NGO ṭhenkhat hian AVBD entawn ta se
Association for Voluntary Blood Donation (AVBD) an tih hi Mizoram mipuiin kan hre tawh hlawmin ka ring a, a thlawna thisen pek a pun theih nan leh thisen mamawhtu damlote'n an mamawh hun takah thisen an dawn theihna tura hma latu pawl a ni.
AVBD-ah hian hruaitu zingah pawl hrang hrang aiawhte an tel ṭhin a, kei pawh hmân deuh khan pawla ka nihna avangin AVBD Committee-ah hun eng emaw ti chhung chu ka tel ve a. He pawl hlutzia te, hruaitute'n sum leh pai emawa hlâwkna chu sawi loh, mahni insêngso tak meuha pawl an kaihhruai dante a takin ka hmu ve a; an fakawm ka ti tak meuh a ni.
AVBD ka ngaihsan em emna pakhat chu, thisen pek chungchanga sawrkar hmalakna an dodal duh miah lo leh sawrkar hmalakna reng reng a hlawhtlin theihna tura hma an la zel mai kha a ni. Sawrkarin thisen pek chungchangah eng policy leh kalphung pawh nei se, a thlawna thisen pek a pun zel theih nan hma an la mawp mawp mai ṭhin. Hei hi a tak ngeiin ka tawng tlat.
A hminga AVBD Committee-a ka tel ve lai kha sawrkar (Congress sawrkar lai)-in thisen sawngbawlna senso phuhrûkna tura blood processing fee thisen unit 1-ah Rs 500 (ni tain ka hria) a lak ṭan hun lai kha a ni a. Blood processing fee lak kha AVBD hruaitute khan ṭha an ti lo a, voluntary blood donation a tlakhniam phah ngei dawn tih an hria a ni. Sawrkarin kalpui lo se an duh a, sawrkar hotute hnenah pawh an thlen nghe nghe. Mahse, sawrkarin a kaltlangpui ta tho a, voluntary donation pawh a tlakhniam phah ta ngei bawk.
Mahse, AVBD leh hruaitute khan sawrkar an bei zui hauh lo. Beih zui chu sawi loh, blood processing fee lak a ṭul dante mipui hrilhfiah turin theihtawp an chhuah zui zawk a, TV discussion lam thlengin hma an la a. Blood processing fee lak vanga voluntary blood donation tlahniam chu a san leh theih nan theihtawp an chhuah zui mai a ni. An ngaihsanawm ka va ti tak.
Hetih mek lai hian, AVBD letling chiah pawl (NGO) hi Mizoramah hian eng emaw zat a awm niin ka hria. Sawrkar khera beih tum rân leh, chumi kal zela sum leh paia hlâwkna tur ngaihtuaha NGO din peih riau te hi an awm em ni aw ka ti ṭhin. Chutianga NGO din ṭhinte chuan thil hrang hrangah sawrkar beihna tur an zawng ngar ngar a, remchang an hmuh hlek chuan sawrkar an bei chat char zel mai ni te hian ka hria.
Sawrkar an bei ngar ngar a, chu chu sawrkar tan mualpho theihna te a lo ni ve leh zel bawk si nen, sawrkar hotute aṭangin anmahni tihlawmna tur therhlo eng eng emaw an dawng ṭhin a nih te ka ring rum rum a, chu chu sum hmuhna (eizawnna) remchangah an hmang a nih te ka ring hial ṭhin zu nia!
NGO hrang hrangte hian thil tum an nei a, an duh dan anga sawrkarin hma a la lo a nih pawhin, sawrkar beia dodal bur bur kher lo hian, an thil tum chu tihlawhtling turin AVBD ang hian hma la ve mai se ka ti ngawt mai.
- Rochungnunga