NOVEMBER 2025 THLAA INDIA GST KHAWN 4.6%-IN A PUNG; MIZORAM 41%-IN A TLAHNIAM
India ramin November 2025 thla chhunga Goods and Service Tax (GST) chhiah a khawn zat chu Rs 1,70,276 a ni a, October 2025 khawn zat Rs 1,95,936 crore aiin 25,660 crore-in a hniam. Nikum November 2024 thla khawn zat Rs 169 016 crore aiin 0.75% (1,260 crore)-in a tam zawk tih December 1, Thawhṭanni tlai lama Finance Ministry thuchhuah chuan a tarlang.
September 22, 2025 aṭanga GST rate tihhniam vang vang ni ngeia ngaih theih turin India ram state 20 chuan October 2024 chhunga an GST khawn zat an khawn phak lo a, October thlaah pawh state 19-in a phak tawh lo bawk. He tih lai hian state 14 erawh chuan hma sawnin, nikum November 2024 thla chhunga GST khawn zat an khum thung.
September 22, 2025 aṭangin GST chhiah thil chi hrang 375-ah tihhniam a ni a. In chhung bungrua leh khawsak relna chi hrang hrang aṭanga motor lam chi thlenga GST rate hi tih hniam leh thil ṭhenkhat phei chu chhiah lak lohna rate 0%-a tihhniam a ni.
India ram chhiah khawnna atan GST hman a nih July 2017 aṭangin COVID-19 hun chhung tih lohah chuan a hma kum (year on year) a khaikhinin GST khawn zat hian hma a sawn chho zel tih Finance Ministry thuchhuah aṭang hian a lang ṭhin.
Kum 2024 leh 2025 November thla bika India ram GST khawn zat khaikhinna (year on year) leh chhiah hmuhna ke hrangte hetiang hian thliar sin a ni (Rupees in crore):
Chhiah 2024 2025
CGST 34,141 34,161
SGST 43,047 42,522
IGST 91,828 92,210
Cess 12,950 4,006
Total 1,69,016 1,70,276
STATE-TE CHHIAH KHAWN
Nikum 2024 November thla khawn aṭanga teha kumin November 2025 thla chhunga state tinte GST khawn zat punna leh kiamna chu hetiang hi a ni. (State-wise Growth of GST Revenues during November 2025)
NE state-te khawn zat
November 2025 chhunga NE state-te GST khawn zat leh November 2024 nen khaikhinna hi Finance Ministry data-ah hian thla danga an tih ang ni loin GST khawn zat tarlan a ni lo a, a tamna/tlemna chauh tarlan a ni. Mizoram dinhmun bîk aṭang hian hetiang thil awm dan a ni. October 2024 GST khawn kha a hma kum october aiin vbc 18-in a pung a, kumin November khawn chu nikum November GST khawn aiin vbc 11-in a hniam zawk a, a hniamna hi 41% a ni.
NE state-te GST khawn 2024 leh 2025 khaikhinna chu hetiang hi a ni (rupees in crore):
State Oct ‘24 Oct ‘25 Punna/Kiamna%
Assam 503 518 +3
Sikkim 47 31 - 35
Meghalaya 44 49 +10
Tripura 40 39 - 2
Arunachal 31 41 +33
Manipur 18 20 +20
Nagaland 22 26 +24
Mizoram 18 11 - 41
Note: Nikum nen khaikhinna hi GST Council chhut chhuah sa a ni. Figure hi GST khawn zat ni loin, nikum nen khaikhina a punna/kiamna a ni.
Hei ve thung hi
Kumin Financial year 2025-26 thla 6 chhunga Mizoram GST khawnin nikum 2024-25-a khawn a phak lohna leh khumna chu hetiang hi a ni:
April 2025 (-) 28%
May 2025 (-) 26%
June 2025 (-) 29%
July 2025 (-) 21%
August 2025 +8%
September 2025 +12%
October 2025 (-) 3%
November 2025 (-) 41%
Nikum 2024-25 leh kumin 2025-26 April-October thla sarih chhung Mizoram GST khawn zat Union Finance Ministry data tarlan dan chu hetiang hi a ni.
Pre settlement:
2024-25 vbc 188
2025-26 vbc 145
Tlahniamna 23%
Post settlement
2024-25 vbc 633
2025-26 vbc 516
Tlakhniamna 3%
GST hmanga chhiah khawn kum 2017 aṭang daih tawha NE state dang small state nena khaikhina Mizoram GST chhiah khawn hniam fâl ṭhin hle a, Mizoram chhunga ropui nia kan inngaih ang ngawt hi kan chhiah khawn khawm zat hian kan ni lem lo tih a tarlang em?
Source: tutorial.gst.gov.in