Kawng siam season: Siam a hun hle

Kawng siam thla kan thleng e. Kum 39 kan lo hmang ta a; Brig. T Sailo a rorel hnuin MNF leh Congress-in heng hun hi an hmang liam a. Heng rorel hun chhung hian party mite’n contract an thawk nasa em em a, thawh chin tur a lian emaw, a te emaw, party mite inpein ṭhenkhat chuan an hralh leh a, hlep neiin hralh an tum leh a. Hetiang hi Ram hmelma lian tak a ni a. Tin, Corruption chi khat a ni bawk. A danah chuan Registered Contractor an awm a, an grade azirin hna lian leh te an thawk tur a ni. Mahse Party mi ten Registered Contractor hming an hawh ṭhin ni awm tak a ni. Sum nei lem lo leh Development work thawhna tur hmanrua (Modern assets, Earth Mover etc) nei miah lo pawn an thawk ve zel tho a. Hetiang hi vawiin ni thleng hian tih dan pakhat a ni. Party office lamah an intawllen mup mup ṭhin. Hetiang ti lo ngam Ministry hi kan la nei miah lo va, hetianga hna quality lo lutuk a zawh pawh zo hlei thei lo, contract thawh hun chhung rei lutuk hi mipuiin an tuar nasa em em a ni.

Tuna kan Sawrkar ZPM - Zoram People's Movement, a hming te chu mawi tak a ni. Heng te hian chuan han ti lo hram thei se. Tin Kan ram lal ber CM-in EIRUKNA a do tlat hi a ropui a, eirukna a awm vaih chuan an pir chhuak thuai ang. Kawng pawh an siam leh ta. Hna liante hi chu Standard Equipment nei leh Sum lama tlinte'n thawk hram se. Puk chawpa contract thawh hi ram chhiatna a ni.

Tuivamit Ramrikawn via Sihhmui Bazar - Lengpui Airport Road: He kawng Project hi hma a sawn lo hle. 'Airport panna kawng pakhat ringawt mai neih hi a fel lo ve’ tiin Ministry tin hian an sawi liam liam a. Vaivakawn Company peng lei tla hniam hi leichhungril lam aṭanga rawn che a nih avangin mihring chakna a siam ṭhat mai chi a ni lo. He kawng hi a laih tlang hi Ministry hmasaah khan an lai tlang vek tawh a. Surface siam rual Culvert siam ngai te etc. ZPM Ministry hian an tipuitling mai dawn emaw tih lain chhunzawm a awm thei lo. Lengpui Airport kawng pawh a hnai sawt dawn a, mipui zin tur tan thlamuang taka tlanna tur a ni. Han tipuitling thuai se, kawng thar hlak kan nei ang a, an thil tih ṭhat a lansarh dawn nen.

Kumin Fur laia Lengpui kawng khâm sanga lung a tlak khan phai lam aṭanga kan zin haw Buichali kawngah kan haw a, Buichali leh Sairang inkar kawng chhe lutukah khan Central Minister lo zin sek ho kha an tlan ve lo thei si lo va, kan kawng zahthlakzia kha. Anni chuan Special-a enkawlna dawng kan nih dan – DONER, NLCPR, NEC, tih ang rengte chu an beng angin an hre chiang si a. Inti-Christian viau mah ila, kan rinawm leh rinawm loh chu an mit ngeiin an rawn hmu ta ṭhin a ni.

Setlak Lui Aizawl Greater Water Supply Scheme Phase 3 : Kum 2018 aṭang khan he project Pipe line lian an phum aṭang khan, Tuivamit Ramrikawn leh Luangmual Industry peng Trijunction inkar hi ṭhat ni a la nei lo va. Km 1 vel awrh hi. Police Training Centre, Sahuan (Zoo), Sakawrtuichhun, Luangmual Industry, Central Jail veng te chuan, Kum 2018 vel aṭang khan kawng ṭha an nei ngai tawh lo va. Khua a chhiat leh a diak em em a, khua a ṭhat leh a khu em em a. Eng ngati nge an siam ve ngai loh? tia zawhna chu - Highway Construction kal mek an ti a, under construction an ti zel a ni. Tunah pawh he pipe line hian Zohnuai lei chein a tih chhiat avangin Diversion siamin University-a kal ṭhin leh he lam mipui hi harsatna a siam leh a, Kawng block a tam em em a ni. "Sawrkar thu neitute chuan 'Under Construction a ni a,' an ti zel a,” tiin Local Council te chuan an sawi a, Municipal Area hetianga kawng chungchang Sawrkarin a hlamchhiah hi chu Mipui hian an tuar rei ta ngar ngar ngawt mai.

Chutih lai in Mipui tam tak eizawng Office kal, Industry products leh supply phurte, Aizawl Hospital mamawh Oxygen supply phur te, thil dang Industry products phurin an tlan reng a. Highway construction hi sawrkar hian chhuanlamah hmang tawh lo se la. Ni tin mipui eizawng leh hnathawk hi ngaipawimawh ve zawk teh se. Highway Construction chhuanlam a, kawng zauhna tur mimal ram compensation pawh pe zo thei chuang bawk si lo, mipui chenna area metal-sak loh ringawt hi Municipal area nih ve siah chuan a hrehawm khawp mai. In thar sa dawn ila, Tax lakna tur lamah chuan 'Under construction a nia' an ti lo. Municipal lam thlengin an rawn strict fu bawk si a. Thil ngeiawm tak a tling thei a ni.

Sairang to Vairengte Highway: Kumin chu Highway kawng chhe rual ṭhup mai kha kan tuarin kan buai phah hle mai. Kha'ng kawngpui siam lai hun vela Mizoram Govt. hnuaia Monitoring Unit-a awm ngeiten an sawi dan chuan, “Vai Company (Sadh Guru) Contract kha kan ngam lo va, kawng siam dante chu a inthuah chhawn dan (a layer) a awm vek a. Ti ṭha tura kan report in, Kan hotute Govt. lam khan pawi a ti tlat lo va. Company kha kan monitor phak lo a ni,” an ti.

Sairang leh Kawnpui inkar mai te kha han sawi ila. An siam zawh hlim chuan a zauin a mam nuam viau a, tlan pawh a nuam. Mahse Betumen kha Emerson hlang nge a nih a, Fur ruah tuiin a chiah zawp rang hle a. Tin, Seal coat. Loh a nih hmel a. Betumen ṭha, Viscocity grade (VG) sang tak chu an hmang lo hrim hrim. Tunlai hian, kawng siamtute hian kawng awlsam an zawng hle. A chhe hma a, tui ngam lo Betumen dal hman hi kawng lah hi a khuar bing in, a thuk kak zel a, motor kein a dai fuh palh chuan shock obsorber a sawi bawih thei zu nia.

BOULDER Phah loh : Sairang leh Kawnpui inkar kawng a dai kawi hnu khan a siamtute tihduhdahzia a rawn lang ta a. Kawng a dai kawi theihna chhan chu Boulder Mizo Lungthu tiat leh a aia lian kha an lo phah lo reng reng a, a ṭang thei lo va, a kawi ta vek mai a ni. A siamtu Company leh A monitoring tu Department leh a sawrkar kha an mualpho hle. A zahthlakin riruk vang a ni leh bawk. Mipui zingah kawng veitute chuan an hmu tlang vek a. Sawrkar thar tan khan han siam ṭhat sen rual a ni lo. Kuttum tiat, luidung ṭiau mum inkamki thei miah lo kha an metal hnan ta ringawt a. An Betumen hman lah hi a dal em em a, tui a ngam lo a, a dur/ṭhil rual ta ṭhup mai a ni. A ṭha chin (standard) chu VG (viscocity grade) sang deuh chu hmang se, kum 3 talte chu daih tur a ni. Mahse Mizorama an hman hi tuiin a chiah zawp duak theih avangin tui hi a ngam lo em em hian a dal hle tih a lang reng. Tui furin a'n chiah a, side drain ah tui a kal vek ṭhin lo pawh hi pawi tak a ni. Full load-in a'n dai a, a VG grade a chhiat em avangin a dup a, a dai kawi ta vek ṭhin a ni. A hnuaiah Boulder a lo awm bawk si lo va, mipui hian thil ti ṭha lo tute chu kan hre kar tur a ni. Thil dik lo titute hi kan chhinchhiah ṭhin loh avangin hlemhletna a zual ṭhin a ni. (Jacob 4:17. Miin thil thra tih tur hria ti lo chu (a tan) misual a ni.)

Heng thil ṭha lo titute avang hian mipui sang tam takin harsatna kan tawk a, kan buai a, sum leh pai kan hloh nasa tih hi kan hre tur a ni. A bul ngaihtuah peih tak tak si lovin sawrkar lai kan dem phah a, sawrkar thar tan khan Season khata siam ṭhat vek sen pawh a ni lo. Tunlai Alkatra Betumen hi UT hun lai vela kan hman ai khan a tui sa si, a chhe fe zawk a. Emersion an ti. Siam tuiril a ni a, a VG grade a chhia a, a hre chiangte sawi dan chuan UT laia Alkatra Tlang thei Chhuan vak ngai kha a tlo ber a. A man a tlawm zawk bawk a. Tuiin a chiah tlang ve thei lo a ni.

Side Drain : Mizoramah Ruah tui a tam a. Kawng siam hi Tuihawk kawngbo, kawnglaia a luan loh nan Side drain hi siam hmasak phawt a, kawng surface level dik taka siam leh ni ṭhin se, a ṭha hle ang. Side drain aiin kawng surface a hniam ṭhin a. Pawisa tam tak sengin kawng kan siam a, kawngthar siam leh dawnin siam zawh thar lo chhe leh thuai ṭhin hi kan inhnangfak theih lohna chhan a ni. A pawi hle mai.

- C. Vanlal Ruai. 9862569310