LADC-ah sorkar ngelnghet piang tawh ngei rawh se

Lai Autonomous District Council (LADC) inthlan hma deuh khan LADC huam chhung khaw hrang hrang tlawha zin kualna hun ṭha ka nei hlauh a. Kan zin kual hun chhung kha a rei lutuk lo a, kan cham chhunga ka thil hmuh leh hriatte pawh hi a pawnlawi deuh em aw ti chungin, han thai lan ve hrim hrim ṭhaa hriatna ka nei tlat pek a nih hi.

Lawngtlai Vengpuiah hian kum 1995-96 kha ka pa hna avangin kan awm ve tawh a, a hnuah zin leh fo mah ila, Vengpui lam hi chu a hranpa taka tlawh leh a har hle tawh a. Tun ṭum kan zin chu hun thawl tak ka nei hlauh a, Lawngtlai Vengpui bakah veng hrang hrang tlawh kualna hun pawh ka nei hlauh bawk. Mi hrang hrang tlawh kual a, khaw hrang hrang kan fan hnua ka rilrua lo awm ta ber chu, LADC-ah hian sorkar ngelnghet, mipuite tana rin tlak leh hmasawnna keng tel theitu tur an mamawh tak zet tih hi a ni.

Ka ṭhian ṭha ka tlawh zinga mi pathum chu LADC hnuaiah a nghet lova hna sang vak lo thawk an ni hlawm a. Anni hian LADC inthlan boruaka an hlauh ber chu, ṭan lam neia mi hriata ṭawng chhuah a ni. A chhan chu LADC-ah sorkarna siam an awm hunah sorkarna siamtute’n anmahni ṭan lo nia an hriat chuan an hna aṭanga an bân leh mai an hlauh vang a ni. An thaw dêp dêp ni berin ka hria a; an lainatawm khawp mai. Under current tih an uar hle!

Lawngtlai khaw chhung leh a chhehvel bakah hian Lawngtlai leh Chawngte inkara khaw hrang hrang tam tak kan tlawh kual bawk a. Tun ṭuma ka zinpuite hi kum 20 MLA lo ni tawhte an ni nawk hlawm a, anni'n an tih tur an ti a, kei pawh journalist ka nih angina ka tih tur ka lo ti ve mai bawk a. Kan chawlh leh riahna khaw hrang hrangah mi hrang hrang ka lo kawm kual ve ṭhin. Ka mi kawm zawng zawng deuh thaw hian LADC-a sorkar ngelnghet neih an châk tawh thu te, chhungkua leh khawtlang hmasawnna awm hleithei lova an awm rei lutuk chu hrehawm an tih thu leh zahthlak an tih thu te min hrilh tam ber a ni.

Khaw ṭhenkhatah phei chuan an bialtu MDC chu inthlan dawna an khuaa campaign tura a kal tih loh chu a hmel an hmuh ngai tawh loh thu an lo sawi. Tun inthlan dawnah hian a hmel an hmu leh chauh niin an sawi bawk. Tak tak a ni thei dawn em ni, vote a rawn zawng leh a, in vote leh tho dawn tihna em ni, tiin ka zawt hial hlawm. Anni chuan, inthlan dawna pawisa a rawn sem hi a duh tawk viauah kan ngai tiin min chhang. Mak ka tiin, rapthlak ka ti khawp mai. In chhungkua leh khawtlang tana hmasawnna nasa zawk a thlen in duh chuan chutiang mi chu eng party candidate pawh ni se, lo vote tawh lo ngam u la, an pawisa pawh lo dawnsak lo ngam tawh rawh u, tiin ka chah ve mawlh mawlh ringawt a; an zawm ngei ka duhpui hle bawk.

Nghalimlui khuaa kan zinpuite’n public meeting an neih ṭuma hunserh hmangtu Upa Lalchungnunga thusawi kha ka bengah hian a la cham reng mai. A sawi ang diak diak chuan ka ziak thiam tawh lo mai thei, heti hian a sawi a: "Political party hrang hrangte hian bazara anṭam leh behlawi zawrh lai ang mai maiah min ngai tawh suh u, mipuite pawh Akana anga awhna suala kan tluk luh loh a hun tawh, thil eng emaw beiseia party hrang hrangte an rawn kal apianga kan inlawm lut kan inlawm lut pawh hi a hun tawh lo. Mahni awmna party-ah nghet takin i awm ngam ang u, chuti a nih loh chuan kan bial leh Lai ram hian engtikah mah hma kan sawn ngai lo vang," tiin. Thinlung leh tih tak zetin a sawi a, a ri kha a va mawi tak em.

Lai Autonomous District Council huam chhunga mipui zawng zawng deuh thaw hian sorkar ngelnghet neih an duh tawh tih chiang takin a lang reng a, political party hrang hrang leh an candidate-te pawhin sorkar ngelnghet siam an tum hlein a hriat theih bawk. Hetih mek laia MDC candidate nih duh vanga party awmna sawn pawh an la awm nual bawk. LADC-ah hian sorkar ngelnghet a awm hlei thei lo fo a nih chuan Lai fate tan chuan tawrh thiam a har hle tawhin ka ring. Kei chuan LADC-ah hian party mala sorkarna siam thei an awm emaw, an awm loh avanga ṭangrualin sorkarna an siam emaw a nih pawhin, sorkar namthlu tur zawnga hma la an awm a nih chuan, anni chu Lai fate'n kan do rawn a ngai tawh zawkin ka hria. LADC-ah sorkar ngelnghet piang ngei turin duhsakna ka hlan e.

- Joseph Lnta