State university-in tourist a hîp ang maw?
Tun hnaiah Mizoram State University awmna tur chungchangin thawm a nei lian hle a. Mizoram sawrkarin Assembly House-ah meuh dan siam a, Aizawla awm tura a tih tawh chu Lunglei lama pawl hrang hrangte nawrna do zo lovin sawrkar hotute chuan Lungleia awm turin a ti leh ta zawk a. Lungleia dah tur chuan Assembly House-ah dan tihdanglam leh phawt a ngai dawn a, thil harsa lutuk erawh a ni lo ang.
State university awmna tur chungchang hian tun hnaiah sawi a hlawh hle mai a; sawi a hlawh chhan chu Lunglei lamin Lunglei lama awm tura na taka an nawr vang a ni ber. Mithiam leh vengva tak takte'n an ngaihdan sawiin an ziak tawh a; an ngaihdante kha a àwm ang hlawm viau. Kan Mizo IAS officer (Rtd) Pu P.C. Lawmkunga pawhin a ngaihdan a ziak a, 2025 kum tawp lam khan Vanglaini-ah a rawn chhuak a.
Pu P.C. Lawmkunga thu ziakah khan arbawp khel taka khel ni chuang lovin, han khel zui thuak duh ka nei a; chu chu–Lungleia Mizoram State University dah tourism tihhmasawnna atana ṭha tur ang leh tourist tam tak an luh phah tur anga a ziah kha a ni.
Lungleia state university awm tur chuan tourism a tihhmasawn tur thu a ziak a, "... zin veivak mi an lo lut tam hle bawk ang. Myanmar, Bangladesh mai bakah India ram aṭang pawhin tlawhtu an nei zut zut ngei ang. Hotel leh homestay lam ti mite tan eizawnna ṭha tak a lo ni bawk ang," tihte a ziak a.
"...kan state university chu khualzinte hîptute zinga pawimawh ber pakhat a lo ni ang a. Zirlai tam tak, India ram aṭang chauh ni lovin, India ram pawn aṭangin tam tak an lo lut hum hum ngei ang," a ti bawk.
Hetianga Pu P.C. Lawmkunga'n a ziah hi thil thleng thei lo hulhual chu a nih ka ring bik lo va, mahse, a sawi ang hi chu a nih ka ring lo tawp. MZU hi kum 30 a tling ve dawn hnai ta, central sum ring a ni bawk a, hma a sawn chak a, tunah chuan India rama university ṭha pawl a ni tawh. India ram state dang bakah, ram dang aṭang pawhin zirlai eng emaw zat an awm ta.
MZU hi varsity ṭha leh changtlung a ni tawh chung hian, tourist erawh a hîp viau kan hre lem lo; Mizoram pawn aṭanga MZU rawn tlawhtute hi chu seminar/workshop/symposium etc rawn hmang tur an ni tlangpui. Zin khawthawng (tourist) te'n MZU an tlawh thawm hriat tur leh hmuh tur a vâng khawp mai.
MZU pawh hetiang a nih laia Lungleia la din chawp tur state university-in khualzin a hîp viau dawn anga sawi hi chu a àwm-ang lo deuh a; thil nihna tak piah lama mipui rilru hruai tumna a ni em aw, ka ti a ni. Thil nihna dik tak piah lam, suangtuahna lam thil mipui hnena puanzar hi ṭha lo ka tih avangin ka rawn ziak ve hrim hrim a ni e. Thiamna, hriatna leh tawnhriat lamah chuan Pu P.C. Lawmkunga né pawh ka ek lo a nia!
Mizoram State University din tur Lungleia dah leh dah lohah àwn lam ka nei lo tih ka'n zep ve hrim hrim bawk teh ang (zawngte mit hup telin)!
- Zoramchhana