Bengsikin future Aizawl, Mizoram ngaihtuah a hun ta e

Mizoram hi a chhunga chêng Mizote ram a ni a, a enkawlna kawngah hian mahni in leh a velah theihtawp chhuah ṭheuh ila chuan kan tuichhe paih dan fimkhurin eng emaw chenah leimin kan veng thei a, kan thianghlimin kan in leh a vel kan vawng fai thei a. Boruak thianghlim a awm theih nan leh oxygen a pun theih nan thing kan phun uar thei a, tuihna a pun belh bawk ang. Pathianin a aiawha enkawl tûrin mihring min dah si a.

Sipai Lammual kan tih mai ṭhin hi Mizoram sorkar kutah a awm ta a; Assam Rifles pawh Berawtlangah an insawn phei deuh vek tawh. A hmun hi eng anga hman tur nge tih ngaihtuahtu Advisory Committee din a ni bawk. Ruahmanna ṭha tak tak siam a nih rualin building lian pui pui sakna atan ruahmanna a lo awm tih ka hriat veleh kei Aizawl pa hian, mimal tak pawha ka duh loh thu uar takin ka lo ziak tawh nghe nghe.

Lammual (AR Ground) leh a chhehvelah hian ramngaw tak tak kan siam thei tawh lo a nih pawhin hmun hring nuam leh natural park nuam tak, Aizawl boruak tiziaawm thei turin thing phun belhin, natural grass china sawngbawl ni se tiin ka lo suangtuah ve ṭhin. Mipui tan boruak ṭha hîpna hmun nuam tak leh rilru hah tihthawlna hmun remchang leh nuam awm thei se tih hi ka mitthla a la ni fan. Water-fall nalh takte awm se, intihhlim a rîk luih luihna tûr ni lovin, rilru tihthawven nana hahdamna hmun chang se a duhawm ngawt mai.

Sorkar erawh chuan building lian sak a, Aizawl Thana sawnna atan te, department ṭhenkhat sawn/dah nan ruahmanna a siam leh ut tawh tih thute kan hria a. Nakin lawkah kan inchhirna khua a la sei ang tih a hlauhawm ngawt mai! Kan hmun ṭha neih chhun hi kawng tâwt lutuk tihziaawmna atana AR ram tlêm kan la hêk tih loh chu thingkung phun belhna atan leh ram ngaw nuam tak, boruak ṭha pe chhuak thei dinna atan hmang ila, hun a lo kal zel ang a, tun aṭanga kum 10-ah chuan a buatsaihtute hi kan fak nasa ngawtin ka ring.

Kan ram tluchhe zel tûr venna atân ILP kan ngaih pawimawh tluk zetin khawpui chhunga natural park siam hi kan tihmâkmawh niin a lang. Aizawl kan zauh dawn a nih chuan khawpui chhung tawta kan hmun pawimawh tam tak hi khaw daifêma sawn chhuah hi kan tih hmasak ngai a ni. Mi nawlpui tan pawha hautak hauh lova sorkar an dawr theih nan bus chuan man tlawm zawkin sorkarin Transport department bus a tlantir ang a, tu tan mah harsatna awm hauh lovin zawi zawiin 'Aizawl khawpui' kan zauh ang a. Khaw chhung tawt lutuk siamrem a ni zel ang tih hi keini mithiam lo zawkte rin dan a ni.

Sorkar hian bengsikin ngaihtuah nawn leh se, tun dinhmun chauh thlir lovin kan tu leh fa nakin lawka kan ram hruaitu la ni mai turte hmakhua thlir se. Tun aṭanga kan siamrem loh chuan kum 2045-ah chuan Aizawlah hian motor a chétin a che thei tawh hauh lovin a rinawm. Aizawl khawpui chhung hi kan ropui vak lo vang tih hi rin thiam a ṭha hle mai. Ka sawi kim loh tam tak pawh a la awm ang.

Sorkar thuneitu leh MLA neih tam ber avanga kum 2023-a Mizorama sorkarna siamtu (ruling party) hian bengsikin ngaihtuah ula, "Future Aizawl, Mizoram hi ngaihtuah a hun ta e."

- David Zochhuanmawia (Vida Hrahsel Saza)