Halpuah hi ZPM khap a ni lo

Halpuah leh halmawi khap hi sawisel emaw, sawimawi ka tum hran lo. Halpuah leh halmawi khap hi zu khap ang chiahin, a ṭan zawng leh ṭan lo zawnga sawi thei mi eng emaw zat an awmve vein a rinawm.

Ka sawi tum ber chu halpuah leh halmawi hi ZPM khap a ni lo tih hi a ni. Halpuah leh halmawi hi Congress Party sorkar hunlaia khap kha a ni a, mipui pawhin an zawm chho viau. A kum ka hre tawh lo, halna hmun bik leh hun bik neia hal phal a nih hnuah erawh khap chhunzawm zel nimah se, a hlawhtling tak tak thei tawh lo.

Inthlanah Congress Party an tla a, MNF-in sorkarna an chang a nih kha. MNF kum nga an sorkar chhung zawng khan halpuah leh halmawi kumtin an khap chhunzawm ve leh a ni. A hlawhtlinna chin awm mah se, a hlawhtling tawk lo hle. MNF tlain, ZPM an rawn sorkar veleh a, ZPM pawhin halpuah leh halmawi khap hi an rawn chhunzawm ve leh a ni.

ZPM hi publicity-ah an ṭha tawk lo nge, thil sawi an thiam tawk lo ni. Tun dinhmunah chuan ZPM sorkar hunlai aṭang chauha halpuah leh halmawi hi khap nia ngaih theih turin thawm a ri ta lek lek mai. Tun dinhmunah chuan halpuah leh halmawi khaptu chu ZPM sorkar a ni teh meuh mai. Chutihrualin, ZPM sorkar hian Congress leh MNF hunlaia an khap ṭhin kha an chhunzawm ve mai a ni.

Tuna halpuah leh halmawi khap sawiseltu tam ber hi chu MNF leh Congress sorkar laia khap a nih a sawisel lemlotute kha an niin ka ring. Chutihrualin, eng sorkar hunlai pawha halpuah leh halmawi khap ṭul ti lote pawh mi eng emaw zat chu an awmin a rinawm. An sorkar laia khap a niha sawisel lem lo, an sorkar loh hnua khap sawiselte erawh an demawm hlein ka hria.

Ka sawi tawh angin, khap sawimawi emaw, sawisel ka tum lem lo. Halpuah leh halmawi khap a nih chhoh dan hi ṭhangthar zawkte'n an hre lo ang tih ka hlau a ni. Politics a nih avanga inpuhmawh tum reng ringawt hi thil ṭha a ni lo. An sorkar laia halpuah leh halmawi khap ṭha titute chuan an sorkar loh hnuah pawh ṭha an ti tho turah ka ngai. Chu chu mi pangngai rilru tur a ni.

- Lalsiamliana