Bethlehem i pan ang

Kan thupui han ngaihtuah vang vang hian, tih luihna lam ni lovin sawmna, ngenna a ni tih kan hre thei ang. Siamtu’n min siam danah ropui tak, kawng dik leh dik lo zawh chungchangah pawh keimahni thu thu, zalenna kan nei. Hetih lai hian kawng dik zawh turin eng tik lai pawn sawm kan ni a, min nghak reng a ni. Bawhchhiatna avangin boral tur kan ni a, anchhedawng kan ni. Pathian chuan min la hmangaih reng tho a, engtikah nge mihring fate hi an lo kir leh ang aw, tiin min thlir reng a ni. Kan sualte ngaihdam nan Mosia dan, thusawm pek kan nei a, mahse, han zawm tak tak theih rual a ni lo, tihngaihna a awm lo. Hetih lai hian kan aiawh tur, tehkhin nan, ai tâng tur an tih ang deuh khan, Isua chuan a rawn ti ta vek a, kan aiin a tuar a, kan tan aiah jail-ah a tâng a nih ber chu. Chu Isua lokal tur chu Bethlehem-ah bul rawn ṭanin, ran inah mihringte angin a lo piang a, hemi lawm leh chibai buk tur hian vawiinah kan vaiin sawm kan ni.

Bethlehem chu

Krismas hman dan chi hrang hrang a awm thei awm e. Tleirawl/rawlthar te chuan meizial zuk ṭan nan, zu in ṭan nan, ruihhlo tih ṭan nan kan hmang ṭhin. Nulate pawn an zahawmna hloh phah nan an hmang bawk ṭhin. Nula tlangvalte’n nawmchen nan, zu leh sa nen ṭha lo takin kan hmang ṭhin. Mahni interekin, hlimhlawpna ringawtin kan hmang ṭhin a ni. Han ngaihtuah vang vang ila, hetiang hi chu Bethlehem-ah a awm lo; Bible-ah a tel lo, kan phuahchawp, Setana min bumna mai mai a ni.

Aw le, Krismas hmang inti mah se, a tak thleng lo. Heroda hman dan anga hmang, Bethlehem ang ve tak, ni si lo a ni. Vawiina kan hman tum dan hi ngaihtuah chiang teh ang. Inngaihtuah chiang ila, Bethlehem thleng tak tak lo hian a hman ve theih a ni.

Bethlehem tak tak

Heng mi tê berte chunga in tih hi ka chunga ti in ni, Pathian chuan a ti. Sawi teh chiam ngai lovin thilpek lam hi chu kan uar ve ta hle mai a, a lawmawm hle. Thisen pekte pawh kan uar, mahse, Krismas vel lai hian tlemin kan harsa deuh ṭhin. Hei hi i hre reng ang u. Nula tlangval tan chuan inkhawm leh zaikhawmna ringawta hman chu a har khawp ang, mi changkang lo, tunlai lo nihna pawh a ni thei ang. Mahse, chu chu chibai bukna dik tak chu a ni si lo maw. Bethlehem thleng Krismas chu a va nih si hmel ve. Nu leh pa lam pawh inbuatsaih ve ila, a hlimhlawp leh a chhehvel ringawt hian kan lo khat ve ang e. Berampute leh khawchhak mifingte chibai buk dan kha hre reng ila, Bethlehem tak tak thleng turin kohhran programme-te hman ṭangkai tum ta ila, chu chu hman dan dik a va ni mai awm ve.

Ka thleng ve em

Kan lo hman ṭhin tawh dante han thlir let ta ila, kan lung a awi em? Hman dan dik a ni meuh em? Rilru uang tak, chapo tak chung ten kan lo hmang em? Inkhawm reng siin kan ngaihtuahnate chu khawvel lamah a awm daih si chuan a fuh lo ve hle ang. Kutpui pakhat ang ve maia kan hman chuan a dik lo ang. Ngaia neiha hman liam ve mai mai pawh a awl hle ang.

Kan tih tur dik tak chu, nausen lo piang chibai buk a ni. Mahse, a chhehvelah a lo kual a lo kual ve theih a ni. Kan lawm ber kan hriat leh si loh chuan a va ho dawn ve. Vawiinah han inchik ta ila, kei pawh hian ka thleng tak tak ve em aw? A hlimhlawpna ringawtah ka lo thâmral ve mai lo maw? Ka thleng lo a nih chuan Setana a va lawm dawn em. Ka thleng ngei a nih erawh chuan ka chhungte, nu leh pa, vantirhkohte an va lawm dawn em.

Hunpui kan thleng dawn ta, kan va vannei em. Hlim tak leh lawm taka hmang turin i inbuatsaih ang u. Kan zingah kan nu leh pa, kawppui, unau, etc. te awm ve tawh lo mah se, keini chu kan la dam a, lawmthu i sawi ang u. Lusun chhungte tan chuan mittui tlakna hun, khawhar leh lunglen em emna hun a ni, a mak hran lo ve. Hetih lai hian, khang kan ṭhen takte kha hrehawm takin an awm lo a nia, lei piah lamah nuam leh hlim em emin an awm tih kha hre reng ila a ṭha awm e. A ni thlen nan ni tam a awm ta lo. Nungcha, ramsate pawn an hmang ve dawn, he hunah meuh hi chuan an bâng bik lo. Keini ringtute chungah ngat phei chuan an beisei a sang tih i hria ang u.

Aw le, Krismas chu kan thleng dawn, ran chaw pekna thlenga nausen chu tih tak zeta chibai kan bûk theih nan i dil ang, i ṭawngṭai ang, i inserh thianghlim ang, Bethlehem i pan ang u.

- Lalchhandama Colney, Chaltlang Lily Veng, Aizawl, Ph – 9862982321