmu chiang berah a inchhuah thei, mahse a ti lo.

Mihring hi kan thil tih avanga chapo a, chapo lo mai, kan thil tih ṭhatte kan hriat reng avanga chapo mai kan ni. ‘Kei chu chu mi kha mi ka lei a, ka fapa/fanu chuan hna a nei tawh a sin, adt’ tia kan lo chapo ṭhinna hi kan thil lo tih tawh aṭangin a ni zel mai. Kan lo ti ṭha deuh a, mi hriat loh hlau lutuk tak maiin kan phi buai ṭhin. Chu chuan chapona tlangah min lâwntir a, kan thlarau lam nun ṭhanmawhbâwk a ni fo.

‘Hnung lama thil awmte chu theihnghilh a’ tih hian a huam zau hle. Kan thil lo tih ṭhat tawh zawng zawng leh kan tih sual zawng zawng theihnghilh vek tur a tihna a ni ber. Kum 2025 chhunga ni 365 zawng zawng hi tuma la hman ngai loh, tu mihring mahina an la dai ngai loh a ni. Kum 2024-a kan thil tih ṭhat tawh kha chhawm theih kan nei lo, a thar zela kan tih a ngai. ‘Hma lama thil awmte chu banin’ tih hian a rawn khaikhawm mawi khawp. Kan thil tih ṭhat tawhte chu theihnghilh a, kan hma lama kan tih ṭhat leh tur chu en zawk tura min chahna a ni.

Chang 14-naah hian, Krista Isuaa Pathian koh chhan lawmman hmu tura thiam chin lam a pan thu kan hmu leh. Paula hi a zin nasa hle tih chu Kristian hmasa a tihduhdah ṭhin thu aṭang leh a rawngbawlna aṭangin kan hmu thei. Heti hian i thlir pui teh ang. Derbe khua aṭanga Antiokei a panna kawng kha a thui hle a, Lustra a thlen khan han hawi kir se chu thui tak a kal ve tawh ngei mai. Mahse, a aia thui kal tur a la nei a, Ikonion khua paltlang a la ngai tih a hmu reng. Hetiang chiah hian ringtu nun pawh hi kan thlen chin hi thui hlein lo hre mah ila, dai tam ve tawh hlein lo inhre ṭhin mah ila, kan hma lamah hian thil tam takin min lo hmuak reng a, chu mi hunah chuan fiahna kan hmachhawn dawn a ni. Chutiang reng reng chuan ringtu nun hi a inlumlet vel a ni ber mai.

Chang 15-na leh 16-naah chuan puitling apiang chuan chutiang rilru chu pu se a duh a, thlen chin aṭanga hmasawn turin a duh bawk. A chunga kan sawi tak ang khian, Lustra khua kha nuam tiin châm hlen ta daih se, hma a sawn lo ang a, a tum ram Antiokei a thleng thei lo ang. Ringtu nun pawh hi a nuam kan tih china kan awm hian min tiṭhang thei lo. Tin, hmasawnna tur dang kan nei loa kan inhriatna hian min vaw chhe fo. ‘Ve tawk’ nia inhriatna hi ringtu tana tur chak tak a ni.

Chang 17-na hi a ropui khawp mai; Paula hian ringtute chu amah zirtu ni tur leh a mah entawn turin a duh a ni. Hetianga entawn tura a inchhawp chhuak ngam hian a rinna a dikzia leh amah pawh a rinnaa a chianzia a tilang. A sawi ang ngei hian Paula nun hi zir thar leh kan ngai ta khawp niin a lang ta.

Chang 18-na leh 19-naah hi chuan a kalsual ho chan tur a rawn sawi a. An hun kal tawh lama an thil tih ṭhat chhuanga chapopuite leh hmasawn lote chu kraws hmelma an ni a, an pathian chu an pumpui a nih thu leh an tawpna pawh thihna a ni tih min hrilh.

Chang 20-na leh 21-ah thung hi chuan ringtu, a mah zuia sual laka insûm thei mite chu van khua leh tui kan nih thu min hrilh a; a va ropui em, halleluiah! Khawvel suala tlu tawh chhandamna hna thawktu, kan lal leh kan Pathian Isua Krista lo kal lehna kan nghak mek a, a lo kal leh hunah chuan a ropuizia ang zelin amah chu kan hmu ang. Kan tlawm lai he kan lei taksa hi van taksa, natnate’n an tihbuai tawh loh tur leh thihna tuar tawh lo tur taksa chuan a thlak danglam tawh dawn a ni.

Chutiang chang tur chuan min duhsak em avangin a lawm 4:1-ah, “Chuvangin, ka unau duh tak leh ngaih tak, ka lawmman leh ka lallukhumte u, chutiang chuan Lalpaah ding nghet tlat rawh u, ka duh takte u,” tia a tawp a khar ni.

- K. Lalnunsanga