Krismas ni December 25 hi milem betute aṭanga Kristiante’n an copy chhâwn an ti maw?

Kumin 2025 Krismas hun lawmawm December 25 a lo hnai leh ta. Khawvela Kristian kohhran tam berin nghakhlel taka kan thlir mek lai hian, ngainêp pawl leh sawi hnâwm pawl an awm ve reng a. Mi tam tak rilru an tihnual tawh bawk. Hemi chungchangah hian thu dik tak dap chhuah kan tum dawn a ni.

Sawi hnâwmtute sawi dan tlanglawn berah chuan, Krismas December 25 hi Rom-ho tihchhuah a ni, tia puhna a ni. Roman emperor Constantine-a Kristiana a inleh khan, ama hovin AD 336 khan December 25-ah Krismas an hmang ṭan a. Isua pian ni tak tak a nih vang ni lovin, he ni hi Rom-ho ni pathian hneh theih loh Sol Invictus a birthday an lo chawimawina ni luahlan nana Kristiante’n remchang taka an lo lak chhawn ve a ni, tih hi mi thiam ṭhenkhatte’n tun thlenga an puh dan a ni. Rom-ho pawh chuan hmasang Babulon lal ropui, khawvela milem biakna tichhuaktu Nimrod-a fapa Tammuz-a birthday an hman ṭhin an lo lak chhawn a ni, an ti zel a. Tichuan, milem betu Babulon-ho aṭanga inṭanin, a hnuah Rom-hovin ni pathian biakna ni atana an lo lak chhawn chu Kristiante’n an Isua piancham lawmna ni atan an lo hmang ve ta a. Chuvangin, December 25-a Krismas lo chhuahna ṭobul chu milem betute tih dan copy chhawn a ni, tih hi khawvel mithiamte min zirtir dan, Kristian mithiam tam takin thu dik emaw tia min zirtir ve bawk ṭhin tho a ni.

Hetiang taka Kristiante kût hlimawm leh nghahhlelhawm berin milem betute hnen aṭanga entawn chhawn ang leka an chhuah chhiat hle karah hian Canada rama Kristian mithiam Wesley Huff-a chuan Krismas hi milem biakna a ni lo (Christmas is not pagan) tih thu a chhuah – The Gospel Coalition, Canada-in an rawn chhuah chhawn te, Reformed Baptist Blog-in an chhuah zui te leh, Wesley-a thuziah chu Kristian inti ve tho a ni mai thei–Michael Wordsmith-a’n Wesley-a ṭanhmun ‘A Point-by-Point Rebuttal…’ tih thu hmanga a rawn hnial lêt dante chu amah leh a thu ngaisangtute’n an rawn chhuah chhawn kan ngaithla dawn a ni.

Hetianga sawi dan leh puh dan hrang hrangte hi Krismas sawiseltu pawl ṭhenkhatten tun thlenga thu dik anga December 25 an sawi nêpna hmanrua a ni a. Mahse, heng hi dâwt thu maia puhna, thu dik lo ‘bogus’ a ni tlat mai.

He puhna thu hi Kristian zinga Krismas dotute zingah Dec 25-a Krismas ni serh hi milem betute nena inthlun zawmna a nih avanga hman tlak loh angin kohhran pawl ṭhenkhatten Krismas an hman duh loh phah ta a. Ringlo mite’n Kristiante leh kan Krismas min chirhtheh nan an hmang bawk a; mi rilru an tihnual ṭhin.

Chutia Kristiante kût hlimawm leh nghahhlelhawm berin sawisel a tawh a, thil hre ril leh hre thuka inngai mithiamte’n ‘Masi hman tuiawm lo rawih khawpa an sawi chhiatna chu eng nge a awmzia tiin Christian Research Centre chuan 2022 kum aṭang khan a lo chhui ve ṭan tawh a. Media evangelical channel-ah leh tun hnaiah Gospel & World News channel-ah Krismas chungchanga dawt thu leh thu tak thliar hrangin chipchiarin post darh a ni tawh a. A tlangpui chauhin Krismas hman ṭan dan history dik tarlan kan tum ve a ni.

Puhna 1-na: Sawi tawh angin, Dec 25 hi Rom-ho ni pathian Sol Invictus birthday leh Babulon pathian Tammuz-a birthday, Kristiante’n an copy chhawn mai anga lo sawi chhuaktu hmasa chu tute nge ni, hming hmerha dap chhuah tur an awm em, tiin a history lamte chhui a ni tawh a. Mak tak maiin mite’n Krismas sawi bawrhbân phah nana an lo hman ṭhin sawi chhuaktu chu hmasang mi pawh ni lo, tun hnai, 19th century laia Scotland rama Free Church pastor pakhat a lo ni reng a, a hming chu Alexander Hislop a ni. A lehkhabu ziah tunlaia mi tam berin Luka ziak tluka an rin The Two Babylons, 1858 chu rin thu leh phuahchawp thil, fact check dâwl lo, Krismas sawi hnâwmtute thu leh hla mai a lo ni. Chuvangin, Krismas leh Babulon milem pathian Tammuz-a khan inzawmna an nei lo, tih hi Kristian mithiamte’n an zir chhuak tawh a ni.

Puhna 2-na: Tun hnaiah nasa taka Kristianna ṭobul sawi sawptu leh ziaktu lar Dan Brown-a phei chuan a lehkhabu hriat hlawh tak The Da Vinci Code-ah chuan, “Kristianna eng thil mah hi original a awm lo!” a’n ti thlawt mai a. Kristian sakhaw pian chhuah hmaa Persia-ho pathian biak kha Pathian Fapa tih leh Khawvel Eng an tih kha December 25 a piang a ni,’ tiin huaisâr takin a lehkhabu kan sawi tak phek 55-na leh 28-29 ah chuan a puh ve thâwr bawk a. Finfiahna mumal reng a sawi zui bawk si lo. Chutianga hre chiang inti mithiam leh ziaktu lâr bawk siten an sawi thâwr thâwr tâkah chuan Kristian ni lo khawvel mipui tam takte awih nuam tih zawng tak a lo ni zel si a.

Dec 25 Krismas ni hi Rom hovin an ni pathian biakna ni atana an hman, Kristianten an lo copy chhawn anga puhna chu a dik lo tih kristian mithiamten an hmu chhuak tawh a. Kristian hmasaten December 25-a Isua pian ni champha an lo hmang ṭhin kha Rom hovin an ni pathian biakna ni atan an lo copy zawk tih hriat chhuah a ni leh tawh a. A inlet thawk a nih chu. Engtin nge an hmuh chhuah, tih hi Kristian kohhrante tan chhinchhiah tlak a nih avangin chipchiar deuha thil awm dan sawi fiah a ṭul awm e.

Kohhran chanchin (church history) zirna aṭangin

Thuthlung Thar kohhran hmasate chanchin kan hriat hlat theih berah chuan AD zabi hnihna lai khan December 25 hi Krismas ni atan ringtu hmasate khan an lo hmang tawh a. Hei hi rinthu ni lovin kohhran pate (church fathers) record hlui ber berte aṭangin ziaka finfiahna (documentary evidence) awm vek a ni. Kohhran hruaitu hmasa Hippolytus of Rome (AD 170-235) te, Sextus Julius Africanus-a (AD 160-240) te leh Clement of Alexandria (AD 150-215) te khan AD 200 vela an lehkhabu ziahah khan Dec. 25 hi Isua pian ni a ni tiin ringtu hmasaten chhut chhuakin, Krismas ni atan an lo hmang daih tawh tih pawh an thuziak chhiar theih a ni tih hriat chhuah a ni. An hman ṭan hun phei chu hemi hma hi a ni thei ang.

Engti angin nge Rom hovin Dec 25 hi an ni pathian (sun god) biak nan an lo hman zawk le? Kristiante nge hmang hmasa Rom-ho tih chu zawhna pawimawh tak a ni a, a chhanna hhre chhuak tur chuan Roman history aṭanga chhui tur a ni.

Kum zabi 3-na lai vel khan Rom lalram chhungah Kristian an pung chak em em a; Rom khua leh tui mi tam takin an milem sakhua kalsanin Kristianah an inlet nasa. Roman magistrate hmingthang Pliny the Younger-a phei chuan milem biakna temple-te chu a ruak hiai huai mai, tiin Epistle to Trajan-ah a ziak a ni. Roman emperor Juliana phei chuan Kristian sakhuaa mi an inleh tam vang a ni tih hriain, Rom sorkar khan tihduhdahna an ti nasa sauh reng a ni. AD 270 khan Roman emperor thiltithei tak Aurelian-a’n lalna a chang a, Rom lalram leh an sakhaw tluchhe mek tundin nan an ni pathian chu a ram mipui inpumkhat nan ‘state religion’ atan AD 274 khan a puang a. Temple thar a din a, chumi hlanna ni atan chuan Kristianten Krismas ni atana an lo hman ṭhin Dec 25 ni luahlan nan ni pathian hneh theih loh (Sol Invictus) birthday -ah a puang ve ta ṭhuai mai a ni, tih hi Rom-ho history-in a tarlan dan chu a ni. Chumi awmzia chu, Rom hovin an ni pathian biakna ni atana Dec 25 an hman hma kum 100 dawn lai kal tawhah khan Kristiante’n Dec 25 hi AD 200 vel khan Krismas ni atan an lo hmang tawh a. Khami hma khan ni pathian emaw, Saturnalia – Saturn pathian emaw, Persia-ho Mithra pathian emaw chawimawi nan Dec 25 hi an la hmang ngai lo.

Chu chu thil awm dan a nih laiin, a lehlingin Rom-ho tih dan Kristiante’n la chhawng ve angin thu a thang chho ta zawk hlauh mai chu, thu veivirtu an awm tihna a ni. Kristiante leh an Krismas sawiselna hi Krismas dotute’n hahîpa an thehdarh duh dan a lo ni bawk si a. Mahse, tunah chuan Krismas hi Babulon leh Rom-ho hnena mi copy chhawn ang leka dâwt thu lo sawi chhuaktu, a kaikuang hi man chhuah a ni ta; tu nge a nih a hming leh a dâwt sawina lehkhabu ngei pawh laihlanin a awm ta a ni.

Mithiam ṭhenkhat aṭanga hnialna awm leh pakhat chu, berampute’n thlasik laiin ramhnuaiah beram an riah chilh ngai lo, a huanga an khung lai a ni; chuvangin, Isua pian lai hi December a ni thei lo, ṭhâl lai emaw, favang emaw a ni ang, an ti ṭhin. He hnialna phei hi chu a lo rinthu viau mai, ṭanchhan a nei chau hle. A chhan chu Bethlehem hi Israel ram chhim ni sa lama awm, vûr tlakna khawpa vawt a ni lo. Beramte hi khaw vawt tuar thei tura hmul chhah leh lum tak nei an ni bawk si. Beram huang hi Israel ramah chuan lung pala hung, khuh hulna mumal pawh nei nei lo a ni. Thlasik chhung zawngin beram rualte hi huangah khung ta se châwm a hautak viau ang. Helai, berampute ram ṭuanna hmun hi hman laia Boaza thlawhhma awmna hlui kha a ni a, Boaz’ Field an la ti reng. Bethlehem khaw mawng, mual pâwng hmun rem tak a ni a; a chhungah hian pûk zau ṭha zet zet, beramte leh a vengtute riahna remchang tak, beram dah khawmna remchang tak a lo awm reng mai bawk a. Chuvangin, thlasik khaw vawtah berampute’n beram an riah chilh ngai lo tia Isua pian hun Dec 25 sawi bona ṭanfung chu pheh thluk a har awm lo ve.

Krismas tree pawh hi Babulon milem betute chîn chhuahah bawk Hislop-a hian a puh a. Hei pawh hi rinthu leh suangtuahna thil bawk a nih hmel. A pian hma kum sang li dawn lai liam tawha Babulon-ho chin dan kha ziaka inhlan chhawn a awm bawk si lo va, engtin nge a hriat bik, suangtuahna rama a phuah chhuah a nih ngawt loh chuan. Dik takin Kristiante’n Krismas tree an hman ṭhin chîng chhuaktu chu reformer ropui Martin Luther kha a ni tih a chanchin chiang taka chhui theih a ni.

Bible-ah Krismas hman tur tih thu emaw, Isua pian ni hi Dec 25 emaw, ni dang emaw a sawi lo va, a lawm ve duh lo chuan lawm ve lo mai se a pawina ka hre lem lo. Keini misual bo hnute min chhandam tura Pathian fapa hringmia a rawn chan ni hi a lawmawm em a, lawm nachang hriate chuan Lalpa chawimawina ni atan hlim takin Krismas hi i hmang zel ang u.

Kristiante zingah ngei pawh December 25 lo sawi sawptu an awm ve thei tho. A dik e, December 25 hi pathian biakin kohhrante’n kan be lo, ni dang ang ve tho a ni. Kan biak leh kan chawimawi chu hemi nia lo piang Isua Krista, khawvel chhandamtu hi a ni. Mizote Kristian kan nih ve hma daih, kohhran chanchin kan chhut hlat theih ber AD zabi 2-na lai aṭanga December 25 hi kohhran hmasate’n Isua pian champhaphak ni anga an lo hman hi kan chhunzawm ve mai a ni. Ni tin hian Isua rawng kan bawl thei e; mahse, a tir aṭanga a birthday, Krismas ni kan lo hmanna ni chu December 25 a ni tlat a. A ni a lo thlen dawn a ringtute lung a tihlenzia leh Krismas hla lunglenthlak tak takin Zoram dung leh vang mai ni lo, khawvel pumin an ngaihsanzia ngaihtuah hian, he ni chawp hian ringlotute ang maiin kan sawi sawp ve dawn em ni?

Khawvel pawhin ni pawimawh bik, independence day te, kumthar ni January 1 te leh kum tin holiday ni bik kan hmang ziah a. Lei mihringa kan awm chhungin ni bik serhna ni Sunday te, Sabbath day te kan la neih chhung hi chuan ni bik pawimawhna hi sawi nep thei kan ni lo vang. He khawvel chhandam tura Pathian fapa meuh lei mihringa a rawn channa pawh hian ni bik a nei ngei a ni. He Kristmas ni lawmawm kan hmuah mek, kum 2000 chhunga Kristiante’n Dec 25 hi Isua pian ni anga kan hman hi ringlotute ang chuan i hnial buai ve lo ang u. Lalpa’n malsawm ṭheuh che u rawh se. Amen.

- Dr PC Biaksiama