HRINGNUN HI–21

Vawikhat chu nawhchizuar damlo na tak hi ṭawngṭaisak tur hian min rawn ko a, thil chakawm tak chu a ni hauh lo nâin, kal loh ngawt chu a chi chiah bawk si loh avangin ka kal ta a. Room pakhatah hian an awmtir a, khuma mu rengin, a rimchhe ang reng hle bawk. Tichuan, common room-ah a nu te chuan an fanu chanchin tlangpui a sawi a, an enkawl theih loh thu te, nawhchizuar a nih tak thu te chu mittui tla chungin a sawi a; chumi hnuah chuan sahriak lain ṭawngṭaina kan va hmang ta a ni.

He nawhchizuar hi a chanchin ka hre zui thui lo hle nâin, thla khat vel hnuah chuan a boral thu kan hre ta mai a. Ka ngaihtuahna a kal thui hle. Nu leh pate thu a awih loh avangin a duh dan danin a awm a, zalen taka nun a hman avangin tunah chuan natna khirh tak a vei a, a tawpah chuan a nunnain a tawrh phah ta a ni. A natna chu tihdam mai theih loh a nih bakah, inthlahdah vanga natna awm a nih avangin kumkhuain a hming lam rik apianga a thih chhanah sawi a ni tawh dawn a, a chhung leh khat mai bakah a ṭhian ṭhate tan pawha inthlahrunawm tak tur a ni tawh dawn lehnghal a.

Mizoram hi Pathian lalna ram tiin Biak In pawh a tam narawh e. Aizawl khawpui hi thlir ila, in 30 dan lek lekah Biak In a awm emaw tih mai tur khawpin a tam a. Hmun ṭhenkhatah phei chuan an zing ṭawngṭai tur kalte hi kohhran te deuh khawmpui tham zet an ni bawk a. Chutiang a nih avang chuan kohhrana inhmang deuhte chu fel turah kan han ngai nghal ngawt bawk a nih hi.

Ṭum khat chu Facebook-a group pakhatah hian nula nalh tak tak hi Sunday dress nena an ding tlar hi tarlangin, an comment dan chi hrang hrangte chu ka ṭhiante’n min hrilh a. Chung nulate chu en mai chuan vantirhkoh ang hial tur thianghlim hmel an put tehlul nen chuan, an zinga pakhat chu sum duh vanga lo inzuar mai ṭhin a nih thu chiang deuh tak hian min hrilh a. Ka awih lo nâin, min hrilhtu chuan a sawi chiang ve fu bawk si a, ka ngaihtuahna a kal thui phah hle mai.

Pathianniah nalh taka incheiin biak bukah kan kal a, vantirhkoh thianghlimte zinga cheng tlak ang hiala mawi leh nalh kan nih hlawm laiin, kan thinlung lam erawh pulpit tlanga phawrh tlak loh khawpa tenawm kan ni hlawm bawk si! Sakhaw puithiam rual ho zing thleng thlenga a suak la awm leh zel te hi kan Zoram Kristiante hnufuamna leh kan ṭhan theih loh chhan bul ber a ni thei lawng maw tih te min ngaihtuahtir a. Necktie awrh chunga Bible zakzeh chin ngatte hi chu khawilai hmunah pawh hian thlah fal ngam ni ta hlawm tal ila chuan kan Aizawl khawpui hi a thianghlim sawt ngei hian ka ring ṭhin. Ka pawm theih ngai loh leh ka duh ngai loh te a takin a thleng tlat thin hian kan Zoram Kristianna hi ringlomite zinga rawngbawl tlak lo khawpa kan la awm ka hlau hlel lo e.

Tunlaia hla pakhat, a satu pawh ka hriat lem loh ‘Duh dan dana awm chu duh loh dana awmna’ tih thu hi a ho reuh viau nâin, a dik reuh fu si. He hla thu tawite hian a sawi thui viauin ka hre bawk a. A tira kan sawi tak nawhchizuar pawh kha a tir lamah chuan a duh dan danin a awm a, a tawpah a duh loh danin a chungah natna khirh tak a lo thleng ta a ni. Keimah ngei pawh hi ka duh dan danin awm ta ila, a tawpah chuan ka duh loh thil ka chungah a la rawn thleng ngei dawn tihte ka ngaihtuah phah a, he hla thu hi dik ka ti hle a ni.

He khawvel hi a nunrâwng a, a tenawm a, a bawlhhlawh em em bawk a ni tiin sawi ila. A lehlamah chutiang kara cheng kan nih avangin fimkhur a ngai a, zir tur a tam a, min chher puitlingtu tur thil a tam pawh ti ta ila a dik thei tho bawk ang. Chuvang chuan nang leh kei hi he khawvelah Pathianin enge min dah chhan tih hi, tu nge ka nih a, tu nge i nih tih lantir turin tiin chhang ila a dik thei tho ang.

Tu pawh mai hian incheina phêna an nungchang hi kan en ber zawk a ni a, an hmel fang aiin an ṭawngkam hi kan ngaih pawimawh zawk chu a ni fo. Nungchang hi silhfenin a hliahkhuh theih loh avang leh ṭawngkam hi hmelṭhatnain a chawh reh theih loh avangin nang leh kei hi mite’n hmaichhana min fak hluak laiin hnung lamah min lo sawi zui viau thei. A chhe lam leh a ṭha lo lama min sawinate chu keiin dawt mai mai tiin thiam takin leh thawchham loin hlam chen chen pawh sawi ila, tu pawh mai hian tuna kan awm dan aṭangin a dik leh dik loh chu ngawi rengin an lo teh ṭhin si avangin tuna kan awm dan hi kan uluk a ngai zawk a lo ni.

Khawvelah hian lemchang thiamte’n an duh dan danin lem an chang ṭhin a, chu an lemchan chu mi ṭhenkhat chuan tak tak emaw an lo ti hman ṭhin. Nimahsela, chu lemchan chuan rei a daih tak tak ngai loh avangin an nungchang dik tak chu he khawvel vek hian a rawn her chhuahpui leh hun a awm tho ṭhin si. Chuvang, chuan nang leh kei hian lemchan nun bansan a, nungchang dik taka ni tin hun kan hman hi âtthlak leh nuihzatthlak anga lan chang awm mahsela, chung lam malsawm zawng a nih mai bakah khawvel hian chawimawi hun a nei tho ṭhin a ni.

A tawpa rah seng tur nei ṭheuhte hian eng rah nge kan seng hlawm dawn le?

- Mahmuaka Chhakchhuak