Party tin buaina inthlan/insiam rem

MNF party meuhin an party Vice President an han mai par thlawn tir thut mai chu sawi zui a hlawhin an la sawi zui dawn chauh a. MLA inthlan leh dawnah phei chuan sawi zui mai ni lovin umzui pawh a hlawh a rinawm. Congress Vice President chhuak ta ang deuh khan a sawh khawk a awm pawh a rinawm. 

Pu R Tlanghming­thanga chanchin hi an sawi dan khan Hnam Run lamah office nghak turin MLA candidate nih aiah a in sacrifice an ti a, a tak tak a nih leh nih loh chu kan hre ve phak lo. An sawi dan chuan Pu Chawngkunga, Ex Minister-in Congress Bhawan a awm chilh anga party inrelbawlna experience nei ṭha leh mi zahawm chinin kengkawh turin Hnam Run hotu pa angin an dah dawn an ti a. Chu vang chu a nih ka ring, Vice President aṭanga an paih khan interview-ah khan a lawm lo tih a hmuh theih bakah a thil beisei ang a nih loh thute kha a sawi ta a ni. 

Dr Thangliana an paih chanchin hi chu ri deuh ret ret awm ṭhin avang khan a mak dan hi a mak vak lo thei a, party leadership inchuh lang ngam si lova a ruka inchuhna a awm hian a tawpah a lo puak chhuak nge nge ṭhin. MNF party inthlan boruak a san hnuhnung berah chuan Pu Lalduhoma zawk khan a chhuah phah ta a, khatiang kha a thlen nawn tawh lohna tura a chung lam inṭhuah fai hi a ṭha a ni. 

Pu Thangtea khan Vice President aṭanga chawl tura an Pre­si­dent rorel dan a pawm thlap thu a sawi leh an President Pu Zoramthanga'n insiam rem ni lo­vin Nomination Committee-in an thlan tih a sawi kha thil thu­hmun a ni tho em? tih te hi hriatthiam a har. 

Congress lam pawh hi an inthlan/ insiam rem dan kha a buai nuai nuai hle an ti. Ex Minister pahnih zingah Pu Lal Thanhawla remruat dan pawm lova Vice President chuh tum, a tak taka tum leh ngam si lo, chumi hnua party aṭanga chhuah tuma chhuak leh ngam si lo an awmte pawh an tih nawk kha. Congress hi an inrem fuh thlap tawh angin lang mahse a chhungah hian hman nia inthlan dawna a hranga chaw ei khawmho kha an la inkawm hleithei lo an tih tlat chu mawle! 

Tichuan, ZPM hi party hrang hrang rem taka inkuah khawm emaw kan tih laiin MPC an han tel duh ta lo phawt a, chutihlaiin a MPC hlawm lian kha chu an ZPM vek tawh a, an President leh mi tlem an la tal hrang niin an sawi a, chu chu Prism lamin an lo sawm hrang ve leh chiah bawk a, ZPM pawh an awm khawm ta lo an tia lawm. 

ZPM-ah pawh hian a ZNP leh P lo boruak hi chu chhungrilah hian a la ri neuh neuh ngei dawn bawk a, BJP lam zawk hi party President thlak tumna a awm mek tihte a ni bawk asin. 

- Peter LR Chhangte