MIZORAMAH TU NGE THU BER LE?

Zawhna âtthlak tak leh naupang zawhna mai mai ni awm tak a ni. Hmânlai deuh khan khaw pakhatah chuan an VCP a huai ber a, a nupui a ngam lo va, mahse, a nupui chuan an ui vulh lai chu a hlau viau si a, an ti ṭhin a. Hei hi thil awm thei tak a ni.

September ni 26, 2025 Vanglaini chanchinbu chhuakah khan Pu K Hmingthankaia khan, “ZPM sawrkar chunga lawmthu ka sawi kha ka zak” tih thu a rawn ziak a. Khatah khan city bus-te chu passenger lâwn chhung leh an chhuk chhung bâk din phal loh thu, STA-in a chhuaha a lawm thu a sawina a ni a. Mahse, an zâwm leh chuang si lo kha a zak ni berin ka hria.

Kei pawh khami hnu lawk, ni 27.9.2025 khan city bus-ah ka chuang ve a. Nu pahnih ka bula ṭhute chuan hmân ni lawk kha chuan passenger chhuah kim leh luh kim veleh an kal mai a, a nawm tehlul nen, an lo tidanglam leh hman ta a nih hi maw le, an ti a. Ka rilru te te chuan, STA aiin conductor a thû zawk a va ni mai awm ve aw, ka ti a. Hetiang a nih hian an timing leh routine a dik thei lo te pawh a ni mai thei a, ka hre lo va.

Chutiang zelin, Treasury Suare velah khawlaiah/kawng dungah chawhmeh zawrh khap a ni, AMC-in an ti. Chawhmeh zuarho lah chuan an zuar lui zel a, sawrkar nge nge chu a nêm zawkah an ṭang leh ta ni ang chu, kawng sir tawn tawn ni lovin, sir khatah an inzuar leh mai a. Aizawl, Vanapa Hall bul vel ringawtah pawh hian sawi tur a tam. A bul lawkah Bawrhsap (DC)-in black-a petrol zawrh a khap a, a thupetu pisa bul lawkah petrol chu black-a zuartu an intlar tuar a. Zu zawrh loh tur tia order petute bang nghêng rengin zu an zuar a, a bul lawkah Police leh Excise-ho an awm reng a, inman an âwm pawh kan hre lem hlei lo va. Bawrhsap nge thu zawk a, black a petrol zuartute le? Excise nge thu zawk a zu zuartute le? CSS hnuaia hnathawktute an nuar a, sawrkarin zawm vek turin thupek a han chhuah a, an pung khawm tam ta tawlh tawlh ta mai a. Sawrkar nge thu nei zawk a, CSS hnuaia hna thawhte le? Hawh u, ṭha te tein i awm dial dial ang u, kan ti a ni ber awm e.

Kawng chhia a awmin All NGO Coordination Committee-te’n kawng siam ṭhat vat a nih loh chuan eng lirthei chi mah kal an phal loh thu te an chhuah leh a. Khaw ṭhenkhatah, zirtirtu an neih ṭhat loh avangin a khaw mipuite’n skul an khâr bawk a. Mizoram State University pawh Aizawla dah turin an ti a, Lunglei lamin Lungleiah an dah tur a ni, an ti a, an dah leh mai dawn a. North Korea chu ni se, mipuiin aw kan nei lo tawp ang le. Khaw ṭhenkhatah pisa kai turte an dang bawk a. Heihi mipui rorelna (democracy) chu a ni ber mai awm e.

A ram pum huap pawhin Mizoram chu zu khap burna ram (total prohibition) kan ti a. RV an ti emawni, veng pênhleh lawk aṭangin an supply chur chur a. Duh loh entirna ang lek chuan daipâwn vela zu zêmte chu an han sât ṭet ve ṭhin a; a satu man awm chuang lem lo, supply pawh ṭhulh chuang lo. Aizawl khawpui lailiah ngei pawh zu in mi chuan an kawi zeuh a, khawi laiah pawh an hmu thei leh mai si a. Sawrkar hian a thil dote hneh a neih âwm pawh kei chuan ka hre mang lo a ni e. Naupang drama changin, “Hawh u, ṭha te tein i awm ang u, kei chu intihbuai hi ka duh hauh lo a nia,” an tih ang deuhin ṭha te tein kan awm tlang a ni ber âwm e.

Mizoramah chuan Governor a lal ber ang a, a thu ber bawk ang a, mahse, Lai Autonomous Distric Council chungchangah khan kan hre thei awm e. A thupek (order) chhuah kha High Court-in a sût thei tlat mai a. AMC sawrkarin khawpui chhungah vawk vulh loh tur a ti a, vawk vulhtute’n an vulh lui tlat a; cheng sang khat emaw vel chawi diat diatin an vulh leh a, tunah phei chuan chawi awm tawh lovin an man belh leh ta zel niin ka hria. Heihi democracy chu a lo nih ber âwm hi.

- V.L. Hruaia, Tuikual South. 9436150028.