KâWN CHEI

Kan ram, Kristian tamna ramah hian 'Kawn chei' hi i uar sauh sauh teh ang u khai.

Tun hmaa kan hnam kutni vangthla Mim kut, Pawl kut etc zawng zawngte thluthlain Krismasah kan insawr bing a, kan sakhaw hunpui a lo ni bawk nen, khawvel hriat thama ropui taka krismas hman hi Mizoram leh hnam hian a tih awm tak a ni. Kross lian ber neih tum ram kan nih tluk thova thil inhmeh a ni.

Hindu ho pawhin an sakhaw hunpuiah an hmun pawimawh Ratangarh Temple tlawh ngei tumin mi nuai tel an kal khawm kum tin a, mipui innek buai nasa lutuk vangin Sindh luiah mi an tla hlum ṭeuh ṭeuh va, an Maha Pushharaln hunah pawh an lui serh, Godavary luia inchiah tumin kum tin mi nuai telin an pan khawm a, an tla hlum ṭeuh ṭeuh va, an sim chuang lo.

Tin Islam sakhaw zuitute pawhin Saudi Arabia rama an sakhaw hmun Mecca tlawh tumin khawvel hmun hrang hrang aṭangin, sum tam tak sengin mi nuai tel kum tin an kal khawm a, heng sakhaw dang vuantute pun khawmnaah hian mipui innek buai vang te, tui tlate pawh an tam thei ṭhin hle. Mizoram ang chu ni se 'Khap tur' tiin kan chiar leh nuaih nuaih mai thei.

Mizoram sorkarin Kawn chei mawi lawmmnan a siam ṭhin pawh hi thil tih awm tak a ni. Ram pawn aṭanga khualzin (Tourist) kan neihte hi, Jan-Oct inkar chhung zawnga Mizoramin mikhual lo lut aiin Krismas vuakvet chhunga khualzin an tam zawk ṭhin. (Source: TFD)

Mizote krismas hman dan hian khawpui leh thingtlang a thliar lo va, mi hausa leh rethei karah ramri a kham lo va, pawl leh kohhran thlei bik a nei lo va, a ngaihlu thiam leh a hmang nuam thiam apiangten kan hmang nuam mai a ni. Kohhranten ruai kan han kilhote hi, inpumkhatna siamtu a ni a, theih phei se chuan kohhran bik awm lo hian a veng pum huapte hian ruai ṭheh ila, Pathian fakin lengkhawm mup mup ila a hlawkthlak lehzual te'n ka ring.

A chhan chu, hnam dangte'n kan Krismas hman dan an rawn hmu duh tihna. Chuvangin, mawi takin, thianghlim takin, Kristian ze dik tak tar lang siin Krismas hi i hlut deuh deuh ang u khai.

- Sangtea Khawlhring