ISUA ṬANTU

2026 kum thar kan lo thleng leh ta a, Pathian khawngaihna a ni. Kum hlui kha engtin nge kan hman liam tâk tih ngaihtuah ila, kan lung a awi ang em? Kum khat chhunga kan nun kha lehkhabu pakhat lo ni dawn ta se, ziah ṭhat duh lai kan nei ang em? He kum thar hi kan hlut lehzual phah deuh thei ang em? Chu lehkhabu chu chhiar lo ni ta se la, “Mite’n tu nge a nih?” min tih ang?

Isua khan hriat a nih dan kha a ngai pawimawh hle. Kaisara Philippi khuaah a kianga mite leh an chhehvela awm, amah lo hmu ṭhintute khan engtin nge an lo hriat tih a zawt a. He lai hmun aṭang hian a rawngbawl leh tih dan a inthlak ṭan a. Jerusalem lam an hawi ṭanna niin, kohhran din chungchang lan chhoh ṭanna a ni bawk.

‘Mihring Fapa’ tih hi Chanchin Ṭha ziaktuten Messia nihna atân an bel a, amah pawhin a pawm. A lo lâr zêl tâkah khân an ngaisâng hle a, an hriat dân erawh a la chiang lo, Baptistu Johana emaw, Elija tihte kha an rin dân tam ber a ni a; Matthaia chuan, ‘Jeremia’ a ti.

Isua chuan a kianga awm reng, a zirtîrte ngaih dân hriat a duh a. Petera chhanna kan hmuh zinga a dik bera ngaih, “Krista chu i ni,” tih hi vân lam aṭanga pêk a nih thu Isuan a sawi a, a dik ang. Zirtîrte leh mi ṭhenkhat chuan Isua kha Messia a ni tih an pawm tawh a. ‘Krista’ tih pawh hi Messia nihna tho niin, Matthaia’n, ‘Pathian nung fapa’ a ti pawh khan Messia ṭhami-ah a ngaihzia a tarlang bawk. Isua chu a hmutute’n an hria a, a nihna dik tak an sawi thei a ni.

Isua hi kan lo hmu ve tawh em? Krismas kan hmang zo chiah a, Isua a tel em? Keimahnia lal lo piang thar chibai bûktute chu kan danglam tur a ni. Hmeithai, anni chuan Jerusalem Temple-ah Isua a hmu a, chhanchhuahna beiseitu apiangte hnenah Isua chanchin a hrilh chhunzawm thei nghal a nia.

Petera theihna ni lovin Isua a hriatna zawk kha a pawimawh a, kohhran dinnaa hmahruaitu ber a nih phah ta hial a ni. Kohhran lungphum ni mah se, innghahna Krista a la mamawh tho. He leia Pathian ram a lo lan theihna tur atana kohhran din nan Krista’n a hmang ṭangkai a ni. Hriatna dik aṭangin Isua rawngbawlna a lo danglam thei a. Kohhran–Pathian ram–Pathian duh zâwng tihhlawhtlin a nihna hmun a lo piang chhuak ta a ni.

Ringtute hian kan chatuan hmun dik thleng turin keimahni leh kan tun hun ṭheuh hi kan hriat chian a ngai. Pathianah tu nge kan nih tih inhriatna dik chhar chhuah hi harhna hlu berte zinga mi a ni. Miin a nihna dik tak a hriat a, amah siamtu, Pathian a hmuh fiah tawh chinah chuan chibai bûk mai loh chu tih tur dang a nei thei tawh lo. Thuawihna, Pathian duh zâwng tihpuitlinna a ni.

John Piper chuan, “Kohhran thiltum pawimawh ber chu mission a ni lo. Pathian chibai bûk hi a ni. Pathian chibai bûkna a awm loh avângin mission hi a lo awm a ni zâwk,” a ti a. A pawimawh hle a ni. Pathian hi chibai kan bûk tlat tur a ni a, kan Pathian chibai bûkna hi mi dangin min zawm ve theihna turin kan thawk tur a lo ni zawk. Richard A Norris pawhin, “Mission, rawngbâwlna kan tih hi keimahni tana Pathian thutiam a famkima kan chan theihna tur atana van ram kawng zawh zel hi a ni,” a ti bawk a; ringtu nun, Pathian chibai bûkna tho min kawh hmuh a tum a ni.

Kohhranhote hian thu chauh ni lovin, nun leh thiltih, kan engkim hmanga ‘Pathian chibai bûk’ hi kan nih dan tur leh mawhphurhna a ni a, hriatna dik neih a ngai bawk. Isua ṭantu nihna a ni a, 2026 atana hriat kan nih dan a lo nih thar zel theihna turin Pathianin min khawngaih ṭheuh rawh se.

- H. Lalroluahpuia