AMC leh Property Tax
Thla thar maiah AMC kan inthlang leh dawn ta reng mai. AMC hian Property tax hi ṭhahnem ngai takin a khawn a, Aizawla a hminga in nei dek dek chuan an pe vek a ni. Property tax aṭang hian a inrelbawlna bakah Property tax return an tih mai, mipui hnena pek let eng emaw zat a nei thei bawk a ni. Aizawla cheng, Property tax pe te hi kan thikthu a chhe lo hle mai a, kan tax pekte khawiah nge a kal a, engti anga hman ral nge a nih tihte hi chik ve deuh ila, thikthu tichhe ve deuh ila a ṭha awm e.
Tuna Property tax hman danah hi chuan mipuite hnena pek let, Property tax return an tih mai hi party mite induhsakna, mipui chhiah pekkhawm lo insem ve theihna tur kawng inhawnsakna mai niin a lang. A thuah chuan Ward tinah Ward committee an awm a, anni hian a hmanna tur bakah a en zuite pawh an mawhphurhna a ni awm e.
Mahse ward committee hi khawi ward-ah mah a nih dan tur angin a function lo a, rûn dalah a awm ve mai mai niin a lang ber. Keini hi Ward No VI huam chhunga cheng kan ni a, Property tax return an hman dante ka han zawt dilchhut mai mai a, A MAK a ni tawp. Corporator-in ama duh dana a hman tur chin a hauh a, Ward committee kal tlangin Local council ten ṭul an tih an thawk ve bawk a. Corporator hian ami duhsak zawng Party mite a thawhtir hlawm a, LC te pawhin an chanpual an thawk hlawm.
Heta thil MAK LEHZUAL lo awm ta chu, a hna hi tu ma'n estimate an siam lo a, endiktu an awm bawk lo a, a hna thawktuin awm tawk a tih leh Corporator thu thu kha a ni ringawt mai a ni. Kan tax pek khawm aṭanga hna thawhte kan ward chhunga mi ka han bih dilchhut mai mai a, nuai khata an thawhte chu engineer, estimate siam ṭhinte ngei ka han zawt ru dek dek a, anni pawhin sing nga bak a bill theih loh ang an ti ta reng a ni.
Hetianga hna leh sum sen inmil lo hi a tam hle ang tih a hriat mai a, Property tax ber kher, direct taka tax kan pek hetianga pawngsual a ni mai hi chu a fel lo hle a ni. Kan awmna Ward bak ka hre lo a, mahse an hna sem dan leh estimate, monitoring tih vel hi chu Ward tinah an kalphung a lo inang deuh vek a, a zialo lam deuh chu a ni e.
Property tax return kan hman dan kalphung hi siam ṭhat min tiam ngam party an awm em aw…? An awm chuan kei chu ka vote chak tur chi tak an ni ang.
- Mathana Hunthar