A KOTLANG ‘A’ TEAM

Kei hi, infiamna lama thiam leh theih nei reng reng lo ka ni a. Thiante awi nun ve hram hram avanga infiam nikhua pawha hmalam pan ve thei ka ni thin. Pawl pawl inthlang tura intlar pawha an thlan har pawl, perhlung (marble) hmanga inthap pawha a cha hmasa ber, ute hlawkna lo lawm ve ringawt thin ka ni. Chutiang chu ni mah ila infiam leh inkhelte kha ka tel ve theih lohnaah pawh en ka peih em em a, phur takin ka lo thlirin, ka lo auvin ka lo zuang ve thin.

Primary sikul kan kal atanga College thleng khan keimah ang chi kha chu ‘a kotlang A team’ tia sawi kan niin kan nihnaah khan kan lawm ve em em a, kan tihtur, ring tak taka inkhel ho lo auh phur a an chak changa lo zuana lo lam kha kan chanvo a ni a, kan hlim tawk ve hle thin.

A kotlang atanga thlirtu te chuan a taka inkhel, field chhunga hah taka thawk mekte chu an tihdan tur chi hrang hrang kha awrawl tawp tawpin kan lo hrilhin kan lo au a, a hre ber ang mai khan kan lo sarak ve vak vak fo mai! A inkhela te lahin kan auhna kha an hre phak lo a ni chèk aniang, kan sawi loh ang deuh zel khan an petin an vuain an tlan thin ni maiin ka hria. Keini lahin kan sawi anga an tih lohva an chet fuh tak loh veleh khan, “kha maw, ka thu in awih lo vei a” tiin kan lung a awi lo thin hle.

M.A zirin Mizoram pawnah ka’n awm ve a, Hostelah te awmin inkhelh leh inel eng eng emawah te ka tel ngam ve ta a (ka thiam vang ni lovin, ka kumin tlangnel a phal ve tak vang zawkin), field zau deuh deuhah te football ka pet ve anih chu! Hetianga zah loh ve tak avanga ka inkhelh ve hian a kotlang A team atanga kan lo aupui vak vakte kha ka hrechhuak thin a, a taka ka tih theih loh zia leh pawn lam atanga min lo au vetute aw hriat a har zia te ka hmufiah nasa teh e….

Manchester United hi kan tan tlur mai a, kei leh ka chhungte hian. Ka fapa Bangalore a lehkha a zir laite khan zinglam dar 2 ah te Manger in a formation fuh tawk lo (ni a kan hriat) kan chak pui loh thute, a hmatawnga a khelh tir fuh lo kan tihte kha message in kan sawi zui nasa thei hle. ManU Fans ho whatsapp group, kan nupa tel venaah te hian Manager leh player kan duhkhawp loh te hi kan sawi nasa theiin keimahnia remfela chak tura inngai kan tam thin khawp mai.

Heti hi a ni a, a kotlang A teama mite hi kan awmna hmun leh kan rilru put dan azirin kan pawimawhin kan hnawksak thei bawk. Chaute fuih phurtu leh hmalam pana kal thei tura midang tichaktu kan ni thei tih hi phat rual a ni lo. Chuti ni lo sela inelnaa kan tan zawngten anmahni ena lo au tur hian min sawm a ngai hauh lovang. Chutih rual chuan he dinhmun pawimawh taka ding tamtak hian khelmuala inkhelte tana hnual rawih theihna tur khawpa mawi lova lo chet mai hi kan pawisa lo ta fo mai. Ram changkang zawkahte ngei pawh ‘a kotlang A team’ nungchang leh awmdanin a zir loh avanga entu mipui awm phal a nih loh chang a awm leh zeuh thin.

A kotlang A team niha duh ang anga lo auva lo fuih bakah hian kan selin kan rel bang lo bawk a. Autu leh fuihtute hian kan duhanga thil a thlen lohvin tawngkam duhtui lem lo takin kan sel zuiin puhmawh theih tur zawngin kan hmanhlel nghal thuai thin. Hetia rela sela, cheksawlha au-eltu tam berte hian khelmual chhunga inkheltu tak tak hi ni ve ila, a sawia sawi leh a taka tih inkar zau zia hi kan lo hriat loh zia kan inhmuchhuak ngeiin ka ring.

Fiamthua an sawi thin, Pulpit atanga thusawi tura an ruat pakhat pawhin a thusawi bul an tan dawn a, a rin ang a lo ni hauh lo mai a, “Khâta tanga en ang ngawt kha a ni lo” a ti ringawt e an tih kha kan khawvel entirna tha tak pakhat chu a ni ve chiang mai.

A lum nuam chinah kan ai a, a khu ur loh laiah kan thu a, thingtuah belh tur a awm em tih pawh hre lovin vawt deuha kan hriat veleh “tuah belh teh u” hi kan ti fo awm asin. A taka kan tawn ve loh leh tawng mah ila kan tih theih bik loh tur hi kan lo pau puiin hre ber thawkin kan lo thaw thin a ni maithei. A tak ram dai chiaha a harsat dan tur ngaihtuah thleng pha lo hian a him chin atangin kan lo chaih ve anih pawhin a taka daia a harsatzia hretute thu leh hla ngaihthlak te hi zir ang u.

‘A kotlang A team’, midang fuiha au phurtu leh midang puitu, khelmual chhunga awmte an chau deuh anih pawha an mamawh tui leh eitur leh thildangte lo ngaihtuah vat vattu nih zir ila. Khelmualah hian mi zawng zawng kan inkhel thei ngai dawn lo tih hriain kan tan zawng team tana ‘a kotlang A team’ chhenfakawm leh innghahna tlak nih theuh i tum ang u.

- Dikteii Hnamte