HRINGNUN HI – 21

Hlawhtlinna kawnga kal kan duhin hlawhtlinna hmun thlen kan duh ṭheuh hlawm ang. Nimahsela, hlawhtlinna kawng kan zawh dan erawh a inang vek lo ang a, hetiang hian kawng khat i han sawi dawn teh ang. Hlawhtlinna kawng khat, kawng awlsam tak nia lang bawk chu hun âwl hman ṭhata ni.

Mizote hi ṭawng tuitam chi kan ni a, ṭawng duh mi kan ni ti ila a dikna chen a awm ang. A hun leh hmun hriat loh phei chuan ṭawng duh lutuk hian mi pawi kan sawi palhin, mi nin zawng kan sawi palh thei a, an lo ngaihthlak ṭhat loh phei chuan vawk hmaa tuikeplung paih ang chauh a nih theih. Hetianga ṭawng duh lutuk hian thil dang kan tih tur tam tak a tihbuai theih avangin a hun leh hmun hriat a ṭha viau. Mizote leh ram changkang zawkte kan inan lohna lian tak chu hun ngaihhlutna kawngah a ni. Kan nunphung chu inang lo a awm ngei a, nimahsela, inang rengah pawh hian tluk lohna tam tak kan la neih reng chu hun hman ṭhat chungchangah a ni.

Hnampui ho reng reng chu kea an kal hian keini Mizote ang lo deuhin chak tak takin an kal ṭhin a, hriselna atan a ṭhat mai piah lamah, hun an ren a, an hmanhmawh vang a ni. Hmuhnawm thlirna hmun a nih loh chuan an kawng kal reng reng hi an hawi ve hû hû ngai lo a, hma lam chauh enin chak tak takin an kal ṭhin. Entirna han sawi ila: minute 10-a thlen theih reng kha anni chuan minute 5-ah emaw an thleng ta a, minute 5 chu thil dang tihna atan an hmang thei a, keini aiin hun an hmang hlawk thei zawk tihna a ni. Kawng dang lehah chuan mi an biak reng renga an duh tak an sawi nghal mai ṭhin hi kan tluk lohna a ni. An va biakte khan an hun neih dan an hre lo a, emaw, rilrua vei an neih leh neih loh pawh an hriat loh avangin hun tlem thei ang ber hmanpui an duh ṭhin. Keini chuan thil dang sawi kual hmasain, kan sawi duh ber hi a hnuhnung lamah kan sawi ṭhin a, hei hian hun a heh ṭhin viau.

Ni tin hun hi engtin nge i hman ṭhin le? Nang leh keiin kan hun hman ang tho hi mi hlawhtlingte pawh hian an hman a ni a, a darkar pawhin a inzat a, a minute pawhin a inzat reng. Nimahsela, anni chuan an hun neih chu hlu tak leh ṭangkai takin an hmang a, hlawhtlinna an chang thei ta bik ṭhin a ni. A lothlâwnin hun an hmang ral lo a, ṭangkai taka hun an hman avangin hun hlutzia an hre deuh deuh a, keini anga rualpâwlna ang chi hi an nei ve ngai meuh lo. Hetiang hian hun kan hmang ve thei reng tih hriat a, hlawhtlinna kawng kan zawh theihna turin tun atan hian ruahmanna kan siam a ngai a, chumi tur chuan hetiang hian i han sawi dawn ta ila.

Zanah darkar engzat nge mutna atan kan hman? Kan taksa a dam ṭha a nih chuan darkar 6 bak mut tum lo ila; entir nan, zan dar 10-ah mu ila, zing dar 4-ah tho leh ila. Chutichuan, dar 8 velah chaw ei leh ila, chaw ei hma zawng darkar 4 vel chu ṭangkai takin a hman theih tihna a ni. Zing dar 7 vela thawh a, dar 8 vela chaw ei leh a ngaih bawk si chuan darkar 3 vel chu mi dangin ṭangkai taka an hman laiin, keini chuan mutna atan kan hmang tihna a ni ang.

Office-a kal kan ni emaw, mi hnuaia thawk kan nih pawhin zing dar 9 aṭanga tlai dar 5 thleng vel chu kan duh zawng tihna atan a remchang lo turah ngai chhin ila; mahni hnathawk kan nih chuan darkar tin chu keimahni tana thawk kan nih avangin kan hun zawng zawng kan pe thei a ni. Office hna emaw, mi hnuaia thawk emaw kan nih chuan dar chuti zah tia hunbi sawi theih a nih avangin chutiang hunah chuan ṭhahnemngai taka thawh a, chumi bak chu keimahni tan hun kan pe thei dawn tihna a ni. Chuti a nih chuan kan hun awl neih chu engtin nge kan hmang ang le?

Hnam changkang zawkte chuan hun âwl thâwl deuh an neih hian chhungkuaa hman hona atan an hmang tlangpui a, khawilai hmunah emaw intihlimin zan riak tein hun an hmang ṭhin. Lawng lianah te chuangin hun âwl an hmang ṭhin bawk. A ṭhen chuan intihhlimna hmun hrang hrangah zu leh sa nen hlim takin hun an hmang a, chi hrang hrangin an hmang ṭhin a ni. Hengte hi keini tan a rem lohna lian tak awm chu, hetiang tur hian kan la hausak tawk loh vang a ni ber mai. Chu bakah, kan society hian a la zo lo bawk. Kan phak tawka hun awl kan hmanna tlangpuite chu–khawilai restaurant changkang ve deuh emawa chawlh te, luia kal te, khawilai hmun emawa infiam te leh dangte a ni.

Kan hun âwl hman dante hi a nuam kan tih vanga hmang nge, kan rilru leh taksa hriselna atan kan hmang nge, eng atana hmang nge kan nih hlawm le? A ṭhen chuan lehkhabu chhiarna atan an hmang ang a, thil eng emaw zirna atana hmangte pawh an awm ang. A ṭha vek. Mahni leh chhungkaw tan emaw, mi dang tan emawa ṭangkai tura kan hmang a nih loh chuan kan hun âwl neih leh hman ṭhin hi a uihawm viau thei a ni. ‘Time is money’ tia hnampui hoin an lo sawi ang hian, nang leh kei hian hlu tak leh hriat reng tlakin hun awl kan neih thui deuh leh thui lo deuh te hi kan hmang ve thei reng a, hlawhtlinna rahbi thar rah tanna atan kan hmang thei bawk.

I hun i hmang ṭha em le?

- Mahmuaka Chhakchhuak