KRISMAS PARADE-AH KA TEL VE
December ni 23, 2025 chhuna Tourism Dept. huaihawta Krismas Parade, Ch Saprawnga building bul aṭanga AR Ground thleng kal zingah khan ka tel ve a, a hlimawm ka ti hle mai. No Vehicle Day a ni a, Krismas bazar hun vawrtawp nen a innang bawk a, mipui kan ṭhahnemin, eng chen kha nge kawng zawh chin pawh hriat harsa khawpin kan zi mur mur a ni ber mai. Kan CM pawhin Zarkawt traffic point aṭangin a lo zawm ve a, hemi nia kan VIP berte chu vohbikte kha an ni awm e. Venghnuai Pavalai Band party-te’n Krismas hla rimawiin min awi reng bawk a. Muangchanga kalin AR Ground thlen nan darkar 1:40 mins lai kan hmang a ni. Krismas lam hawi thawmhnaw, costume dress, mascot, cosplay leh lukhum sen leh chi hrang hrang nen Krismas puala kawng zawh hi a vawikhatna a ni hial em aw? A va zawngchhang tlak em ve le.
ZU RUI HMEL AN AWM LO: Khati zat mipui zingah khan zu rui hmel ka hmu miah lo va, nau pawm leh chhangchhe tak takte kha a phur ber berah an ṭang niin a lang a, lawmawm ka ti. Kawng sir tluanin mipuiin min thlir ṭhup mai a, ban vaiin min lo lawmte kha a ropui mang e. Dawrkai leh mimal in aṭangte khan sweet an rawn vawm ur ur mai a, Krismas Parade khan Kristiante rilruah hna a thawk tih a chiang a ni. A hnung lamah khan motor chung aṭangin Zonet TV-a thu puangtu zei tak mai Nl Zorinpuii Hlondo khan kawng zawh chhante leh thil hrang hrang kha zei takin apuang reng bawk a, a khat tawkin sweet kha a rawn sûr thla reng bawk.
YOUTUBER HRIAT HLAWH - MARIA FANAI A LANGSAR! Remchang takin Maria Fanai te chhungkua pawh kawng zawhnaah hian an tel a, mipuiin an lawmin thlalakpui pawh an hlawh hle mai. Kawng sir tawn tawn aṭanga lo autu pawh a ngah nangiang e. A channel lamah a kimchang zawkin lo la lang turah ngai ila. Vai youtuber pawhin kawng zawhte hi an cover ṭha hle niin a hriat a, kawng sir tawn tawnah mobile phone an lek sup sup mai a ni. He kawngzawh hi tun aia hlimawm leh hlutawm zawka chhunzawm zel a va duhawm em; i beisei phawt ang aw le!
Mizote hian thufing kan neih chu, ‘Mahni infak leh sakhi ngalah engmah a bet lo,’ tih a ni ṭhin. Mahni infak leh insawi mawi chiam hi kan hnam zia a ni ngai lo. Hetih rual hian, tunlaiah chuan kan ṭhat lohna lam hi kan sawi chiam mai ṭhin a, kan thil tih ṭhat lam hi chu kan la tarlang mawh ang reng hle a ni. Politician leh kohhrana rawngbawltute hi mahni intihlar leh social media lama an thusawi lai miin an hre lo palh ang tih hlau ni awm fahrana post zung zung ching zu ni tlat zawk a. Kan pipute chuan mahni an infakin an insawimawi ngai lo va, fak ngai chu mi dangin an fak mai zawk ṭhin a ni.
Kan ram leh hnam thilah hi chuan kan ṭan ho thiam leh kan mawi mai a, keimahni kan inseh neuh neuh chhung chuan hnam zahawm kan ni ngai lo vang. Ram leh hnam thilah hi chuan kan ṭhatna lam puanzar hi inthlahrung lutuk lo ila. Drug addict, HIV chuti zat tih reng pawh hian min siam ṭha em. Kan traffic discipline ṭhat avanga lawmman kan dawng hialte hi keimahni puanzar nge, hnam dang ten min puanzarsak zawk le. Kristian rama Krismas Parade kan hmang hi thil inhmeh tak a ni a, a vawi khatnaah pawh kan hlut thiam hle a, tun aia hlutawm zawka hmalak zel chi a ni ang.
Krismas kawngzawh (parade) hma deuh khan Chanmari Kohhran hian naupang Sande Sikul hote kawng zawhpuiin Pathian thute an aurual pui tih thu an sawi a; kohhran dangte tan entawn ngei chi an va ni em ve le. Kan sualzia thu naupangte hrilh fo ai chuan Pathian thu khawlaia aupui hi Kristian zia dik takah ka ngai. Chanmari Kohhran an fakawm e.
RAWTNA TLEM AW:
1. Krismas Parade hi sawrkar dept. leh kohhran ṭangrual hian huaihawt se, kawng zawh pahin zai leh lamna hunte ninawm lo tawka siam ni se. Pathian fakin zaiin lam hut hut ila chanchin ṭha hrilna kawng khat a ni ngei ang.
2. Krismas lo awm chhan leh a pawimawhnate puang zel bawk ila. Kohhrana rawngbawltu–pastor, upa leh adt. tel ve ngei thei se la, hnam dang hriat thiam turin sapṭawng leh vaiṭawnga puangtu insiam bawk ila.
3. Kan inthuamna custume dress, mascot, cosplay leh adt. kha uar zawka inthuam turin infuih zel bawk ila.
4. A tawp kharna AR Ground-ah khan zaithiam, group zai, lengkhawm zai thlengin (a ṭul chuan) programe hlimawm leh mipui hip thei (hnam dang thlengin) siam ni bawk se la. Chhun thingpui (tiffin) tuihnai tak buatsaih ni thei se. Heng bakah hian intihhlimna dang telh tur a awm thei bawk awm e.
Tunlai hunah social media a chak tawh a, Lal Isua lo piang tur lawmna kawngzawh hi kan zawh tawp hma hmain khawvel a deng chhuak thei tawh a ni. Heng baka chanchin ṭha hrilna hun remchang a awm chuang lo vang tih hriain i uar deuh deuh teh ang u.
- Stevena Pu, Aizawl