Hriselna ngaih pawimawh a ngai
Tun hnai khan Urban Development & Poverty Alleviation (UDPA) chuan Aizawl Smart City Limited kaltlangin sawrkar damdawi in lûn ber Civil Hospital, Aizawl tan khawl thar pahnih–Anesthesia Workstation leh Upper Gastrointestinal Video Endoscope Unit an pe a, hei hi sawi zui loh atan chuan a uiawm deuh ka ti.
Anesthesia Workstation hi cheng nuai 35.70 man a ni a, Upper Gastrointestinal Video Endoscope Unit-te chu cheng nuai 22 man a ni. Health Minister thusawi aṭanga ka lo hriat dan chuan, Aizawl Smart City Limited-in Civil Hospital, Aizawl hnena khawl a pek tawhte chu mipuiin an hmang ṭangkai hle a, MRI khawl ringawtah pawh kumin June thla aṭang khan mi 1,300 en an ni tawh a, khawl thar changkang tak tak an neih avangin thawktute pawh an phur hle, tih a ni.
Tun hma deuh khan Aizawl Smart City-in Civil Hospital, Aizawl hnena MRI leh khawl dang 24 an lo pe tawh bawk a. Heng khawlte hi mipuiin ṭangkai takin an hmang a, a hria a chhawrtute vek kan nih avangin a ṭangkaizia chu inhrilh nawn pawh a ngai kher lo ang.
Aizawl Smart City hian hmasawnna tur sum tam tak a nei a, tun hma deuh kha chuan a hman chhuahna kha a danglam. Smart City sumte khan eng eng emaw atan chuan an hmang ngei mai a, hotute chuan hmasawnna tur pawh an ngaihtuah ngei mai. Mahse, hmasawnna leh changkanna tura an ngaih, sum tam tak an senna te kha mipui nawlpui tana ṭangkai lem lote pawh a awm niin a lang. Aizawla pelican crossing traffic light tam tak vuahte hi Smart City sum hmanga vuah niin ka hria, sum sen zat pawh a tam viau ang. Mahse, kan hmang ṭangkai lo hulhual a, hmun ṭhenkhatah phei chuan a bante hi a hnawk zawk hial. Aizawl khawpuiah hetiang thilte hi hman ve a remchang lo tihte an ngaihtuah thleng lo a ni ngei ang.
Tuna kan sorkar hrawn mek erawh hi chuan hmasawnna hrang hrang zingah hriselna atan a hmang tam ta malh malh hle niin a lang a. Aizawl Smart City aṭang pawhin cheng tam tak sengin hriselna lama inenkawlna lam tihhmasawnna tur khawl tam tak an ngaihtuah hi a fuh ka ti cher cher hle. Hei hian rah ṭha pawh a chhuah ngei ka ring.
Aizawl Smart City sum hmanga damdawi lam khawl tharte hi mipuite’n ṭangkai takin hma leh se la; a bik takin mi rethei leh khawsak harsa zawkte tan a ṭangkai dawn avangin a hlu zual hle ang tih a rin theih.
Mi hrisel lo chuan hna a thawk thei lo a, sum leh pai a thawk chhuak thei lo. Chuvangin, ram leh hnamin hma a sawn dawn chuan mipui kan hrisel a ngai; Mizoram pawhin hriselna kan ngaih pawimawh hmasak hi a ngai a ni.
- Lala, Aizawl