THE BIBLE SAYS SO!

Mi Thianghlim Lâwr chu thil ropui tak pakhatin vanah a zui nghal ang, thil rapthlak tak pakhatin lei chungah a zui bawk ang kan tih tawh kha. Rapture chu Krista Nî-in a zui ang tiin I Kor 1:7,8 leh 3:10-15 kan la chhuak a. Lei chungah erawh chuan hun rapthlak tak Lalpa Nî-in a zui ang tiin II Thess 2:1-12 kan la chhuak a nih kha, a thlawptu Thupuan bung 6 aṭanga bung 19 thlengin.

Krista Nî chu i han thlir bing teh ang aw! Krista Nî hi mi ṭhenkhat hian Second Coming ah an neihtir ringawt fo va, a dik lo hle a ni. Krista Nî hian engtin nge Rapture chu a zui kan tih chuan I Kor 1:7,8 leh 3:12-15 kha kan bih chian a ngai. "Kan Lalpa Isua Krista inlarna nghakin" tih hi (v.7) bung 3:13-ah chuan rawngbawlna endikna lawmman pekna thuin a zawm tih i hre thei ang. Chu "Kan Lalpa Isua Krista inlarna" tih chu Second Coming-a A lo kalna ni lovin "A Mo turte Beramno Nupui Neihna hun atana buatsaih theih nana vana la chho tura (I Thess 4:17, catch up–Amplified Bible) boruak thlenga A lo chhukna thu a ni.

Korin Kohhran bik tana thu ṭûl a'n sawi hmasa tê tê a. Apolova leh amah chu khaikhina duh zawk nei lo tur leh Pathian rawngbawltute an ni a, Pathian duhzawng taka lawmman hmu thei khawpa thawk tur an nih thu a hrilh a. An rawngbawlna zawng zawngte chu Krista Nî-ah pho lan a ni vek dâwn tih sawiin Pathian pawmtlak leh lawmman dawng thei tura thawk turin a fuih ta a ni.

He fiahna rorelnaah hian a ṭha leh lawm tlak chin chauh ni lovin rawng bawl chhia leh lawmtlak lohte lam lamin tarlan vek tur a ni (I Kor 3:12-15; 2 Kor 5:10). Hemi zawh hian Krista Nî leh Rapture inzui dan a sawi ta a. I Kor 1:7,8-ah khan Krista inlarna chu Krista Nî a nih thu a sawi lang a. Thil dang eng emaw a sawi hnuah rawngbawlna enfiahna a sawi a, rawngbawlna chhia leh ṭha chu ‘Nî chuan’ a tilang dawn a ti (I Kor 3:13). Kan Mizo Baibul hian ‘Nî chuan’ a tih mai hi Today's English Version chuan the Day of Christ tiin a dah a ni. Hei hian kan Lalpa inlarna Krista Nî kha chang 13-a The Day of Christ tihna chiah a lo ni ta I Kor 1:7,8 leh 3:13 hian thil pakhat Krista Nî kha an lo sawi ve ve a ni. English Grammar dan chuan bung 1:7,8-a a sawi lan tawh sawi nawn leh a nih avangin definite article ‘the’ a hmang a ni. Chuvangin "the Day of Christ exposes it" tih hian The Day of Christ (I Kor 1:7,8) tih hi kan Bible-in “Nî chuan” a tih ringawt, TEV-in the Day of Christ (I Kor 3:13) a tih kha a ni a. Bung 1:7-a inlarna nî chu Rapture a ni a, the Day of Christ tia Paula'n a sawi, lawmman semna nî chuan a zui nghal a ni tih a fiah ta em em a ni

Krista inlarna (Rapture) a awm ang (I Kor 1:7), chu inlarna chu Second Coming ni lovin Krista Nî (I Kor 3:13), an ṭhat leh ṭhat loh enfiah hnua lawmman pekna Nî, Rapture zawha lo thleng Krista Nî chu a ni.

- F.Lal Thanzuala,  9436141242