Krismas, Patea rilrua a lan dan

Thlasik ni ngang a ni a, chawhnu herah chuan ni chu a lang dul reih a, tlai ni tla tur chuan Lurh tlang pang pêr, tlâk dêng lam chu a chhun a, a lang hnîm riai a. Chu Lurh tlang pangah chuan mawi em emin tlaizawng a lo par vul chûk a. Patea chuan Thekte khaw lal in aṭang chuan Lurh tlang bâwmtu tlaizawng par chu a thir vang vang a. Tlaizawng par leh thlasik khaw vawt ruih mai chuan a lunglen a kai tho a, a ke vei lamin lal in kaiṭên chu a rap a, a per dat dat a. A han rûm deuh vang vang a, “Lal pian hun pangpar a vul leh ta, thinlai mu hnu lunglen a kai tho ve” tiin Christmas hla chul tawh ngai lo tur chu a phuah chhuak ta a ni.

Ni, thlasik rim a han nam a, Christmas a lo her chhuah dawn meuh chuan a mi deh dan a dang zar ṭhin. Hun liam tawh hnu kan chhui kir a, ṭhenrualte nena hlim taka he hun kan hman ho lai te mitthlaah a lo lang zut zut a. Kan hmangaih kal tate rilruah an lo thar a, kan suangtuahna chuan hla takah min hruai ṭhin. Bethlehem leh ran thlenga nausen Isua ngaia lungleng pawh kan ni chiah lo. Thlasik khaw thiang tak hnuaia leilung lan dan chuan lunglen a kai tho a, thlasik khaw vawt a reh rualin kan tisa lunglenna leh mangphan ram te chu romeiah a zâm ral leh mai ṭhin.

Patea zawng chutiang a ni ve lo ve. Thlasik ni êng hnuaia khawvel mawina te, tlaizawng par leh tlangsam par te chuan a tisa lunglenna chawk tho bawk mah se, a lunglenna kai thotu ber leh a thlarau nun ram ngaih ber chu Bethlehem leh a chhunga nausen Isua chu a ni tlat mai. A suangtuahna chuan engtik lai mahin Bethlehem tlang a kiansan ngai lo a, a hla chang hnihnaah chuan,

Ngaih a nâ e, Bethlehem tlangpui,

Tlai ni tla eng lenkawl a khûm riai e;

Bawng in tlawma ka Lal riangvai tak saw,

A chûn riang Mari’n a chawi e.

tiin a rûm chhuak vawng vawng mai.

Patea hian a Lal pianna hmun Bethelhem a ngai tak zet a, a thlahlel ngawih ngawih a, a thlarau chuan ṭap chungin chu hmun chu a zawng ruai ruai ṭhin.

Aw, nang Bethlehem, ka va ngai tak che em!

I tlang chunga hruaitu arsi eng chu;

Ṭapin ka rawn zawng zel ang che,

Ka Lal pianna lei hmun tlawm ber chu.

a ti vang vang mai.

Patea hian Bethlehem khua hi vawi khat mah a hmu lo; mahse, a ngai em em bawk si. Patea’n heti taka Bethlehem a ngai a, a thlahlel hi eng dang vang mah a ni lo, a Lal pianna lei hmun tlawm a nih vang chauh a ni. Patea kha a dam lai khan, ‘Hawh teh, khawvela i hmuh chak ber ramah ka hruai ang che, i fang dun teh ang,’ ti ila, Paris khawpui emaw, New York kawtthler a fan châk ka ring lo. Hniak phawi eih loin, ‘Judai ram Betlehem khuaah i kal ang hmiang’ a tih ka ring ṭhin. Theih ni se berampute ruala kal ve tak a nâp a nih hi maw le:

Ka lal zan chamna hmun aw, ka va ngai zual ṭhin em!

Berampu ruala kal ka nuam, Bethlehem tlang chungah

a ti hial mai.

Patea khan khawi college aṭang mahin eng degree mah a sual chhuak lo a, chu ahnehin ziak leh chhiar a thiam ngawr ngawr chauh a ni. Mahse, khati chung khan Kristiante tana Christmas hlutzia hi a va hre thûkin a va hre fuh kher em! Sual vangin Pathian nen kan inmihran a, kan tan Eden khawngkhar chu kharin a lo awm ta. Chu Eden kawngkhar chu hawng leh turin amah Krista ngei chu khawvelah a lo kal a, Bethlehem ran inah, ran thlengah bul a rawn ṭan a, kan tan Eden kawngkhar chu a rawn hawng leh ta!

Chatuan Salem kawngkhar ropui chu,

Kan tan a rawn hawng leh ta e;

Boralna rama leng tawh hnu kha,

Van khua min chantir a;

Lawmin i zai ang Lal thar a piang ta,

Lei hi chatuan hla mawiin nghawr vel rawh se.

Ngaihtuah chian chuan Christmas hi kan tan hian a hlu tak mang e aw! “Keini zawng kan chan bik hi kan van nei e” tia hlim a, lâm a, zuang tawr tawr tur kan va ni em! Chu a hnehin Christmas denchhenin hlimhlawp kan bâwl a, kan intuituah a, Christmas hi kût (festival) chi khat ang lekah kan ngai titih ta. A buk ṭhelhin kan ṭhelh a ni.

Patea erawhin Christmas ropuina hi a hmu chiang ngang mai. A duhthawh lutuk chuan khawvela thil nung zawng zawng leh tuifinriata nunna nei zawng zawng hian aw chhuah se, Amah fakna zai ri chuan leilung leh tuifinriat hi luah khat vek se a duh a ni.

A fak hla nawn ru,

Van mipui Seraf-te’n,

Tuifinriat leh khawvel zawng hi,

Zaiin khat se, Haleluiah.

Ngaihtuah chian poh leh a makna hi a zual ting mai a ni. Van lal fapa, Zion roreltu, van mipuite’n an fak nin loh chu mihringte tlan turin khawvelah a lo kal a. Engkim siamtu chu a thil siam mihringah a rawn chang a, ropuina zawng zawng neitu chu hmun tlâwm ber ran thlengah a lo piang a, nunna siamtu chu thing ânchhedawngah khai kânin a awm ta. Engtia awm thei nge ni le?

Lal ber te lal ber,

Leh Zion roreltu,

Engtia awm thei nge mihringa’n?

A hmangaih a va mak em!

Patea thinlung hi ṭâwmpuiin, Patea thirna tlang aṭang hian han thir ve ila, chhamdamtu hi kan fak lo thei dawn em ni?

- K Lalrinchhana