Council of Churches in Mizoram leh Diaspora Mizo

Mizo Kristianna kum 100 chuang lo kal mup mup tawhah hian la awm ngai lo leh kan la neih ngai reng reng loh chu kohhran pariat–Baptist Church of Mizoram, Evangelical Church of Maraland, Evangelical Free Church of India, Independent Church of India, Isua Krista Kohhran (Bualpui Ng), Lairam Isua Krista Baptist Kohhran, Mizoram Presbyterian Church leh Wesleyan Methodist Church of Mizoram te lungrualna chuan conciliar unity hmanga kohhran inzawm khawmna, a hmingah Council of Churches in Mizoram (CCM) din a ni a; a hawnna pawh October 26 & 27, 2024 khan Mission Veng Presbyterian Kohhran Biak In, Aizawlah neih a ni. Hemi aṭang hian CCM chu nghet takin a kal chho ta zel a; October 28, 2024 (zing dar 7:30)-ah CCM Office pawh Rev. Dr. R. Lalbiakliana chuan a hawng nghe nghe a ni.

CCM hian he conciliar unity hmang hian khawtlang leh sawrkar thlenga inrelbawlna tihhmasawn kawnga kohhrante’n hma an lak theihna tur atana inpumkhatna chu an thupui laimu niin a hriat theih. CCM-a kohhran member ni thei tur hian kohhran member 300 nei chin tih a ni a, Mizorama kohhran awm zingah tel thei tur an awm nual awm e.

CCM Diaspora Mizote thlirna aṭangin

Mizoramah kohhran hrang hrang awmte hui khawm hna thawh a, thurin (doctrine) leh chin dan (tradition) lama inan lohnate dahṭha a, common ground neihna lai hmang ṭangkaia ram tana hmalak tumna hi thil ṭha tak chu a ni na meuh e. Mahsela, Mizoram ramri huam chhunga awm ve lo Mizo kohhran tan hian hlawkna a awm ve em tih lai hi zawhna lian tak a ni awm e.

Hna leh zirna avanga Mizoram tualzâl chhuahsante’n an awmna hmun apiang maiah Mizo Kristian nihna hlu tak an din chhuahpui zel a. Khawpui hrang hrangah Mizo Kristian kal khawmte chuan Mizo Christian Fellowship/Mizo Inkhawm emaw tih hming puin hlim takin Pathian an fak ho ṭhin; pawl bik leh hming bik a awm lo. Pathian an fak ho dan bakah conciliar unity a taka hmanna a awm bik awm chuang lo ve. Mizoram pawna Mizo awmte hian Pathiannia Pathian an biak hona mai piah lamah hian chu inkhawm hona chu Mizoram pawna khawpui hrang hranga an nun kaihruaitu nghet tak leh ziding pawimawh tak a ni. Mizoram pawna Mizo nun leh Pathian fakna dan chu ṭhen hran theih pawh ni lo thil kal kawp tlat a ni a. Mizo Christian Fellowship/Mizo Inkhawm leh Mizo association chu hruihrual khata kal, ṭhen hran theih pawh ni lo a ni a; kohhran chuan Mizoram pawna khawtlang nun chu nghet takin a ṭhâm khawm tlat a ni. He kal dan phung nghet tak Mizoram pawna Mizo awmte’n an lo nunpui hi tun huna CCM suangtuahna pawh niin a lang.

Mahse…

Mizoram ramri chhungah lungrualna thu thlungin, Mizoram ramri pawnah mahni seh she mual hranah tiin kohhranin mahni kohhran bil din kan duh ta zel mai. Hengte hi CCM hian engtin ngai ang maw? Hlim leh lawm takin kohhran tih bik awm lo, inan tlanna tlangah tu kohhran tih dan mah zui lova Mizo kohhran tawp, Mizoram pawna a ding chu hmuh a nuam a; hnam dang unaute pawhin Mizo Kristian tlawmngaihna an hmuhin Pathian ropuina an hmu tel ṭhin.

Mahsela, tunah zawng Mizoram pawna Mizo Kristiante nihna chu kohhran mal hmingin a rawn thlak ta a; lungrual taka buh bâr za ṭhin pawh lawina kohhran a inan tawh loh miau avangin lungrual a har ta hle mai. Mizoram ramri chhunga lungrual taka office ṭha leh changtlung tak nena lungrualna ke pên tum a nih mek laia Mizoram pawn lama Mizo Kristiante kohhran mal hming avanga inngaina tak takte pawh ṭhen an ni mek erawh hriatthiam a harsa deuh. Hengte hi CCM office aṭang hian rawn hmu pha ve tak maw? Chhung lama inlungrualna duh a, dawhkan khat kîl za thei khan engati nge pawn lamah dawhkan khat an kil za theih loh tih zawhna lian tak a ni.

Zawhna dang leh

CCM din hma kum tam tak liam taa Mizoram pawna Mizo kohhran nghet taka ding hian Mizoram chhunga kohhran inunauna hi nghet takin a kal thei ngei ang tih chu nghet takin a nem nghet tih a hmuh theih. Chutih rual chuan, Mizorama kohhrante hi NEICC-in nghet tak leh zo takin min phuar khawm a nih si laia he lai Mizoram hmun lian lo têa a bila CCM lo din leh hi eng ngaihtuahna nge ni ang tih zawhna dang leh lian tak awm chu a ni. CCM lo din hma ngei pawhin MKHC nghet takin Mizoramah kan nei a, khangte kha a tawk zo lo em ni? Lungrualna tlanga awm theihna tura ruahmanna siam a nih chuan, engvangin nge Mizoram pawna lungrual taka Mizo inkhawm awmte hi mahni kohhran bila awm tura nawr kher nge kan nih tih lai te chu Mizoram pawna Mizo awmte thinlunga châm reng leh riak reng tawh tur a nih hmel.

Kohhran ziarâng inzirtirna atan kan ti maw?

Mizoram ramri pawna Mizo awm, rinawm taka Pathianni apianga Pathian fak tura Mizo inkhawmna lam pan hram hram ṭhinte hi Mizoram chhunga an awm lai ngei pawha kohhran tana mi ṭangkai, kohhran nghêng reng ṭhinte an ni. Mizoram chhunga kohhran ngheng renga an awmna chu Mizoram ramri an pelh hnuah pawh nghet takin chu nunphung chu an zawm mai zawk a ni. Mizoram chhunga awm a fel lo leh kawhmawh bâwlte bawk hi Mizoram an pelha kawhmawh bâwl leh ṭhinte zawk an nih a rinawm. Mizoram pawna Mizo ringtu ṭha tak awmte hian a tak ngeiin CCM kalphung tura duan conciliar unity hi ataka lo hmang tawhtute an ni zawk a, a hmu chiang zawk leh a hre chiang zawktute an ni ngei ang.

The United Theological College (Pathian thu zirna hmun)-a lo zir chhuak hmasa, pastor-ah pawh kan ngaihsan em em Rev. Dr. Zaihmingthanga te, Revd Chuauṭhuama te leh pastor dang tam takte pawh kha Bangalore Mizo Christian Fellowship-a Pathian faka a kûl ataia ringtu nun ṭhan lenna tura thawktute ngei an lo ni tawh. Vawiina suangtuahna kohhran ziarâng inzirtirna tur atana tia sawi leh ṭawngka lama neih hi tun hma kum tam tak liam taah khan a taka nunpuiin a lo awm daih tawh a; chuvang chuan, kohhran ziarâng inzirtirna atan tia Mizoram pawna kohhran mal din hi ngaihtuah chian leh a ṭul hle awm e.

Chhung lama lungrualna, pawn lama mahni kohhran mal huang zauhna! Bible zirtirna a ni thei ang em?

Lal Isua ṭawngṭaina (Jn 17:20-26)-ah khan, Isua ṭawngṭaina thu pawimawh leh langsar tak mai chu, “an zaa pumkhat an nihna turin,” tih hi a ni. He thu hlawm kal zelah hian, “kei anmahniah, nang keimahah, anni pumkhata an awm a, an famkim theihna turin,” tih kan hmu leh a. He ṭawngṭaina thuah hian ramri chin emaw, huang chin bik emaw neia pumkhatna a neih thu tarlan leh sawi a awm hauh lo niin a hmuh theih. Helai hlawma a sawi pawimawh tak mai chu, “an famkim theihna turin,“ tih hi a ni awm asin. Ramri chin chauha pumkhat nih a, ramri piah lama pumkhat nih leh si loh chu Lal Isua ṭawngṭaina thu a ‚pumkhat‘ nihna nen hian kar a hla hle awm e.

Ti zawng hian sawi ta ila: mahni hmuh theih tualzâl chauhva pumkhat nihna hi pumkhat nihna tak tak a tling zo lo va, ramri piah lam thleng pawha huang bik awm lo. Kohhran bil bik pawh awm lova lungrualna chu lungrualna dik, Lal Isua ṭawngṭaina thu ngei pawh hi a nih zawk a rinawm. Bible, Pathian thu inziahna, ni tina kan ringtu nun ṭhan lenna tur atana kan inzirtirna bu ber, mi dang ṭhiah darh nan leh tihhran nana kan hmang a nih chuan, Bible zirtirna laimu ber rah chhuahtir si loin, kohhran huanga rawngbawltu mihringte duh dan leh ngaihdan dah len zawkna leh dah lal zawkna a ni ngei ang.

CCM hian ngunthluk takin conciliar unity hmanga lungrualna kohhrana a neihtir tur hi ngaihtuah leh se la. He lungrualna hian ramri chin chauh huam lo se la, ramri piah lam thlengin huamtir se la. Kohhran mal hming pua Pathiannia inkhawmna neih aiin Mizo Kristian anga inkhawmna neih hi hmalakna hmasa nei se la, chu chuan Lal Isua zirtirna pumkhat nihna hi a thlen hma zawk ngeiin a rinawm. Pawn lam lungrualna tel lova, chhung lam chauh lungrualna chu Mizo Kristian anga lungrualna dik leh ṭha a ni thei ngai lo vang.

- Theodore R. Fanai