The Bible Says So!

Krista Nî chuan Mi Thianghlim Lâwr a zui nghal a ni tih chu kan bel tawh ngei ang. Chu Krista Nî chu Second Coming-a bet ve mai ni lovin, Ni (Day) hrang hlauh (Separate Day) a nih pawh kan chiang tawh ang. Krista Nî leh Second Coming te hi kum 7 laia inhlat an ni. Hemi hun chhung khung hian (Berâmno Nupui neihna kha a awm ve tih hria ila) ringtu zawng zawngte a mal tê têin Krista rorêlna ṭhutphah (Grik tawnga bema an tih) hmaah chuan Pathian rawng kan bawlna, a chhia emaw; a ṭha emaw zawng zawng kha Lal Isuan A pho lang vek dâwn a ni (II Kor 5:10). I huphurh em?

Rorelna tih kan sawi lan avang hian rorelna hrang hrang te lo sawi lang nual ila a ṭha lo maw? Mi Thianghlim lâwr hnu hian Krista Nî-a kan tawh tur lawmman pek tur leh pek loh tur rorelna awm tur chu kan subject kal lai a ni a. Lal Isua A lo kal hun chuan ro- relna Jentailte nunga la awmte tan, kêl leh berâm ṭhen angin rorelna a awm ang. Kum sang lalram lut tur leh hremna hmuna kal turte A ṭhen ang (Math 25:31-33). Israel fate dama Lal Isua lo hmute chu ringtu an lo nih ve tawh avangin (Thup 7:1-8, 14:4, Zak 12:10) Jerusalem Zion atanga rorelin an sualte ngaidamin chhandam an ni vek bawk ang (Rom 11:25-27).

Lal Isua leia A lo chhuk khan, Sakawlh leh Zawlnei Der A man ang a, mei leh kâta kâng dîlah A paih ang a. An sipai zawng zawngte chu ngûnhnâma sah hlum vek an ni ang a (Thup 19:19-21). Rulpui Tar Diabola chu A vântirhkoh A mantir a, an phuar hlawm a, leilâwtah an paih ta, tumah bum thei lo turin. Chumi hnu chuan Daniela hapta 70 chhunga Martar zawng zawngte kaihthawh an ni ve leh ang a (Thup 20:3). Lal Isuan A mi thianghlim (piangtharte) Berâmno nupui neih zawha A rawn hruai thlak (Juda 14,15; Kol 3:4) leh Thup 19:14-a zuitu kan hmuh zawng zawngte chuan Lal Isua Krista nen kum sang ro an rel leh ang (Thup 20:4; II Tim 2:12; I Kor 6:3; Math 9:28; Isaia 9:7). Kum 1000 a ral hnuah rorelna hnuhnung ber, mithi kaihthawh zawng zawngte (Thup 20:12) rorelsakna a awm ang.

He rorelnaah hian piangthar an tel ve tawh lo. Ringtu thi kaihthawh leh la damten kum 1000 ro an rel ang. Hemi chhunga lo "thi char char" (Thup 20:5) te kha meidila paih tura rorelsak atan an lo nung ve ta (ve.12). Tu hming mah nunna bu-ah chuang si lo! Tumah (mi thenkhatten lawmman pekna hun nia an sawi anga) lawmman pek thu lah awm hek lo! Piangthar lote rorelsak hun a ni ngei e! Krista thihna leh thawhlehna kha keini piangtharte rorelna hmasa chu a ni. Chhandam tawh (saved), Pathian fa (Child of God) ni tawh (Rom 8:16), zakhamna Thlarau pek ni tawh (Eph 1:13,14) te hi engti kawng mahin, heng piangthar loho, thawlehna hmasaa tel ve lote (Thup 20:6) zinga kan din vena tur thu hi a awmin a awm love! Kan thupui The Bible Says So a nih ang hian a chunga thute khi the Bible really Says So a ni e.

- F. Lal Thanzuala