ZPM hi ka rin aiin an fing lo

ZPM chhung inkhawma thusawitu Pu Lalnghinglova Hmar chuan, kum hnih naupang chu kal thei tawh an ni, kum nga kan tlin phei chuan kan tlan thei viau tawh ang, tiin, kum hnih chauha upa ZPM sorkarin an la naupang viau chung pawha hmasawnna hna an thawh tam tawh dan a sawi a. Kum nga an tlin ve meuh phei chuan hmasawnna hna tam tak an thawh hman tur chu a sawi a nih kha.

Mizoramah MNF hian kum 17 chhung zet ro an rel tawh chungin Aizawl khawpui lailia awm Assam Rifles te kha an sawn chhuak thei thlawt lo a. Chief Minister hlui Pu Zoramthanga’n AR an sawn chhuah tur thu vawi tam a sawi hnu pawhin awmzia a la nei lo a, anmahni MNF zawk kha ruling an nihna aṭanga tlain an sorkar hun a tawp a, AR ho erawh Lammualah an la inkhuar tlut si a nih kha.

Tichuan, AR sawn chhuah tumtu party lian dang pakhat Congress party hian Mizoramah ro an rel rei fal nalh a, kum 22 chhung zet sorkarna siamtu ni chungin hun an hmang a ni. Anni pawh hian AR sawn chhuah hi mutmawh hnarmawhah an nei ve tho nia ngaih theihin vawi tam AR sawn chhuah an nih tur thu hi an puang ve bawk a. Mahse, Aizawl khawpui laili aṭanga Assam Rifles sawn chhuah chu a awlsam lo hle a ni ang, Pu Lal Thanhawla meuh pawhin AR ho kha a sawn chhuak thei lo a. An sorkar tawp hnu, MNF sorkar leh hnu thleng pawhin an awm ngaiin an la awm ṭhup a. Mizo mipuite pawhin Lammual aṭanga AR sawn chhuah hi thil theih loh tlukah kan ngai hman hial a ni.

Tichuan, political party tharlâm tak ZPM chuan MLA 27 lai mai neiin rin loh tak maiin Mizoramah mipui sorkar an rawn siam thei mial a. A tira ka rin loh ang aiin hma an rawn la chak a. Aikal lak tihtawp, man chawi lova damdawiin awm theihna MUHCS, kuhva smuggling tihtawp, mitthi ruang a thlawna phurhsak, party thliar lova thali thar lei, sorkar hna lak fair ta em em mai, etc. an rawn kal pui miah miah mai a, sawi kim vek sen a ni lo ang. Hetianga thil ṭha tih hi tu pawh sorkar se sorkar tih tur ve reng a ni a, kei chuan fak an ṭulna pawh ka hre lo.

Tunah kum hnih chhung chauh sorkarna fawng an vuan chunga ZPM sorkar thil ṭha tih tam tak kan chhuan em em pawh hi a ṭha ka ti lo a; a chhan ber nia lang pawh tun hmaa sorkarna lo siam tawhtute thiam loh niin ka hria.

ZPM hun hmaa sorkarna siam tawhtute a bikin, Congress leh MNF hi kan ti bik teh ang, anni khan hna ṭha tam tak pawh an thawk ve teh meuh mai. Mahse, mipui beisei an pha lo lutuk a, tunah ZPM-in kum hnih chhung lekin hna tam tak an rawn thawk mai si a. Hei vang hian ZPM hi Zoram mipuiah an mark a ṭhat phah ta mai mai niin ka hria. Ka sawi tum ber chu, ZPM hi i fak chiam chiam lo ang u, sorkar ṭhain a tih tur dik tak ZPM hian an rawn ti ṭan chauh a ni mai a, i fak hluai lo ang u ka ti a ni.

Ka sawi tum ber pakhat hi a tawpah ka sawi thei dawn chauh a nih hmel, ka ziak sei peih si lo. Ka sawi tum chu, ZPM sorkar hian hna chu an la thawk ṭha viau pawh a ni thei e, he lam chu lo dah ṭha ta ila.

Pu Tetea Hmar sawi kha ka sawi tum leh ka tuihnih châk ber lai chu a ni. ZPM sorkar hian Mizorama kan party neih ṭhat leh hlun ber ber ni ṭhin MNF leh Congress te pawhin an tih theih miah loh Aizawl khawpui chhung aṭanga AR sawn chhuah chu a takin an rawn tihlawhtling a. March, 2025 khan Union Home Minister Amit Shah hoin AR ho chu kan khawpui chhung aṭangin kan chhuahtir ta a nih kha. Mizo hnam pumpui mutàn ang hiala AR kan sawn chhuah theih loh hnuah ZPM sorkarna kum hnih pawh a la pumhlum hmain Assam Rifles chu an chhuak ta mai si a; tu nge fak ber tur ka hre chiang lo nângin, a taka sawn chhuaktu ZPM hi kei chuan ka mawhpuh ber mai. Congress emaw, MNF emaw sorkar kal tawhte thawh rah nia sawi daih hi a rem ka ti lem lo.

ZPM sorkar chuan Assam Rifles chu an sawn chhuak ta ngei a, an chhuahsan tak hmun ruak enkawla sawngbawl zui dan tur ruahmanna pawh an siam fel leh der tawh a ni. Heti chung hian ZPM chuan kan khawpui chhung aṭanga AR an sawn chhuah avanga hnehna kawngzawh emaw, ruaiṭheh emaw pawh an buatsaih lo a, ngawi renga an awm mai hi an fel vanga nge an mâwl vang tih ka hrethiam lo a ni.

AR sawn chhuah hi ZPM party mi leh sa tan chauh a ni bik lo, Zoram mipui zawng zawng tan thil ṭha leh chhinchhiah tlak a nih tehlul nen, ZPM party-te’n an ngawih ralpui mai mai tur hi chu ka lo ui pui ve a ni.

Hetia ka sawi hian ZPM hi an fel lutuk ka tihna a ni lo a nia; an fel vang lam a nih pawh ka ring chiah lo. A chhan chu, thil dang pawimawh lem loah pawh thawm an chhuah vak vak tho a, tuna thil lian tham lutuk AR sawn chhuah an sorkar laia an han tihlawhtling ta an ngawih bopui mai tur hi mak ka tih piah lamah engtin emaw tal a lawmna an siam lo hi an mawl ka ti a ni.

MNF leh Congress party-te khan ruling an nih lai khan Assam Rifles hi sawn chhuak ngat se, tuna ZPM party worker-te ang hian an ngawi mai maiin ka ring lo. Vanapa Hall kawtah Aizawl khawpui traffic tibuai map map khawpin AR chhuah lawmna hun hi an hman ngei ka ring a, chu chu thil tih awm tak pawh a ni bawkin ka hria.

- Chda Lyzo