LUNGLEI-AH STATE UNIVERSITY DAH A NIH CHUAN
Mizoram Chief Minister-in Mizoram State University (MzSU) chu Lungleia dah a nih tur thu a puang ta thut si a. Lungleiah dah ni ta se, a nghawng tur hrang hrangte i thlir lawk ang u hmiang.
1. Lunglei leh chhim lam mipui tan malsawmna nasa tak a ni ang
A ṭhatna lam han sawi hmasa ila. Lungleia MzSU dah a nih chuan Lunglei leh chhim lam zirlai, ram tana mi chenfakawm tak tak la ni tur, chhungkaw harsatna vanga Aizawl leh phai lama zir chhunzawm thei lote’n anmahni kawtkai ngeiah post graduate (MA leh a dangte) an zir thei ve tawh ang.
Professor leh mithiamte’n Lunglei khawpui an luah dawn a, university-a hotu lian te, officer leh staff tam takin an ṭhutchilh dawn. Lunglei tan chuan a hlu hle dawn a ni. MzSU Headquarters office leh campus din a ni ang a, clustered college turte thuam ṭhat a ni bawk ang a; nasa takin Lungleiin infrastructure lamah hma a sawn phah dawn a ni.
National/international seminar, symposium, workshop, etc. Lungleiah nghah a ni fo dawn a, state dang leh ram dang mithiamte’n Lunglei an tlawh zut tawh dawn. University hmingṭha tak a nih chhoh phei chuan state pawn lam aṭang pawhin zirlai a hip ang a, tourism thleng pawhin Lungleiin a hlawkpui ang a, chu chu Lunglei leh a chhehvel mipui tan a hlu dawn em em a, economy pawh nasa takin a ṭhan phah ang.
2. Sorkar inbuatsaihna a nghawng dan tur
The Mizoram State University Act, 2025-in Provision a pek angin Mizoram sorkar chu MzSU din turin a inbuatsaih a. MzSU Headquarters office tur tihfel a ni tawh. Clustered college tur hriattirna pawh Mizoram Higher & Technical Department chuan dt. 10.10.2025 khan Notification a chhuah tawh nghe nghe.
Lunglei lama MzSU dah a nih leh dawn tâk si-ah chuan heng inbuatsaihna awm tawh zawng zawng hi a bul aṭanga ngaihtuah ṭhat leh vek a ngai dawn a. Act pawh siamṭhat leh a ngai dawn bawk. Sorkar tan a luhaithlak hle dawn a ni.
3. Clustered system-in a nghawng tur
Lunglei lam Demand Committee-in Lungleia MzSU dinna tura clustered college-a hman theih nia an sawi ṭhenkhat hman chi a nih loh thu article hmasa lamah kan sawi tawh a. Lunglei khawpui chhunga sum sen belh lutuk ngai lova clustered college tana hman theih chu Lunglei Govt. College leh Mizoram Engineering College chauh a ni. Govt. J. Buana College campus thar erawh develop chawp ngai leh building sak chawp ngai a la ni.
Clustered college atan hian Govt. Hnahthial College, Govt. Siaha College, Govt. Lawngtlai College leh Govt. Kamalanagar College te sawi rik a ni a. Hengah hian school ṭhenkhat dah ni ta se, nasa takin administration a nghawng ang. Deans’ Committee leh Head of Department meeting vel koh a hautak viau ang.
Chu mai bakah, MzSU hian MZU a el chhoh a ngai dawn a. MZU hi NIRF leh IIRF ranking-ah te a sang tawh mai si a, infrastructure leh facility a nei changtlung tawh si. Hemi el pha thei tur hian zirtirtu ṭha, Mizoram chhung leh state pawn aṭang pawhin mithiam tak tak kan chawk luh a ngai dawn a, facilities ṭha neih a ngai bawk. Lunglei, Siaha, Lawngtlai, Hnahthial leh Chawngte tea awm duh tur mithiam kan hmu zo ang em? State dang aṭang leh foreign aṭangin heng hmunahte hian MA zir duh kan hmu zo ang em? University quality lo zet hi kan din palh ang em? Ngaihtuahna a tithui viau.
4. Under-graduate student enrolment leh zirtirtute dinhmun
Mizoram Higher & Technical Education data-a a lan danin, Lunglei leh Hnahthial district chin chhim lam zawngah college zirlai mi 2,433 an awm mek a, hmar lam zawngah zirlai 10,425 (PUC tel lovin) an awm mek. PUC zirlaite tel phei chuan hmar lamah zirlai 12,800 chuang an awm tihna a ni. Hmar lam college-a zirlai tam tak hi chhim lam mi an ni tih erawh kan hriat tel a ṭha ang. Chutih rualin, hmar lama zirlai rual hian MA zir turin Lunglei, Hnahthial, Lawngtlai, Siaha leh Chawngte te an va pan vang vang duh ang em? Tin, chhim lam zirlaite zingah ngei pawh MA zir tur chuan Aizawl leh phai lam àwn zawk an ṭhahnem viauin ka ring a. Post-graduate zir tur hmu zo mang lo hian MzSU hi kan va din hluai ve thei tlat. Chu chuan university quality leh a hma hun thui takin a hril dawn a ni.
Zirlai kaihnawih leh college kaihnawihah hmar lama zirlai tam zawk hian MzSU dawr dawn se, Lunglei an pan vek a ngai dawn a. University sports (inter college sports) leh university event hrang hrangah a tam zawkin a tlem zawk awmna an pan ziah a ngai dawn bawk. A buaithlak an ti ve viau ang.
Mizoram University hnuaiah hian affiliated college 39 a awm mek. Chung zinga pariat chu Lunglei leh Hnahthial district chin chhim lama awm a ni a, a dang 31 chu hmar lama awm vek a ni. Affiliated college tam zawk awmna hmunah MzSU Hqrs. dah lova a tlem zawk awmna hmuna dah daih chu a tam zawk hian ‘fair lo’ an ti ve viau mai thei.
Clustered college lo zawng constituent college an nih tawh dawn avangin Mizoram sorkar hnuaia college zawng zawngte state sorkar hnuaia awm tawh lovin MzSU hnuaiah an awm tawh dawn a. Zirtirtute leh non-teaching staff zawng zawng pawh MzSU hnuaia thawk an ni tawh dawn. An service chungchangah leh college pawipangah MzSU thuneitute dawr a ngaihin Lunglei lam an pan vek a ngai tawh dawn a ni.
5. A enkawlna senso a hautak dawn
Exam conduct, Central Evaluation System (exam paper checking), question setting, question moderation zawng zawng hi university hqrs.-ah tih vek a ngai a, chutah chuan university leh college zirtirtute an kal khawm a ngai ṭhin. Henga kal khawm tur tam zawk hi hmar lama awm an nih miau avangin an TA/DA a hautak dawn. MZU Finance Officer Prof. Vanlalchhawna sawi danin, MZU hian kum khata MZU leh a hnuaia affiliated college zawng zawng semester hnih exam a conduct-na-ah hian Rs. 4-5 crore vel a hmang. Chu chu zirlaite exam fee pekin a daih ṭawk ṭawk a ni. MzSU Hqrs. Lungleia a awm chuan chu ai chuan a senso a la sang fe tura ngaih a ni, zirtirtu tam zawk hmar lam aṭanga an zin phei ṭhin a ngaih dawn avangin. Zirlaite exam fee tihsan vak a ngaih phah mai thei. Chu chuan zirlaite tan phurrit a siam dawn a ni.
Zirtirtu laknaah te, Ph.D final presentation (viva voce)-ah te university dang daiha mi external expert an rawn ṭhut a ngai ṭhin. Chung zawng zawng senso chu MzSU tum vek tur a ni. Airport to Lunglei transportation hian a senso a tisang hle dawn tih hriat a ṭha. Chumi piah lamah an hun leh tha a hek dawn avangin an tan rawn kal a châkawm loh viau thei bawk.
University-ah hian committee leh body pawimawh tak tak a awm a. University Court, University Council, Academic Council, School Board eng emaw zat, Finance Committee, College Development Council leh thil dang dang a awm ṭeuh a. Heng body hrang hrangah hian member zingah dean te, college principal te, professor rual te, college hrang hrang aiawh zirtirtu te, state sorkar aiawh te, external member-te an awm. Meeting chi hrang hrang a tam em em a, chuta member-te TA/DA chu a hautak em em. Heng committee leh board member tam zawk hi hmar lama awm an ni ngei ngei dawn a; Lungleia MzSU Hqrs. dah a nih hian meeting senso a san phah viau dawn.
Eastern campus leh Western campus diltu an awm belh leh ta a; campus hran din hi a hautak lutuk, kan tlin lo. Nagaland University-in campus hrang hrang a neih thute kan sawi lang fo a, hma an sawn loh em khi.
Sawi tawh angina, national/international seminar, symposium, workshop, etc. Lungleiah nghah a ni fo dawn a. State dang leh ram dang mithiamte’n airport aṭanga hla tak Lunglei hi an rawn pan duh ang em?
NIT pawh Thenzawla awm tura tihfel vek tawh kha Ministry of Education lamin uluk taka an zirchian hnuah airport aṭanga a hlat lutuk avangin a hmunhma zim zawk Lengpuiah an sawn ta daih a nih kha.
Post-graduate course hlawhtling taka hawng tawh Govt. Aizawl College (MA Edn.), Govt. Hrangbana College (M.Com), Govt. Aizawl West College (MA History) leh IASE (M.Ed. bakah Ph.D thleng zir theih) te rual khan Lunglei Govt. College pawh PG course hawng tura tih an ni a; mahse, chhuanlam eng eng emaw avangin an hawng ve ta lo a nih kha. Lo hawng ve mai se chuan Lungleiah MA zirna a awm daih tawh tur a ni.
A tawp khâr nan
MzSU Hqrs. hi Lungleia dah a nih chuan chhim lam mipui tlemtein an ṭhatpui ang a, a state pum huap erawh chuan kan ṭhatpuina aiin kan ṭhatpui lohna lamin a bûk rit zawk. A enkawlna senso a hautak zawk dawn bakah mithiam tak tak chherchhuahna university quality sang tak kan din theih loh phah ang tih a hlauhawm.
Eng nge i ngaihdan ni ve le?
- James Ramdinmawia