Kumtharah kawng ṭha zawk

Mizoramah rel a lut a, ei leh bar lakluh kawngah nasa takin hma kan sawm phah ngei dawn. Chutihrualin fur hma ngeiin Mizoram chak khai lakluhna (supply line) kawngpui ber National Highway 06 (NH 06), Aizawl-Silchar National Highway hi ngaihthah a thiang lo.

Kawng chhe lai hi khawih mek a ni a, a ṭha law lawa an siam a pawimawh hle. NH06 kawngpuiah hian lirthei rit tak tak phurin an zawh reng avangin a chhe chak hle a, fur ruahtui tlak tam phei chuan lirthei kal tlang theih loh khawpin harsatna a thleng ṭhin. Kumin furah chuan kawng ṭha a beisei ngam ang.

Aizawl khawpui chhung kawng lam pawh ngaihthah a thiang lo a, siam ṭhat mek zel a ni bawk. Khawpui laili lam kawng khawih zawh thawhkhat a ni tawh a, PHE lamin pipe line an phum avangin a ṭha tawh sa a chhe chho leh bawk.

Bawngkawn kawng ṭha tak pawh PHE lam pipe phum vangin a chhe leh turah a ngaih theih a, motor jam tamna lai a nih avangin hemi kawnga tlan ṭhin tan chuan a huphurhawm hle. Chutihrualin kawng lai chhiatte hi rang taka thawm ṭhat a ni a, thawm ṭhat satliah a nih avangin hun rei daih tur a ni lo thung. Sorkar lamin an ngaihven ṭhat a pawimawh ang.

Kawng ṭha kan mamawh ang bawkin tui mamawhna a sang a, PHE lam hian mipui harsatna thlen an tum a ni lo. Mipuiten tui hniang hnar taka an dawn theih nan hma an la zawk a, hmasawnna lam tho a ni. Nakina atana kan nawmsakna tur a nih chuan mipui tan pawh dawh theih a ṭul hle.

Khawpui chhung kawng a ziaawm viau lai hian khawpui chhung intlan pawhna kawng pawimawh tak World Bank Road lam a chhe tawh hle. He kawng hi hmang ṭangkaitu an ṭhathnem avangin ngaih pawimawh a ṭul. Sorkar tan siam ṭhat vek theih a nih loh pawhin a chhe zual lai siam ṭhat a pawimawh ang.

Hmasawnna a rual theih nan kawng a pawimawh a, khawpui chauh ni loin thingtlang lam thlengin inkal pawhna a ṭhat a ṭul. Kawng a ṭhat chuan kan loneitute thlai thar te awlsam zawkin market-ah a thleng thei a, damlo tan pawh damdawi in thlen a zângkhai phah bawk.

Zirchianna hrang hrangin a tarlan danin, khaw tinah kawng ṭha a luh hian loneih ringawt loa sumdawnna dangte a rawn piang chhuak a, mipuite khawsak a nuam phah a ni.

Mizoram hian kawngpui changtlung tak kan neih theih nan nasa taka hma lak chhunzawm a ngai a. Kan ram leilung hi a nem avangin leh lei min hlauhthawnawm a nih avangin, hmasawnna kan bawhzui rual hian environment venhim leh thingkung humhalh pawh kan ngaih pawimawh rual a ngai. Sorkar chauh ni loin, mipui pawhin kan kawngpui hi vawng thianghlimin, a sir tuihawk luan rona daltu bawlhhlawh te kan paih loh a pawimawh hle.

Kumtharah kawng ṭha kan neih theih nan sorkar leh mipui i ṭangrual ang u.

- Lalnundanga