EN TEH, A LO HER CHHUAK LEH DAWN TA!
Hun hi eng lai pawha kal, tu ma chelh din theih loh a ni a. Kan hlim ni a kal muang chuang lo va, kan lungngaih zan pawh a hmanhmawh chuang hek lo. Chu hun her vel chuan kan lawmna ni te, kan hlawhtlin ni te rawn her chhuahpui cháng a nei ṭhin. Hrehawm ti taka kan awm ni leh, kan zah chem chem ni pawh her chhuahpui a hreh chuang lo!
Hma lam hunah beiseina sâng tak leh, lo her chhuak thuai thuai se tih nei chung a, beisei loh zawk lungngaihna leh manganna hmachhawn a, kan hun tawng ṭahpui ni lah bo hek suh.
Lal pian cham a lo her chhuak leh dawn ta a! Lal pian hun pangparte nen, sikni êng boruak ngaihnobei zet leh van boruak thiang, zîng dai fîmte chuan min chen chilh leh tak hi! He hun lawmawm hi kan tan lawmna, Eden kawngkhar hawn leh ni, van zai pawlte'n lei ânchhedawng, mawi elkhêna an rawn awih hun chu, en teh, a lo her chhuak leh dawn ta!
Lei mawinate'n pàr rawn chhuangin, ni êng leh tlai tla èng mawite'n he hun duhawmzia hi an rawn chei mawi leh tak hi! Ṭhenkhat tan chuan chul hnu nun hlui ngaih tizualtu lek an ni ang. He hun lawmawmah hian hnutiang mual liam hnu ngaia mittui lo sêng ta daih pawh an kat nawk ta ve ang. Hringnun hi tuai thar mekte mawi taka an vulna hmun a ni a; hnah hlui erawh an ṭîl a, hrânghlui nihna duhawm loh zet khum ṭan mekte pawh an chuai a. Chuaia chul mekte tan he hun lawmawm leh khawvel mawina rawn vul leh hian awmzia a nei thuk ve tawh lo va, thinlai mu hnu lunglen kai thotu lek an lo ni leh ṭhin!
Hei hi hringnun chu a ni. Hun bithliah chhunga mi nung nihna chanvo khum ve hram hram vek kan ni bawk nen; mawina leh duhawmna te chuan min rawn hnaih ve châng awm mah se, kan tana hla taka a inthiar fihlim hun a lo hnai leh thuai ṭhin. Lal pian hun lawmawm chu a lo her chhuak leh ṭhin dawn a, hringnun khaw êng hmu ve a, vanglai par mawi kan chen theih hunte'n mual an liam a, kan hlim lai zante nun hlui an lo nih zawh tawh chuan, he mi nung ramah hian kan châm rei ve tawk ta tihna a ni mai.
He hun lawmawma kan lo hlimpuite'n dairial an chan tawh a, kan hmangaih leh lung kan rualpuite'n fâm rolung mual an màwi tawh hnu hi chuan, 'En teh, a lo her chhuak leh dawn ta,' tih thu hian lunglen biahthu chauh a ni min rawn hlan!
Mahse, i theih lai hian lawm la, i la zai theih lai hian fak rawh. Zai thei lo leh lunglen pawh hre lo khawpa i tisa a awngrawp ve hma leh, mite'n, ‘tar chhia’' tia an kawh hma che hian chawimawi rawh. Mi hrâng kal hmasate hnung zui a, thlân khur pan ve tur vek kan nih hi! He hun lawmawm hmang thei tura Siamtu zahngaihna zar i la zo ve hi i vanneihzia hre thar la, i lawm zawng ringawt buaipui lovin, mi dangte din hmun thlir chungin lo hmang mawlh teh.
Krismas hlimawmna tem ve pha lo leh a ropuizia ngaihtuah thei lo lêka i bawksawp hunte a lo hnaih a, hawi kir leh tawh ngai lo tura thlân thim i luh ve hma hian, hlimin làwm la Lal lo piang chu. Kan chelh din theih loh he hun her vel hian a rawn her chhuahpui leh ṭhin dawn a; nang erawh chu i chuai hret hret ang a, i vul lai nite an la her liam dawn asin!
He hunah hian Lal thar lo piang lawm nan, tute emaw tan malsawmna lo ni ang che. I duh zawng ringawt leh sual ser nung tih nan lo hmang suh ang che. Krismas lawm leh tur hian hun ṭha i tawng leh tawh ngai lo mai thei asin.
- Mr Rda