ZOOM

He thumal, tunhma rei tak chhunga mi nawlpui tana awmze nei lem lo leh tunah erawh kan nitin hun hmanna tam taka kan hman rim em em ni si hi engemaw lai atang khan ziak tumin ngaihtuahna ka seng leh zauh thin a, ka puitlin har phian lawi a!

2026 kumthar fatu laia kan thlalak leh ruaitheh lai leh ruaitheh hnu lama kan thlalak, thiante nena kan ena mahni theuh kan in zoom hmasak ber vek rualin ka rilruah a lo lang nawn a, ka’n ziak leh ta rawih anih hi.

He thumal ‘zoom’ kan hmanna ber leh inkungkaih tlat chu thlalak hi a ni ber mai. Hetia mi nawlpuiin phone changkang chi hmanga thla kan lak theih tak vek hnu, duh zat zat kan hmeha duh loh apiang paih tura kan inbuatsaihnaah hian he thumal hi a va pawimawh tehlul em!

Thla kan han la a, mobile phone hmangin; kan lak zawh chiaha kan tih hmasak ber chu ‘zoom’ hi a ni vek mai ti ila ka sawi uar lutuk lovin ka ring. Mahni chauha kan la anih pawhin kan inenchiang duh a, ka hmaibawl, ka hmai chuar, ka mitmeng, ka dulkiar, tih vel leh kan landan chitin mai chu uluk em emin kan bih chiang a, a changin kan lawm a, a changin kan lawm lova. A huho, chhungkua, ṭhianho leh pawl anga kan lakah lah kan zoom hmasak ber chu keimahni bik kha a lo ni leh a, kan lang tha em tih kan endik hmasa ṭhin. Hetianga uluk taka mahni kan inenchiana kan lungawi pui chu kan dahṭha a, kan lungawi pui vak loh chu kan paih thung a. Midang lan ṭhat leh ṭhat loh lam chu ngaihven lutuk lovin mahni lan ṭhatna ber nia kan hriat chu hmun hran hranah kan suan kual ta ṭhin anih hi.

Phone changkang kan neih fur a, thiamna ṭhang zel nena ṭangkawpa kan nihna aia lang mawi tura kan thlalak kan cheibawl te, kan duh anga kan lan ṭhat lohna apiang kan paih theih hma kha chuan, kan thlalakah pawh khan kan nihna ang angin kan lang a, lang chhia kan inti deuh anih pawhin tihngaihna dang a awm chuang lo. Thlalatu man neia kan koh, a roll film a hmeh zawh hmaa kan thlalak chhuak thei lo kan nghahhlelh ṭhin zia leh a lo chhuak ta chèng a, kan lawm leh vak si loh ṭum te kha a va tam ve thei tak!

Tichuan, kan tun huna thlalak duh duha kan cheibawl theih tak hnu, cheibawl tura keimahni kan in zoom tak reng hunah hian kan chezia leh nunphung atanga ngaihtuah zui theih hi a lo lang leh ta zut mai anih chu (ninawm hian)!

Miin min hmuh dan tur, kan hmel leh pianzia landan hi kan uluk a, kan zoom a, a tha lo lai apiang kan ‘edit’ a, kan hmaibawl te thupin kan dulkiar te kan hlawi ṭhen thin hian pawnlam landan kan dah hmasak zia a tilang hle. Mahni nihna aia lan that duh mihring, mahni nihna zahpui ching leh pawnlam lang thei mawina zawng kan ni tih hi kan in zoom vak vak thinna hian a pho lang hle. Hei hi thil tha lo a ni tihna erawh a ni chuang lo. Midang hmuha lan that te, lan mawi te tak ngial pawh kan peih lo anih chuan mahni kan inenlet a ngai viau tawh a ni thei ve leh tho lawi a.

‘Zoom’ hmanga kan lan dan lawma lawm lo thin keini ho hian zir tur pawimawh tak mai kan nei a lo ni reng mai.

Mahni kan in zoom hian kan lang tha em, ka duhthu ka sam em, mi hmuh atan ka chhe bik em? tihte kan ngaihtuah a ni ber a. Kan thlalakpui midang kan zoom ve anih pawhin mahni ber lan ṭhatna tho kha kan pho chhuak leh thin. Mahni hmasial mihring kan ni miau va. Midang an lang tha em tihah kan buai lem lova, mi hmuha an lan mawi loh kan venpui tel hek lo.

Kan nitin khawsak leh midang nena kan inlaichinnaah hian ‘zoom’ tur dik hi hriat a va ngai em! Mahni in zoom hi mawi taka kan thlalak mi hmuha pho chhuah tur kan thlanna atan chauh ni lo sela, kan nungchang leh chezia, kan tawngkam leh rilru puthmang te hi zoom ve thinin a tul angin ‘edit’ ve ang u. Bawl deuh, chuar deuh leh puar deuh, mi mit tikham thei zia leh tawngkam te hi kan lo hmang fo thin lo maw? Mahniin kan lungawipui kan tawngkam leh chezia hi midang tana kha leh lungawipui harsa a ni thei ang em?

Thlalaka midang that lohna lai ngaipawimawh miah lova mahni thatna lai kan pho chhuah lai hian chenho leh inlaichinnaah erawh chuan midang zia kan zoom vak vak a, an that lohna lai kan hmuh kán duh leh miah si lo. Mahni ze thalo leh midang tana ngainatawm lo zia kan neih hre turin kan in zoom duh lova, thlalaka kan mawi lo lai hmuh tuma kan in zoom vak vak ang kha midang nena inlaichinna atan pawh a pawimawh a ni tih kan ngaihtuah ngai lova, mahni inhrechiang turin ‘zoom’ kan hmang duh leh hauh lo thung.

Phone changkanga thla kan lak chuan duh zat zat lain, zoom hnuah kan duh apiang kan dahthain kan paih a, kan pho chhuakin kan thup thei. Mahse kan nitin khawsak leh nundan, kan tawngkam leh chetzia te hi enleta, a ṭha lai dahṭhata duh loh lai paih bo theih a nih ve loh avang hian a theih chin chinah ulukin mahni inzoom hmasa ila, midang tana ngainatawm lo leh mi tilunghnur thei keimahniah a awm em tih ngaihtuah thin ang u.

A huhova cheng tura duan mihringte hian a theih phawt chuan keimahni lam tal hi, thlalakah chauh ni lovin, kan rilru puthmang, tawngkam leh chetze tinreng hi kan tihlana kan pho chhuah hmain uluk taka zoom hmasain midang hmuh leh hriat atana tha lo thei tur apiang ‘edit’ hmasa thin ang u.

- Dikteii Hnamte