TLAWMNGAI PAWL INDIN THUAH HI

Eng group-ah emaw ni, Siahaa YMA branch din chungchanga Central YMA President thusawi khal ang reng tak ka lo hmu a; YMA zah tak chungin ngaihdan ka’n sawi teh ang.

Kan rama NGO lian leh ṭangkai ber chu YMA a ni tih kan hre ṭheuh a. Hetih lai hian, Mizoram zim têah hian culture, nihphung leh ze hran nei, ṭawng pawh nei hrang tlemte kan nei a; e.g, Lai, Mara, Hmar, Bru leh Chakma thlengin. Heng kan unaute zingah hian Lai, Mara leh Chakma te hi ram leh inenkawl bikna ADC nei an ni a; Six Schedule hnuaiah ni lo mah sela Hmarte pawhin eng emaw chen inenkawlna Council an nei ve bawk.

Heng kan unaute hian anmahniah NGO ṭangkai tak an nei ṭheuh a; chutih laiin, an awmna area hi Mizoram chhung a nih tho avangin YMA, MHIP te pawh an lo ding ve zel ta bawk. Area leh ram chin bik neia inngaite leh mi dangte pawhin chutianga kan ngaih tho an nih avangin heng pawl ropui tak (ti ang aw) YMA leh MHIP angte hi chu din thuah lo zawk ila, an zinga awmte pawhin anmahni pawl–MTP, YLA etc ahte lungawi takin awm ve zir zawk se la, a tha ngawt ang.

Zirlai pawl erawh hi chu sawi thiam a harsa deuh a, Aizawlah MSO, LSA, PZP, etc pawh an awm a, a sual lo ve. MZP a awm reng chungin MSU pawh kan nei tho a nih hi. Siahaa YMA branch chungchanga kan zah tak CYMA President meuhin khati taka a tuang a tithur kha chu a zialo lam deuh a ni.

Kan ram zim têah hian mi tlemte kan awm a, inzah tawn hlawm ila a ṭha ngawt ang. Tun hma deuh khan nuihza fiamthu sawinaah, 'Saw lam chuan chutiangin an ti' tih vel kha a awm ṭhin a, ṭhenkhatin kan nuihpui laiin, nui ve thei lo an awm tih hriat thar leh pawh a ṭha viau ang. Tunah chuan khatiang thil kha a awm ta lo va, a ṭha hle.

Tlawmngai pawl indin thuah hi phal loh ngawt theih a ni hauh lo, ṭangkaina chin pawh an nei ang. Chutih laiin, hnawk deuh hlekna chin pawh a awm thei. Sawrkar lam tan pawh ṭanpuina eng eng emaw te, ram leh hmun thuhmunah a double-a sen deuh a ngaihna chin a awm mai thei.

Ngaihdan a tam, pawm dan a tam tih karah tute pawhin thlir dan chi khat chauh a awm lo tih kan hre ṭheuh awm e. A rei tawh viau mai a, chhim tawp thlang lam ni ta awm e, tlema hmun kilkhawr deuh taka YMA dintu pakhat chawimawina dawng a awm niin an sawi a. Chawimawna dawng meuh kha, ṭhenkhat chuan ṭhalaite lungrualna tichhetu angah an ngai ve tho mai. A hmuna mite chuan an ngaisang lua lem lo niin an sawi.

Mizoram hi a zîm viau nâin, mi chi hrang hrang kan cheng ve tlat si. Mi tlem deuh te, a kilkhawr lam deuhva awmte nunphung leh rilru puthmangte inhriatpui vek thei lo mah ila, inzah tawn ila, kan zavai a mawina leh hlim tlanna a nih a rinawm. Kohhranah erawh chuan Bible pakhat ring mah ila, min hringtu mission pawl hran avang leh thurin leh tih dan (faith and practices) inan loh deuh avangtein pawl hrangin kan awm ta nual zawng a nih hi. Zirlai pawl ni lo, tlawmngai pawl inawm thuah hi chu ngaihtuah nawn deuh a ṭhain a rinawm.

- Rev. Lalbiaksanga Chinzah.