CESJ-in an tih âwm tak an ti!

Aizawl khawpui chhunga Assam Rifles-in hmun an luah ṭhin an chhuahsan tak hman zui dan tur ngaihtuahtu atan sawrkar thuneitute'n Advisory Committee on AR Land an din a, Chief Minister hovin Minister te, sawrkar official te, political party-te leh tlawmngai pawl hrang hrang aiawhte an tel tih kan hre tlang awm e.

Advisory Committee-a tel tlawmngai pawl zingah enviroment humhalh lam buaipuitu pawl hrang hrang an tel a, chung zingah chuan Centre for Environment & Social Justice (CESJ) pawh an tel. Mahse, CESJ erawh chu Committee rorel dante an ngaihdan a nih loh avangin Advisory Committee aṭanga an inhnuhdawh thu November ni 28, 2025 khan press mite hmaah an puang chhuak a. An tih âwm tak an ti a ni, ka lo ti rilru.

"An tih awm tak an ti a ni," ka lo tih rilrûk dan hi sawifiah zui ta ila. An inhnûkdâwk hi Committee rorel dan a dik loh avanga a âwm ka tihpui lam a ni lo tih han sawi hmasa ila. An hruaitute rilru sûkthlêk ka ngaihtuahin, committee-ah mahni ngaihdan ang ni lova thu tihtluk a niha lungawi lo mai tur, titau mai tur, committee chhuahsan duh mai tur hmuha ka lo hmuh vang a ni a. Chuvang chuan, an inhnûkdâwk ta hi an tih âwm tak an ti a ni, ka ti a ni.

Committee-ah chuan member tam ber duh danin thu tihtluk a ni ṭhin a, hei hi pawl leh committee kalphung a ni. Pawl leh committee thutluknaah hian member-te an lungrual vek kher ngai lo a, thutlukna chu member-te duh dan a ni vek lem lo. Mahse, committee thutlukna a nih chuan pawm mai tur a ni a; committee thutlukna chu kan ngaihdan leh duh dan a nih loh avanga pawn lama sawisel tur a ni lo. Chutiang ni lo va, kan tel vena pawl/committee thutlukna kan sawisel zut zut emaw, kan tihtauh bûr bûr chuan mi puitling lo tak kan ni tihna a ni.

CESJ chungchang bik hi han sawi zui leh ila. An hruaitute rilru puthmang ka lo hmuh ve dan aṭangin, an duh dan anga thutlukna siam a nih loh chuan Advisory Committee aṭanga an bân duh mai ka lo ring sa ve hrim hrim a. Ka ring sual lo khawp mai.

AR chhuahdan tak hmuna awm tura tih hrang hrangah duh dan a inang vek lo. Chuvang chuan Advisory Committee thutlukna pawh member tin duhthusam a ni lo ang tih a rin theih. Committee rorel, thutlukna a nih erawh chuan member-te chuan pawm tlan mai tur a ni. Duh loh dana thutlukna siam a nih committee sawisel, tihtau leh chhuahsan tih vel hi chu mi puitling lo zia, mi sawngnáwi zia a ni.

Assam Rifles chhuahsan ram hman dan turah mi hrang hrangin duhthusam an nei a, chung duhthusamte chu a inang vek lo. Chuvang chuan, sawrkar leh pawl hrang hrang, Mizoram mipui aiawh zo tak turte telna Advisory Committee-in ngun taka an ngaihtuaha thutlukna an siam hi mipuiin kan pawm thiam a ṭul e.

- Zoramchhana